Yakobo 3:1-18
3 Vamakwerhu, a hi vo tala eka n’wina lava faneleke va va vadyondzisi, hi ku tiva leswaku hi ta kuma vuavanyisi byo tika swinene.+
2 Hikuva hinkwerhu hi endla swihoxo ko tala.+ Loyi a nga khunguvanyisiki van’wana hi leswi a swi vulaka, u hetisekile, u kota ni ku lawula miri wakwe hinkwawo.
3 Loko hi veka matomu emilon’wini ya tihanci leswaku ti ta hi yingisa, hi lawula ni miri wa tona hinkwawo.
4 Langutani ni swikepe: Hambileswi swi nga swikulu ngopfu naswona swi fambisiwaka hi moya wa matimba, kambe swi lawuriwa hi nchumu lowutsongo,* kutani swi ya laha loyi a swi lawulaka a lavaka leswaku swi ya kona.
5 Swi tano ni hi ririmi, i xirho lexitsongo emirini, kambe ri tikurisa ngopfu. Swi lava ndzilonyana lowutsongo ku lumeka nhova leyikulu swinene!
6 Ririmi na rona i ndzilo.+ Eka swirho swa miri wa hina hinkwaswo, ririmi hi rona ro homboloka swinene hikuva ri thyakisa miri hinkwawo+ naswona ri nga lumeka vutomi bya munhu hi ndzilo, kasi rona ri kuma ndzilo wa rona eGehena.*
7 Phela mixaka hinkwayo ya swiharhi, swinyenyana, swikokovi ni swivumbiwa swa le lwandle, swi nga dyondzisiwa naswona vanhu va swi dyondzisile.
8 Kambe a nga kona la nga dyondzisaka ririmi. A ri lawuleki naswona ra onha, ri tele hi chefu leyi dlayaka.+
9 Ha rona hi dzunisa Yehovha* Tata wa hina, hi hala tlhelo, hi rhukana vanhu lava vumbiweke “hi xifaniso xa Xikwembu” ha rona.+
10 Enon’wini wun’we ku huma xidzuniso ni ndzhukano.
Vamakwerhu, a swi fanelanga leswaku swilo swi endleka hi ndlela leyi.+
11 Xana xihlovo xi nga humesa mati lamanene* ni yo dzunga?
12 Vamakwerhu, xana nkuwa wu nga tswala mihandzu ya mitlhwari, kumbe mudiriva wu tswala makuwa?+ Ni mati ya munyu a ma nge humesi mati lamanene.
13 I mani la tlhariheke naswona a twisisaka exikarhi ka n’wina? A a tikombe hi ku tikhoma kakwe lokunene, hi ku endla swilo hi ku rhula loku fambisanaka ni vutlhari.
14 Kambe loko mi ri ni mavondzo+ ni timholovo+ etimbilwini ta n’wina, mi nga tibumi+ mi hembela ntiyiso.
15 Lebyi a hi vutlhari lebyi humaka hi le henhla; kambe i bya misava,+ i bya vuharhi ni vudimona.
16 Hikuva laha ku nga ni mavondzo ni timholovo, ku ta tlhela ku va ni mpfilumpfilu ni swilo hinkwaswo swo homboloka.+
17 Kambe vutlhari lebyi humaka ehenhla xo sungula byi tengile,+ byi tlhela byi va ni ku rhula,+ ku anakanyela,+ byi tlhela byi tiyimisela ku yingisa, ku tala tintswalo ni mihandzu leyinene,+ a byi na xihlawuhlawu,+ a byi na vukanganyisi.+
18 Ku tlula kwalaho, mihandzu ya ku lulama yi byaleriwa lava kondletelaka ku rhula+ eswiyin’weni swa ku rhula.+
Tinhlamuselo ta le hansi
^ Kumbe “xihundzulo.”
^ Vona Tinhlamuselo.
^ Vona Xiengetelo A5.
^ Hi Xigriki, “yo tsokombela.”
