Yeremiya 28:1-17
-
Yeremiya na Hananiya muprofeta wa mavunwa (1-17)
28 Hi lembe rero, eku sunguleni ka ku fuma ka Hosi Sedekiyasi+ wa le Yuda, hi lembe ra vumune, hi n’hweti ya vuntlhanu, muprofeta Hananiya n’wana wa Azuri loyi a humaka eGibiyoni,+ u vulavule na mina endlwini ya Yehovha emahlweni ka vaprista ni vanhu hinkwavo a ku:
2 “Yehovha wa mavuthu, Xikwembu xa Israyele u ri, ‘Ndzi ta tshova joko ra hosi ya Babilona.+
3 Ku nga si hela malembe mambirhi ndzi ta tlherisela swibya hinkwaswo swa yindlu ya Yehovha endhawini leyi, leswi Hosi Nebukadnetsara wa le Babilona a swi tekeke endhawini leyi a swi yisa eBabilona.’”+
4 “‘Ndzi ta tlherisela Yekoniya+ n’wana wa Yoyakimi+ hosi ya le Yuda endhawini leyi ni mahlonga hinkwawo ya le Yuda lama yeke eBabilona,’+ ku vula Yehovha, ‘hikuva ndzi ta tshova joko ra hosi ya le Babilona.’”
5 Kutani muprofeta Yeremiya a vulavula na muprofeta Hananiya emahlweni ka vaprista ni vanhu hinkwavo lava a va yime endlwini ya Yehovha.
6 Muprofeta Yeremiya a ku: “Amen!* Onge Yehovha a nga endla tano! Onge Yehovha a nga endla leswi u swi profeteke hi ku va a tlherisela swibya swa yindlu ya Yehovha endhawini leyi ni vanhu hinkwavo lava nga mahlonga eBabilona!
7 Hambiswiritano, ndzi kombela u yingisa rungula leri ndzi ku byelaka rona wena ni vanhu hinkwavo.
8 Vaprofeta lava a va ri kona emahlweni ka mina na wena khale swinene, a va profeta mayelana ni matiko yo tala ni mifumo leyikulu, hi nyimpi, hi khombo ni hi ntungu.*
9 Loko muprofeta a vula leswaku ku ta va ni ku rhula ivi rito ra muprofeta yoloye ri hetiseka, swi ta tiviwa leswaku Yehovha hi yena la rhumeke muprofeta loyi hakunene.”
10 Hiloko muprofeta Hananiya a susa joko enhan’wini ya muprofeta Yeremiya a ri tshova.+
11 Kutani Hananiya a vula leswi emahlweni ka vanhu hinkwavo: “Yehovha u ri, ‘Ndzi ta ri tshova hi ndlela leyi joko ra Hosi Nebukadnetsara wa le Babilona etinhan’wini ta matiko hinkwawo ku nga si hela malembe mambirhi.’”+ Hiloko muprofeta Yeremiya a famba.
12 Endzhaku ka loko muprofeta Hananiya a tshove joko enhan’wini ya muprofeta Yeremiya, rungula leri humaka eka Yehovha ri fika eka Yeremiya ri ku:
13 “Famba u ya byela Hananiya u ku, ‘Yehovha u ri: “U tshove majoko ya timhandzi+ kambe ematshan’weni ya wona u ta endla majoko ya nsimbhi.”
14 Hikuva Yehovha wa mavuthu, Xikwembu xa Israyele u ri: “Ndzi ta veka joko ra nsimbhi enhan’wini ya matiko lawa hinkwawo leswaku ma tirhela Hosi Nebukadnetsara wa le Babilona, ma fanele ma n’wi tirhela.+ Ndzi ta n’wi nyika hambi ku ri swiharhi.”’”+
15 Kutani muprofeta Yeremiya a byela muprofeta Hananiya+ a ku: “Ndzi kombela u yingisa, wena Hananiya! Yehovha a nga ku rhumanga kambe wena u endle leswaku vanhu lava va tshemba mavunwa.+
16 Hikwalaho Yehovha u ri, ‘Waswivo! Ndza ku susa emisaveni. Lembe leri u ta fa hikuva u dyondzise vanhu ku xandzukela Yehovha.’”+
17 Hiloko muprofeta Hananiya a fa hi lembe rero hi n’hweti ya vunkombo.
