Yeremiya 3:1-25
3 Vanhu va vutisa: “Loko munhu o fambisa nsati wakwe, kutani a ya va nsati wa wanuna un’wana, xana wanuna loyi u fanele a tlhelela eka yena?”
Xana tiko rero a ri thyakisiwanga hi ku helela?+
“U endle vunghwavava ni vanghana va wena vo tala,+Xana u fanele u tlhelela eka mina?” ku vula Yehovha.
2 “Languta eswintshabyanini, u vona.
Xana hi kwihi laha u nga pfinyiwangiki kona?
U va tshamele etlhelo ka tindlela,Ku fana ni mutsendzeleki* emananga.
U tshamela ku thyakisa tiko
Hi vunghwavava bya wena ni vubihi bya wena.+
3 Hikwalaho timpfula ti siveriwile,+A ku nanga mpfula hi ximun’wana.
U ni xivindzi ku fana ni wansati loyi a endlaka vunghwavava;A wu na tingana.+
4 Kambe sweswi u huwelela eka mina u ku,‘Tatana, wena u munghana wa mina ku sukela evuntshweni bya mina!+
5 Xana munhu u fanele ku tshama a karihile hilaha ku nga heriki,Kumbe a tshama a ri ni xikhomela?’
Wena u vula sweswo,Kambe u tshamela ku endla swilo swo biha leswi u swi kotaka.”+
6 Hi nkarhi wa ku fuma ka Hosi Yosiya,+ Yehovha u vulavule na mina a ku: “Xana u swi vonile leswi Israyele la nga tshembekiki a swi endleke? U fambe ehenhla ka ntshava yin’wana ni yin’wana leyi tlakukeke ni le hansi ka murhi wun’wana ni wun’wana lowukulu, a endla vunghwavava.+
7 Hambiloko a endle swilo leswi hinkwaswo, a ndzi tshamela ku n’wi byela leswaku a tlhelela eka mina+ kambe a nga tlhelelanga; naswona Yuda a a tshamela ku languta makwavo wakwe wa xisati loyi a kanganyisaka.+
8 Loko ndzi vona sweswo, ndzi fambise Israyele la nga tshembekiki, ndzi n’wi nyika papila ro dlaya vukati+ hikwalaho ka leswi a endleke vuoswi.+ Kambe makwavo wa xisati, Yuda loyi a kanganyisaka a nga chavanga; na yena u fambe a ya endla vunghwavava.+
9 Vunghwavava byakwe u byi teke ku nga ri nchumu lowukulu, u ye emahlweni a endla vuoswi ni maribye ni mirhi.+
10 Hambileswi ku endlekeke swilo leswi hinkwaswo, Yuda makwavo wa xisati loyi a kanganyisaka a nga tlhelelanga eka mina hi mbilu hinkwayo kambe u lo endla onge u tlhelela eka mina,’ ku vula Yehovha.”
11 Kutani Yehovha a ku eka mina: “Israyele loyi a nga tshembekiki u tikombise a ri loyi a lulameke ku tlula Yuda loyi a kanganyisaka.+
12 Famba u ya vula marito lawa en’walungwini:+
“‘“Vuya, wena Israyele wo xandzuka,” ku vula Yehovha.’+ ‘“A ndzi nge ku hlundzukeli,+ hikuva ndza tshembeka,” ku vula Yehovha.’ ‘“A ndzi nge karihi hilaha ku nga heriki.
13 Ntsena xiya xihoxo xa wena hikuva u xandzukele Yehovha Xikwembu xa wena. U ye emahlweni u endla vunghwavava ni vafambi* ehansi ka murhi wun’wana ni wun’wana lowukulu, kambe a wu ri yingisanga rito ra mina,” ku vula Yehovha.’”
14 “Vuyani, n’wina vana lava xandzukeke,” ku vula Yehovha. “Hikuva ndzi n’wini* wa n’wina wa xiviri; ndzi ta mi teka, un’we emutini na vambirhi endyangwini naswona ndzi ta mi tisa eSiyoni.+
15 Ndzi ta mi nyika varisi lava tsakisaka mbilu ya mina+ naswona va ta mi wundla hi vutivi ni ku twisisa.
16 Mi ta tala naswona mi ta tswala mihandzu etikweni emasikwini wolawo,” ku vula Yehovha.+ “A va nge he vuli va ku, ‘Areka ya ntwanano wa Yehovha!’ A va nge he yi ehleketi, a va nge he yi tsundzuki kumbe ku yi navela naswona a yi nge he tlheli yi endliwa.
17 Hi nkarhi wolowo va ta vitana Yerusalema va ku i xiluvelo xa Yehovha;+ matiko hinkwawo ma ta hlengeletiwa leswaku ma dzunisa vito ra Yehovha eYerusalema+ naswona a ma nge he tlheli ma landzela timbilu ta wona to biha.”
18 “Emasikwini wolawo vanhu va Yuda ni va Israyele+ va ta famba swin’we, hinkwavo va ta huma etikweni ra le n’walungwini va ya etikweni leri ndzi ri nyikeke vakokwa wa vona ri va ndzhaka.+
19 A ndzi ku, ‘Ndzi ku veke exikarhi ka vana, ndzi ku nyika tiko ro saseka, ndzhaka yo saseka ngopfu exikarhi ka matiko!’*+ Nakambe a ndzi anakanya leswaku u ta ndzi vitana u ku, ‘Tatana,’ ni leswaku u nge he tshiki ku ndzi landzela.
20 ‘Entiyisweni ku fana ni wansati loyi a tirhisaka vukanganyisi leswaku a tshika nuna* wakwe, na n’wina Vaisrayele mi ndzi kanganyisile,’+ ku vula Yehovha.”
21 Eswintshabyanini ku twale mpfumawulo,Swirilo ni swikombelo swa Vaisrayele,Hikuva va onhe ndlela ya vona;Va rivale Yehovha Xikwembu xa vona.+
22 “Vuyani, n’wina vana lava xandzukeke.
Ndzi ta mi horisa naswona a mi nge he vi lava xandzukeke.”+
“Hi hina lava! Hi te eka wena,Hikuva wena Yehovha, u Xikwembu xa hina.+
23 Entiyisweni swintshabyana ni ku pfilunganyeka loku nga kona etintshaveni i mavunwa.+
Entiyisweni ku ponisiwa ka Israyele ku le ka Yehovha Xikwembu xa hina.+
24 Kambe xilo lexi khomisaka tingana* xi dye ntirho wa matimba wa vakokwa wa hina ku sukela evuntshweni bya hina,+Mintlhambi ya vona ya tinyimpfu ni ya tihomu,Vana va vona va majaha ni va vanhwanyana.
25 A hi etleleni ehansi hikwalaho ka tingana ta hina,Ku tsongahatiwa ka hina a ku hi funengete,Hikuva hi dyohele Yehovha Xikwembu xa hina,+Hina ni vatata wa hina ku sukela evuntshweni bya hina ku ta fikela namuntlha,+A hi n’wi yingisanga Yehovha Xikwembu xa hina.”
Tinhlamuselo ta le hansi
^ Hi Xiheveru, “Muarabiya.”
^ Kumbe “swikwembu swa le matikweni man’wana.”
^ Kumbexana “nuna wa n’wina.”
^ Hi Xiheveru, “ya mavuthu ya matiko.”
^ Hi Xiheveru, “munghana.”
^ Kumbe “xikwembu lexi khomisaka tingana.”
