Yeremiya 15:1-21
15 Yehovha a ku eka mina: “Hambiloko Muxe na Samuwele a va yime emahlweni ka mina,+ vanhu lava a ndzi nga ta va tsetselela. Va hlongole emahlweni ka mina. A va suke.
2 Loko va ku eka wena, ‘Hi fanele hi ya kwihi?’ u fanele u va byela u ku, ‘Yehovha u ri:
“Loyi a faneriwaka hi vuvabyi lebyi dlayaka, a a byi n’wi dlaye!
Loyi a faneriwaka hi banga, a a dlayiwe hi banga!+
Loyi a faneriwaka hi ndlala, a a dlayiwe hi ndlala!
Kasi loyi a faneriwaka hi vuhlonga, a a ye evuhlongeni!”’+
3 “‘Kutani ndzi ta lerisa makhombo ya mune* leswaku ma va wela,’+ ku vula Yehovha, ‘banga leswaku ri dlaya, timbyana leswaku ti kokakoka, swinyenyana ni swivandzana leswaku swi dya swi tlhela swi lovisa.+
4 Ndzi ta endla leswaku mifumo hinkwayo ya misava+ yi chava hikwalaho ka leswi nga ta va humelela hikwalaho ka Manase n’wana wa Hezekiya, hosi ya Yuda, hikwalaho ka leswi a swi endleke eYerusalema.+
5 I mani loyi a nga ta ku twela vusiwana, wena Yerusalema,I mani loyi a nga ta ku tshandzisa,I mani loyi a nga ta yima a ku pfuxela?’
6 ‘U ndzi tshikile,’ ku vula Yehovha.+
‘U tshamela ku ndzi fularhela.*+
Kutani ndzi ta tlakusa voko ra mina ndzi lwa na wena ndzi ku lovisa.+
Ndzi karhele ku ku twela vusiwana.*
7 Kutani ndzi ta va hambanisa hi foroko etigedeni ta tiko.
Ndzi ta endla leswaku va sala va nga ri na vana.+
Ndzi ta lovisa vanhu va mina,Tanihi leswi va alaka ku tshika tindlela ta vona.+
8 Ndzi ta endla tinoni ta vona ti tala swinene ku tlula sava ra malwandle.
Ndzi ta tisa mulovisi a ta va lovisa ninhlikanhi, u ta lovisa vamanana ni majaha.
Ndzi ta va tisela ku pfilunganyeka ni ku chava lokukulu hi xitshuketa.
9 Wansati loyi a velekeke vana va nkombo u titivarile;U heleriwa hi moya.
Dyambu rakwe ri pele ka ha ri nhlikanhi,Ri vanga tingana ni ku tsongahatiwa.’*
‘Masalela ya vona ma nga ri manganiNdzi ta ma nyiketa ebangeni emahlweni ka valala va vona,’ ku vula Yehovha.”+
10 Wena manana, khombo eka mina hikuva u ndzi velekile,+Ndzi munhu loyi a holovaka ni ku lwa ni tiko hinkwaro.
A ndzi lombisanga nchumu naswona a ndzi lombiwanga nchumu;Kambe hinkwavo ka vona va ndzi rhuketela.
11 Yehovha u te: “Entiyisweni ndzi ta ku pfuna;Ndzi ta ku lamulela hakunene emahlweni ka nalaHi nkarhi wa khombo ni hi nkarhi wa maxangu.
12 Xana munhu a nga yi tshovelela nsimbhi,Nsimbhi ya le n’walungwini ni koporo?
13 Rifuwo ra wena ni xuma xa wena ndzi ta swi nyiketa leswaku swi tekiwa,+Ku nga ri hi nxavo, kambe hikwalaho ka swidyoho swa wena hinkwaswo etindhawini ta wena hinkwato.
14 Ndzi ta swi nyika valala va wenaLeswaku va swi teka va swi yisa etikweni leri u nga ri tiviki.+
Hikuva ku hlundzuka ka mina ku lumeke ndzilo,Wu pfurhela n’wina.”+
15 Yehovha Xikwembu xanga wa swi tiva,Ndzi tsundzuke u anakanyisisa ha mina.
Ndzi rihiselele eka vaxanisi va mina.+
U nga va lehiseli mbilu kutani u ndzi tshika ndzi lovisiwa.
Swi tive leswaku ndza rhukaniwa hikwalaho ka wena.+
16 Ndzi kume marito ya wena, hiloko ndzi ma dya;+Rito ra wena ri endle mbilu ya mina yi khana yi tlhela yi tsaka,Hikuva ndzi vitaniwa hi vito ra wena, Yehovha Xikwembu xa mavuthu.
17 A ndzi dzumbi ni vanhu lava endlaka mafenya kutani ndzi tsaka na vona.+
Leswi voko ra wena ri nga ehenhla ka mina, ndzi tshama ndzi ri ndzexe,Hikuva u ndzi endle ndzi tala ku hlundzuka.*+
18 Hikwalaho ka yini xitlhavi xa mina xi nga holi ni mbanga ya mina yi nga tshunguleki?
Yi ala ku horisiwa.
Xana eka mina u ta fana ni xihlovo xa mati lexi nga riki na matiLexi nga ta ka xi nga tshembiwi?
19 Hikwalaho Yehovha u ri:
“Loko u tlhelela eka mina, ndzi ta tlhela ndzi ku amukela,U ta yima emahlweni ka mina.
Loko u hambanisa swilo swa nkoka eka leswi nga pfuniki nchumu,U ta fana ni nomu wa mina.*
Va ta boheka ku ta eka wena,Kambe wena a wu nge yi eka vona.”
20 “Ndzi ku endla khumbi ro tiya ra koporo eka vanhu lava.+
Va ta lwa na wena,Kambe a va nge ku hluli,+Hikuva ndzi na wena leswaku ndzi ku ponisa ni ku ku kutsula,” ku vula Yehovha.
21 “Ndzi ta ku ponisa evokweni ra lavo biha,Ndzi ku kutsula exandleni xa lava nga ni tihanyi.”
Tinhlamuselo ta le hansi
^ Kumbexana “mixaka ya mune ya vuavanyisi.” Hi Xiheveru, “mindyangu ya mune.”
^ Kumbexana “tshamela ku famba u tlhelela endzhaku.”
^ Kumbe “ku tisola.”
^ Kumbexana “Ri khomiwe hi tingana ri titwa ri nga pfuni nchumu.”
^ Kumbe “rungula ra ku gweva.”
^ Kumbe “ta va muvulavuleri wa mina.”
