Yeremiya 23:1-40
23 “Khombo eka varisi lava lovisaka ni ku hangalasa tinyimpfu ta madyelo ya mina,” ku vula Yehovha.+
2 Hikwalaho mina Yehovha Xikwembu xa Israyele ndzi vula leswi hi varisi lava risaka vanhu va mina: “Mi hangalase tinyimpfu ta mina; mi ye emahlweni mi ti hangalasa naswona a mi ti hlayisanga.”+
“Ndzi ta mi xupula hikwalaho ka swiendlo swa n’wina swo biha,” ku vula Yehovha.
3 “Ndzi ta hlengeleta tinyimpfu ta mina leti saleke ematikweni hinkwawo lawa ndzi ti hangalaseleke eka wona,+ ndzi ta ti tlherisela emadyelweni ya tona,+ ti ta tswalana ti andza.+
4 Ndzi ta ti vekela varisi lava nga ta ti risa.+ A ti nge he chavi kumbe ku chavisiwa naswona a ku nge lahleki na yin’we,” ku vula Yehovha.
5 “Maswivo! Masiku ma ta,” ku vula Yehovha, “lawa ndzi nga ta humesela Davhida xihluke* xo lulama.+ Hosi yi ta fuma+ yi kombisa ku twisisa ni vululami naswona yi ta endla leswinene etikweni.+
6 Emasikwini ya yona Yuda u ta ponisiwa+ naswona Israyele u ta tshama a sirhelelekile.+ Yi ta vitaniwa hi vito leri: Yehovha I Ku Lulama Ka Hina.”+
7 “Hambiswiritano, masiku ma ta,” ku vula Yehovha, “lawa va nga ta ka va nga ha vuli va ku, ‘Leswi Yehovha a hanyaka, loyi a humeseke Vaisrayele etikweni ra Egipta,’+
8 kambe va ta ku, ‘Leswi Yehovha a hanyaka, loyi a humeseke a tlhela a tlherisela vatukulu va Israyele etikweni ra le n’walungwini ni le matikweni hinkwawo lawa ndzi va hangalaseleke eka wona,’ naswona va ta tshama etikweni ra vona.”+
9 Mayelana ni vaprofeta:
Mbilu ya mina yi tshovekile endzeni ka mina.
Marhambu ya mina hinkwawo ma rhurhumela.
Ndzi fana ni munhu loyi a nga dakwa,Ndzi fana ni munhu loyi a dakwisiweke hi vhinyo,Hikwalaho ka Yehovha ni hikwalaho ka marito yakwe yo kwetsima.
10 Hikuva tiko ri tele hi vaoswi;+Tiko ra rila+ hikwalaho ka ndzhukanoNaswona madyelo ya le mananga ma omile.+
Ndlela ya vona yi bihile naswona va tirhisa matimba ya vona hi ndlela yo biha.
11 “Muprofeta ni muprista i vagwinehi.+
Ndzi kume vubihi bya vona ni le ndlwini ya mina,”+ ku vula Yehovha.
12 “Ndlela ya vona yi ta va leyi rhetaka ni leyi dzwihaleke;+Va ta susumetiwa va wa.
Hikuva ndzi ta va tisela khomboHi lembe ra ku xupuriwa ka vona,” ku vula Yehovha.
13 “Eka vaprofeta va le Samariya+ ndzi vone nchumu lowu nyenyetsaka.
Vuprofeta bya vona byi kuceteriwa hi Bali,Va hambukisa vanhu va mina, ku nga Vaisrayele.
14 Eka vaprofeta va le Yerusalema ndzi vone swilo swo chavisa.
Va endla vuoswi+ naswona va vulavula mavunwa;+Va khutaza* vanhu lava endlaka swilo swo biha,A va tshiki ku endla swilo swo biha.
Eka mina hinkwavo va fana na Sodoma,+Kasi vaaki vakwe va fana na Gomora.”+
15 Hikwalaho Yehovha wa mavuthu u vula leswi hi vaprofeta:
“Ndzi va dyisa xibahaNdzi va nwisa mati lama nga ni chefu.+
Hikuva vaprofeta va le Yerusalema va endle leswaku vugwinehi byi hangalaka etikweni hinkwaro.”
16 Yehovha wa mavuthu u ri:
“Mi nga ma yingisi marito ya vaprofeta lava va mi profetelaka.+
Va mi kanganyisa.*
Xivono lexi va vulavulaka hi xona xi huma embilwini ya vona,+A xi humi enon’wini wa Yehovha.+
17 Hi ku phindhaphindha va byela lava nga ndzi xiximiki va ku,‘Yehovha u te: “Mi ta va ni ku rhula.”’+
Kasi va byela un’wana ni un’wana loyi a landzelaka mbilu yakwe yo nonon’hwa va ku,‘A ku na khombo leri nga ta mi wela.’+
18 Hikuva i mani loyi a yimeke exikarhi ka vanhu lava nga ekusuhi na YehovhaLeswaku a vona ni ku twa rito ra yena?
I mani loyi a yingiserisiseke rito rakwe leswaku a ri twa?
19 Maswivo! Xidzedze xa Yehovha xi ta hunga xi karihile;Ku fana ni xihuhuri xa matimba xi ta hunga etinhlokweni ta lavo homboloka.+
20 Yehovha a nge tshiki ku hlundzukaKu fikela loko a endle leswi a tiyimiseleke ku swi endla.
Exiphen’wini xo hetelela xa masiku mi ta swi twisisa kahle leswi.
21 A ndzi va rhumanga vaprofeta kambe va tsutsumile.
A ndzi vulavulanga na vona kambe va profetile.+
22 Kambe loko a va yime exikarhi ka vanhu lava nga ekusuhi na mina,A va ta va va endle leswaku vanhu va mina va twa marito ya minaA va ta va va endle leswaku va tshika ndlela ya vona yo biha ni swiendlo swa vona swo homboloka.”+
23 “Xana ndzi Xikwembu loko ndzi ri ekusuhi ntsena,” ku vula Yehovha, “xana a ndzi Xikwembu ni loko ndzi ri ekule?”
24 “Xana u kona munhu loyi a nga tumbelaka endhawini leyi tumbeleke leyi ndzi nga taka ndzi nga swi koti ku n’wi vona?”+ ku vula Yehovha.
“Xana a ndzi ma tati matilo ni misava?”+ ku vula Yehovha.
25 “Ndzi va twile vaprofeta lava profetaka mavunwa hi vito ra mina, va ku, ‘Ndzi lorhile! Ndzi lorhile!’+
26 Vaprofeta va ta ya emahlweni ku fikela rini va profeta mavunwa? I vaprofeta lava vulavulaka vukanganyisi lebyi humaka etimbilwini ta vona.+
27 Va tiyimisele ku rivarisa vanhu va mina vito ra mina hi milorho leyi va byelanaka yona, hilaha vatata wa vona va ri rivaleke hakona vito ra mina hikwalaho ka Bali.+
28 Muprofeta loyi a nga ni norho a a wu vule kambe loyi a nga ni rito ra mina u fanele a vula rito ra mina hi ntiyiso.”
“Xana byanyi bya fana ni mavele?” ku vula Yehovha.
29 “Xana rito ra mina a ri fani ni ndzilo,”+ ku vula Yehovha, “naswona xana a ri fani ni hamula leyi fayaka ribye?”+
30 “Hikwalaho ndzi lwa ni vaprofeta,” ku vula Yehovha, “lava tekaka marito ya mina eka vaprofeta van’wana kutani va ma soholota.”+
31 “Ndzi lwa ni vaprofeta,” ku vula Yehovha, “lava tirhisaka ririmi ra vona va ku, ‘U vula leswi!’”+
32 “Ndzi lwa ni vaprofeta va milorho ya mavunwa,” ku vula Yehovha, “lava va yi byelaka vanhu va mina ni ku va hambukisa hikwalaho ka mavunwa ya vona ni ku tikukumuxa ka vona.”+
“Kambe a ndzi va rhumanga kumbe ku va lerisa. A va nge va pfuni nchumu vanhu lava,”+ ku vula Yehovha.
33 “Loko vanhu lava kumbe muprofeta kumbe muprista, va ku vutisa va ku, ‘I yini ndzhwalo* wa Yehovha?’ u fanele u va hlamula u ku, ‘“N’wina mi ndzhwalo! Ndzi ta mi cukumeta,”+ ku vula Yehovha.’
34 Loko ku ri muprofeta kumbe muprista kumbe vanhu lava nge, ‘Lowu i ndzhwalo* wa Yehovha,’ ndzi ta xupula munhu yoloye ni ndyangu wakwe.
35 Un’wana ni un’wana wa n’wina u vutisa munghana wakwe ni makwavo a ku, ‘Yehovha u hlamule a ku yini? Yehovha u te yini?’
36 Kambe mi nga ha vulavuli hi ndzhwalo* wa Yehovha, hikuva ndzhwalo i rito ra un’wana ni un’wana, naswona mi hundzule marito ya Xikwembu lexi hanyaka, Yehovha wa mavuthu, Xikwembu xa hina.
37 “U ta byela muprofeta u ku, ‘Yehovha u ku hlamule a ku yini? Yehovha u te yini?
38 Loko mi ya emahlweni mi ku, “Ndzhwalo* wa Yehovha,” Yehovha u ri: “Hikwalaho ka leswi mi nge, ‘Rito leri i ndzhwalo wa Yehovha,’ endzhaku ka loko ndzi mi byele ndzi ku, ‘A mi fanelanga mi ku: “Ndzhwalo wa Yehovha,”’
39 maswivo! Ndzi ta mi tlakula ndzi mi cukumeta ekule ni laha ndzi nga kona, n’wina ni muti lowu ndzi wu nyikeke n’wina ni vakokwa wa n’wina.
40 Ndzi ta endla leswaku mi sandziwa hilaha ku nga heriki naswona ku khomisiwa ka n’wina tingana a ku nge rivariwi.”’”+
Tinhlamuselo ta le hansi
^ Kumbe “mudyandzhaka.”
^ Hi Xiheveru, “tiyisa mavoko ya.”
^ Kumbe “Va mi tshembisa swilo leswi nga riki kona.”
^ Kumbe “rungula ra tika.” Rito leri ra Xiheveru ri ni tinhlamuselo timbirhi: “rungula ra ntikelo ra vuavanyisi lebyi humaka eka Xikwembu” kumbe “nchumu wo tika.”
^ Kumbe “rungula ro tika ra.”
^ Kumbe “rungula ra ndzhwalo.”
^ Kumbe “Rungula ro tika.”
