Yakobo 1:1-27
1 Mina Yakobo,+ nandza wa Xikwembu ni wa Hosi Yesu Kreste, ndza mi xeweta n’wina tinyimba ta 12 leti hangalakeke etindhawini to hambanahambana.
2 Vamakwerhu, tsakani loko mi hlangana ni miringo yo hambanahambana,+
3 hilaha mi swi tivaka hakona leswaku ripfumelo ra n’wina leri ringiweke, ri tswala ku tiyisela.+
4 Kambe pfumelelani ku tiyisela ku heta ntirho wa kona, leswaku mi ta helela ni ku pfumala xisandzu eka hinkwaswo, mi nga kayiveli nchumu.+
5 Kutani loko ku ri ni loyi a pfumalaka vutlhari exikarhi ka n’wina, a a ye emahlweni a kombela eka Xikwembu+ hikuva xi nyika hinkwavo hi mbilu yo basa handle ko xopaxopa swihoxo+ kutani xi ta n’wi nyika byona.+
6 Kambe a a ye emahlweni a kombela hi ripfumelo,+ a nga kanakani nikatsongo,+ hikuva loyi a kanakanaka u fana ni gandlati ra lwandle leri biwaka hi moya ri ya hala ni hala.
7 Kahlekahle, munhu wo tano a nga languteli ku amukela nchumu eka Yehovha;*
8 i munhu la nga tiviki timhaka ta yena,+ a nga tiyanga etindleleni takwe hinkwato.
9 Kambe makwerhu la nga xisiwana a a tsake* hi ku tlakusiwa kakwe,+
10 ni loyi a fuweke hi ku tsongahatiwa kakwe,+ hikuva u ta hundza ku fana ni xiluva xa le nhoveni.
11 Hikuva tanihi leswi dyambu ri tsuvukaka ni mumu wa rona lowu hisaka kutani ri vunisa ximilana, xiluva xa xona xi wa, ku saseka ka xona ku nyamalala, ni munhu loyi a fuweke u ta nyamalala a ha hlongorisa rifuwo.+
12 Wa tsaka munhu loyi a yaka emahlweni a tiyisela miringo,+ hikuva loko a yi hlurile u ta kuma harhi ya vutomi,+ leyi Yehovha* a yi tshembisaka lava tshamaka va ri karhi va N’wi rhandza.+
13 Loko munhu a ringiwa, a nga vuli a ku: “Ndzi ringiwa hi Xikwembu.” Hikuva Xikwembu xi nge ringiwi hi swilo swo biha naswona xona a xi ringi munhu.
14 Kambe un’wana ni un’wana u ringiwa hi ku kokiwa ni ku wongiwa* hi leswi a swi navelaka.+
15 Kutani loko ku navela ku xurhe,* ku veleka xidyoho; loko xidyoho xi endliwile xi tswala rifu.+
16 Vamakwerhu lava rhandzekaka, mi nga xisiwi.
17 Nyiko yin’wana ni yin’wana leyinene ni nyiko yin’wana ni yin’wana leyi hetisekeke yi huma ehenhla,+ yi xika hi le ka Tata wa mavoni lama nga exibakabakeni,+ loyi a nga cincacinciki ku fana ni mindzhuti leyi fambaka.+
18 U hi tswale hi rito ra ntiyiso hi ku swi rhandza,+ leswaku hi va vo sungula ku hlawuriwa eka swivumbiwa swakwe.+
19 Vamakwerhu lava rhandzekaka, tivani leswi: Munhu un’wana ni un’wana u fanele a hatla ku yingisa, a hlwela ku vulavula,+ a hlwela ku hlundzuka,+
20 hikuva ku hlundzuka ka munhu a ku n’wi endli a endla swo lulama eka Xikwembu.+
21 Hikwalaho, cukumetani thyaka hinkwaro ni vuthala hinkwabyo bya swilo swo biha,+ kutani mi ku amukela hi ku olova ku byariwa ka rito leri kotaka ku mi ponisa.
22 Hambiswiritano, vanani vaendli va rito,+ mi nga vi vatwi ntsena, lava tixisaka hi miehleketo ya mavunwa.
23 Phela loko munhu a ri mutwi wa rito kambe a nga ri muendli,+ u fana ni munhu loyi a langutaka xikandza xakwe exivonini.
24 Hikuva wa tilanguta, kutani a famba, hi ku hatlisa a rivala leswaku i munhu wa muxaka muni.
25 Kambe loyi a kambisisaka nawu lowu hetisekeke+ lowu fambisanaka ni ntshunxeko kutani a ya emahlweni a hanya ha wona, munhu yoloye a nga vanga mutwi loyi a rivalaka, kambe u ve muendli wa ntirho; naswona u ta tsaka hi leswi a swi endlaka.+
26 Loko munhu a ehleketa leswaku u gandzela Xikwembu kambe a nga ri lawuli ririmi rakwe,+ wa tixisa naswona vugandzeri byakwe a byi pfuni nchumu.
27 Vugandzeri* lebyi baseke hi ku ya hi Xikwembu tlhelo Tata wa hina hi lebyi: ku hlayisa vana lava nga riki na vatswari+ ni tinoni+ leti nga emaxangwini,+ ni ku va munhu a tshama a nga ri na xivati xa misava.+
Tinhlamuselo ta le hansi
^ Vona Xiengetelo A5.
^ Hi Xigriki, “tibume.”
^ Vona Xiengetelo A5.
^ Kumbe “phasiwa.”
^ Hi Xigriki, “tikile.”
^ Kumbe “vukhongeri.”
