Yeremiya 26:1-24
26 Eku sunguleni ka ku fuma ka Yoyakimi+ n’wana wa Yosiya, hosi ya Yuda, ku fike rito leri, leri humaka eka Yehovha, ri ku:
2 “Yehovha u ri, ‘Yima exivaveni* xa yindlu ya Yehovha kutani u vulavula ni vanhu hinkwavo va le mitini ya Yuda lava taka va ta gandzela* endlwini ya Yehovha. Va byele hinkwaswo leswi ndzi ku lerisaka swona; u nga siyi nchumu.
3 Kumbexana va ta yingisa kutani un’wana ni un’wana wa vona a tshika ndlela yakwe yo homboloka, kutani ndzi ta cinca miehleketo* mayelana ni khombo leri ndzi tiyimiseleke ku va tisela rona hikwalaho ka swiendlo swa vona swo homboloka.+
4 Va byele u ku: “Yehovha u ri, ‘Loko mi nga ndzi yingisi hi ku ka mi nga landzeli nawu* wa mina lowu ndzi wu vekeke emahlweni ka n’wina,
5 hi ku ka mi nga yingisi marito ya malandza ya mina lama nga vaprofeta, lawa ndzi ma rhumaka eka n’wina hi ku phindhaphindha,* lawa mi nga ma yingisangiki,+
6 kutani ndzi ta endla yindlu leyi yi fana na Xilo+ naswona muti lowu ndzi ta wu endla wu rhukaniwa ematikweni hinkwawo ya misava.’”’”+
7 Vaprista ni vaprofeta ni vanhu hinkwavo va n’wi twile Yeremiya loko a vulavula marito lawa endlwini ya Yehovha.+
8 Loko Yeremiya a heta ku vulavula hinkwaswo leswi Yehovha a n’wi leriseke ku swi byela vanhu hinkwavo, hiloko vaprista, vaprofeta ni vanhu hinkwavo va n’wi khoma, va ku: “Wena u ta fa hakunene.
9 Hikwalaho ka yini u profete hi vito ra Yehovha, u ku, ‘Yindlu leyi yi ta fana na Xilo, naswona muti lowu wu ta va rhumbi wu sala wu nga ha ri na vaaki’?” Hiloko vanhu hinkwavo va ta eka Yeremiya va n’wi rhendzela endlwini ya Yehovha.
10 Loko tihosana ta le Yuda ti twa marito lawa, ti huma endlwini ya hosi ti ya endlwini ya Yehovha ti fika ti tshama egedeni leyintshwa ya Yehovha.+
11 Vaprista ni vaprofeta va byela tihosana ni vanhu hinkwavo va ku: “Munhu loyi u faneriwa hi xigwevo xa rifu,+ hikuva u profete leswi lwisanaka ni muti lowu hilaha mi swi tweke hakona hi tindleve ta n’wina.”+
12 Kutani Yeremiya a byela tihosana hinkwato ni vanhu hinkwavo a ku: “Ndzi rhumiwe hi Yehovha leswaku ndzi profeta marito hinkwawo lawa mi ma tweke, lama lwisanaka ni yindlu leyi ni muti lowu.+
13 Sweswi hundzulani tindlela ta n’wina ni swiendlo swa n’wina mi yingisa rito ra Yehovha Xikwembu xa n’wina, kutani Yehovha u ta cinca miehleketo* mayelana ni khombo leri a vuleke leswaku u ta mi tisela rona.+
14 Kambe loko ku ri mina ndzi le vokweni ra n’wina. Ndzi endleni swin’wana ni swin’wana leswi mi vonaka swi ri swinene ni leswi lulameke ematihlweni ya n’wina.
15 Kambe swi tiveni leswaku loko mi ndzi dlaya, n’wina ni muti lowu ni vaaki va wona mi ta va ni nandzu wa ku halata ngati leyi nga riki na nandzu, hikuva entiyisweni Yehovha u ndzi rhume eka n’wina leswaku ndzi ta mi byela marito lawa mi ma twaka hinkwawo.”
16 Hiloko tihosana ni vanhu hinkwavo va byela vaprista ni vaprofeta va ku: “Munhu loyi a nga faneriwi hi xigwevo xa rifu, hikuva u vulavule na hina hi vito ra Yehovha Xikwembu xa hina.”
17 Ku engetela kwalaho, vakulukumba van’wana va tiko va suka va yima va sungula ku byela vanhu hinkwavo lava hlengeletaneke va ku:
18 “Mikiya+ wa le Morexeti a a profeta hi nkarhi wa Hosi Hezekiya+ wa le Yuda, kutani u byele vanhu hinkwavo va le Yuda a ku, ‘Yehovha wa mavuthu u ri:
“Siyoni u ta rimiwa ku fana ni nsimu,Yerusalema u ta va ndhundhuma ya marhumbi,+Ntshava ya Yindlu* ya Xikwembu yi ta fana ni tindhawu leti tlakukeke ekhwatini.”’+
19 “Xana Hosi Hezekiya wa le Yuda ni vanhu hinkwavo va le Yuda va n’wi dlayile? Xana hosi a yi n’wi chavanga Yehovha kutani yi kombela Yehovha hi ku titsongahata leswaku a yi komba tintswalo lerova Yehovha a cinca miehleketo* a nga ha ri tisi khombo leri a vuleke leswaku u ta va tisela rona?+ Hikwalaho hi le kusuhi ni ku tivangela khombo lerikulu.
20 “A ku ri ni munhu un’wana loyi a a profeta hi vito ra Yehovha, Yuriya n’wana wa Xemaya wa le Kiriyati-yeyarimi+ loyi a profeteke leswi lwisanaka ni muti lowu ni tiko leri hi marito yo fana ni ya Yeremiya.
21 Hosi Yoyakimi+ ni vavanuna vakwe hinkwavo va matimba ni tihosana hinkwato va twe marito yakwe, hiloko hosi yi lava ku n’wi dlaya.+ Loko Yuriya a swi twa, a namba a sungula ku chava kutani a balekela eEgipta.
22 Kutani Hosi Yoyakimi a rhuma Elinathani+ n’wana wa Akibora ni vavanuna van’wana va ya eEgipta.
23 Va teke Yuriya eEgipta va n’wi yisa eka Hosi Yoyakimi, loyi a nga fika a n’wi dlaya hi banga+ kutani a lahla ntsumbu wakwe emasirheni lawa ku lahliwaka mani na mani.”
24 Kambe Ahikama+ n’wana wa Xafani+ u seketele Yeremiya, lerova a nga nyiketiwanga eka vanhu leswaku va n’wi dlaya.+
Tinhlamuselo ta le hansi
^ Vona Tinhlamuselo.
^ Kumbe “khinsama.”
^ Kumbe “tisola.”
^ Kumbe “xileriso.”
^ Hi Xiheveru, “pfukaka nimpundzu ndzi ma rhuma.”
^ Kumbe “tisola.”
^ Kumbe “ntshava ya tempele.”
^ Kumbe “tisola.”
