Yeremiya 13:1-27
13 Yehovha a ndzi byela a ku: “Famba u ya tixavela bandhi leri endliweke hi lapi u ri boha emasengeni kambe u nga ri nghenisi ematini.”
2 Kutani ndzi xava bandhi hilaha Yehovha a ndzi leriseke hakona, ndzi ri boha emasengeni.
3 Yehovha a tlhela a vulavula na mina a ku:
4 “Teka bandhi leri u nga ri xava, leri u ri boheke u ya eYufrata, kutani u fika u ri fihla ebakweni leri nga eribyeni.”
5 Hiloko ndzi famba ndzi ya ri fihla eYufrata, hilaha Yehovha a ndzi leriseke hakona.
6 Kambe endzhaku ka masiku yo tala Yehovha a ku eka mina: “Pfuka u ya eYufrata u fika u teka bandhi leri ndzi ku leriseke leswaku u ri fihla kona.”
7 Hiloko ndzi ya eYufrata ndzi fika ndzi cela laha ku nga ni bandhi kutani ndzi ri teka laha a ndzi ri fihle kona kambe a ri onhakile; a ri nga ha pfuni nchumu.
8 Yehovha a vulavula na mina a ku:
9 “Yehovha u ri, ‘Ndzi ta herisa ku tikukumuxa ka Yuda ni ku tikukumuxa lokukulu ka Yerusalema hi ndlela yoleyo.+
10 Vanhu lava vo homboloka lava alaka ku yingisa marito ya mina,+ lava tiomisaka tinhloko va endla leswi timbilu ta vona ti va byelaka swona+ naswona va landzelelaka swikwembu swin’wana, va swi tirhela va tlhela va swi khinsamela, va ta fana ni bandhi leri, leri nga pfuniki nchumu.’
11 ‘Hikuva tanihi leswi bandhi ri namarhelaka masenge ya munhu, ndzi endle leswaku vanhu hinkwavo vandyangu wa Israyele ni vanhu hinkwavo vandyangu wa Yuda va ndzi namarhela,’ ku vula Yehovha, ‘leswaku va va vanhu va mina,+ ndhuma ya mina,+ ku dzuneka ka mina ni nchumu wo saseka. Kambe a va yingisanga.’+
12 “U fanele u tlhela u va byela marito lawa, ‘Yehovha Xikwembu xa Israyele u ri: “Khuwana rin’wana ni rin’wana ri fanele ri tatiwa hi vhinyo.”’ Kutani va ta ku hlamula va ku, ‘Xana a hi swi tivi leswaku khuwana rin’wana ni rin’wana ri fanele ri tatiwa hi vhinyo?’
13 Kutani va byele u ku, ‘Yehovha u ri: “Ndzi nyika vaaki hinkwavo va tiko leri,+ tihosi leti tshameke exiluvelweni xa Davhida, vaprista ni vaprofeta ni vaaki hinkwavo va Yerusalema vhinyo kukondza va dakwa.
14 Ndzi ta va fayetela ndzi va bananisa, vatatana ni vana,” ku vula Yehovha.+ “A ndzi nge va tsetseleli kumbe ndzi va twela vusiwana kumbe ndzi va ni tintswalo eka vona; a xi kona lexi nga ta ndzi sivela ku va lovisa.”’+
15 Rhiyani ndleve mi yingisa.
Mi nga titlakusi, hikuva Yehovha u vurile.
16 Vangamisani Yehovha Xikwembu xa n’winaA nga si tisa munyama,Milenge ya n’wina yi nga si khudlunyiwa etintshaveni nimadyambu.
Mi ta langutela ku vonakala,Kambe u ta tisa ndzhuti lowukulu;U ta wu hundzula ku dzwihala lokukulu.+
17 Loko mi ala ku yingisa,Ndzi ta rila exihundleni hikwalaho ka ku tikukumuxa ka n’wina.
Ndzi ta humesa mihloti yo tala naswona matihlo ya mina ma ta xiririka mihloti,+Hikuva ntlhambi wa Yehovha+ wu yisiwe evuhlongeni.
18 Byelani hosi ni mana wa hosi+ mi ku, ‘Tshamani endhawini ya le hansi,Hikuva harhi ya n’wina yo saseka yi ta wa etinhlokweni ta n’wina.’
19 Miti ya le dzongeni yi pfariwile,* a ku na munhu loyi a yi pfulaka.
Vanhu hinkwavo va le Yuda va yisiwe evuhlongeni, a ku salanga ni un’we.+
20 Languta u vona lava humaka en’walungwini.+
Wu kwihi ntlhambi lowu u nyikiweke wona, tinyimpfu ta wena to saseka?+
21 Xana u ta ku yini loko u xupuriwaHi vanhu lava mikarhi hinkwayo a wu va teka tanihi vanghana va wena lavakulu?+
Xana a wu nge vi ni switlhavi swa ku veleka, swo fana ni swa wansati loyi a velekaka?+
22 Loko embilwini ya wena u ku, ‘Hikwalaho ka yini ndzi weriwa hi swilo leswi?’+
U hluvuriwe swiambalo swa wena hikwalaho ka xihoxo xa wena lexikulu+Naswona swirhendze swa wena swi vavisiwile.
23 Xana Mukuxi* a nga yi hundzula nhlonge yakwe kumbe yingwe yi hundzula mavala ya yona?+
Loko sweswo swo koteka, na n’wina mi nga swi kota ku endla leswinene,N’wina lava mi leteriweke ku endla leswo biha.
24 Kutani ndzi ta va hangalasa ku fana ni mahlanga lama hungiwaka hi moya wa le mananga.+
25 Lexi i xiphemu xa wena, xiavelo lexi ndzi ku pimeleke xona,” ku vula Yehovha,“Hikuva u ndzi rivele+ naswona u tshemba mavunwa.+
26 Hikwalaho ndzi ta tlakusela swiambalo swa wena ehenhla ndzi ku pfala xikandza hi swona,Vanhu va ta ku vonela,+
27 Swiendlo swa wena swa vuoswi+ ni ku navela ka wena,Vunghwavava bya wena lebyikulu.*
Ndzi vone ku tikhoma ka wena loku nyenyetsaka,+Eswintshabyanini ni le nhoveni.
Khombo eka wena Yerusalema!
Xana u ta tshama u thyakile ku fikela rini?”+
Tinhlamuselo ta le hansi
^ Kumbe “rhendzeriwile.”
^ Kumbe “Muetiyopiya.”
^ Kumbe “lebyi khomisaka tingana.”
