Yeremiya 12:1-17
12 Yehovha Xikwembu xanga,+ u lulamile loko ndzi tisa xirilo xa mina eka wena,Loko ndzi vulavula na wena hi timhaka leti khumbaka vululami.
Kambe hikwalaho ka yini swilo swi va fambela kahle lavo homboloka,+Hikwalaho ka yini lava nga tshembekiki va nga karhateki?
2 U va byarile naswona va dzime timitsu.
Va kurile va humesa mihandzu.
Va tshamela ku vulavula hi wena kambe etimbilwini* ta vona a va na mhaka na wena.+
3 Yehovha Xikwembu xanga,+ u ndzi tiva kahle, wa ndzi vona;U kambele mbilu ya mina naswona u kume leswaku yi ni vun’we na wena.+
Va hlawule ku fana ni tinyimpfu leti yaka eku tlhaviweni,U va hlawulela siku ra ku dlayiwa.
4 Xana tiko ri ta ya emahlweni ri vuna ku fikela riniNi swimilana swa le masin’wini man’wana ni man’wana swi ta oma ku fikela rini?+
Swiharhi ni swinyenyana swi herisiwile,Hikwalaho ka vubihi bya vanhu lava tshamaka eka rona.
Hikuva va te: “A nga swi voni leswi nga ta hi endlekela.”
5 Loko u karharisiwa hi ku tsutsuma ni vanhu,Xana u nga tsutsumisa ku yini u phikizana ni tihanci?+
Hambiloko u titwa u sirhelelekile etikweni leri nga ni ku rhula,Kambe u ta endla yini loko u ri exikarhi ka makhwati lama tlhumeke lama nga eYordani?
6 Hikuva hambi ku ri vamakwenu, vandyangu wa tata wa wena,Va ku kanganyisile.+
Va ku huwelerile.
U nga va tshembi,Hambiloko va vulavula swilo leswinene eka wena.
7 “Yindlu ya mina ndzi yi tshikile;+ ndzi tshike ndzhaka ya mina.+
Ndzi nyikete murhandziwa wa mina eka valala va yena.+
8 Eka mina ndzhaka ya mina yi fana ni nghala ekhwatini.
Yi ndzi mpfhumpfherile.
Hikwalaho ndza yi venga.
9 Eka mina, ndzhaka ya mina yi fana ni xinyenyana xa mavalavala lexi dyaka nyama;Swinyenyana leswin’wana leswi dyaka nyama swa xi rhendzela swi xi hlasela.+
Tanani, hlengeletanani n’wina hinkwenu swiharhi,Tanani mi ta dya.+
10 Varisi vo tala va lovise nsimu ya mina ya madiriva;+Va kandziyele tiko ra mina.+
Tiko ra mina ro saseka va ri hundzule mananga lama nga rhumbi.
11 Ri hundzuke rhumbi.
Ri vunile;*Ri endliwe rhumbi emahlweni ka mina.+
Tiko hinkwaro ri endliwe rhumbi,Kambe a ku na munhu loyi a swi tekelaka enhlokweni.+
12 Vanhu lava lovisaka va te hi tindlela hinkwato leti wupfeke ta le mananga,Hikuva banga ra Yehovha ri lovisa ku suka emakun’wini man’wana ya tiko ku ya emakun’wini man’wana.+
Vanhu hinkwavo a va na ku rhula.
13 Va byale koroni, kambe va tshovele mitwa.+
Va tirhe hi matimba, kambe a swi pfuni nchumu.
Ntshovelo wa vona wu ta va khomisa tinganaHikwalaho ka ku hlundzuka lokukulu ka Yehovha.”
14 Yehovha u byela vaakelani va mina hinkwavo vo homboloka, lava khumbaka ndzhaka leyi ndzi yi nyikeke vanhu va mina, ku nga Israyele,+ a ku: “Ndza va simula etikweni ra vona+ naswona ndzi ta simula tiko ra Yuda exikarhi ka vona.
15 Kambe endzhaku ka loko ndzi va simurile, ndzi ta tlhela ndzi va komba tintswalo ndzi vuyisa un’wana ni un’wana endzhakeni ya yena ni le tikweni ra yena.”
16 “Kutani loko vo tiyiseka leswaku va dyondza tindlela ta vanhu va mina va tlhela va hlambanya hi vito ra mina, va ku, ‘Leswi Yehovha a hanyaka,’ hilaha va dyondziseke vanhu va mina hakona leswaku va hlambanya hi Bali, va ta simekiwa exikarhi ka vanhu va mina.
17 Kambe loko va ala ku yingisa, ndzi ta simula tiko rero, ndzi ri simula ndzi tlhela ndzi ri lovisa,” ku vula Yehovha.+
