Yeremiya 34:1-22
34 Rito leri fikeke eka Yeremiya ri huma eka Yehovha, loko Hosi Nebukadnetsara* wa le Babilona ni masocha ya yena hinkwawo ni mifumo hinkwayo ya misava leyi lawuriwaka hi yena ni vanhu hinkwavo va lwa na Yerusalema ni miti hinkwayo ya yena, ri te:+
2 “Yehovha Xikwembu xa Israyele u ri, ‘Famba u ya vulavula na Hosi Sedekiyasi+ wa le Yuda u ku eka yena: “Yehovha u ri, ‘Ndzi nyiketa muti lowu eka hosi ya le Babilona naswona yi ta wu hisa hi ndzilo.+
3 Wena a wu nge baleki evokweni ra yona hikuva u ta khomiwa kutani u nyiketiwa eka yona.+ U ta vona hosi ya le Babilona naswona yi ta vulavula na wena mi langutanile kutani u ta ya eBabilona.’+
4 Kambe, twana leswi Yehovha a swi vulaka wena Hosi Sedekiyasi wa le Yuda, ‘Yehovha u vula leswi hi wena: “A wu nge dlayiwi hi banga.
5 U ta fa hi ku rhula+ naswona va ta ku hisela murhi wa risuna hilaha va endleke hakona eka vatata wa wena, tihosi to sungula leti veke kona emahlweni ka wena, va ta ku rilela va ku, ‘Yoo, n’wini wa hina,’ hikuva ‘ndzi swi vurile,’ ku vula Yehovha.”’”’”
6 Endzhaku ka sweswo, muprofeta Yeremiya a byela Hosi Sedekiyasi wa le Yuda marito lawa hinkwawo eYerusalema,
7 loko masocha ya hosi ya le Babilona ma lwa na Yerusalema ni miti hinkwayo ya Yuda leyi a yi sele,+ ma lwa na Lakixi+ na Azeka;+ hikuva miti yoleyo a ku ri yona ntsena leyi biyeleriweke leyi a yi sele emitini ya Yuda.
8 Rito leri fikeke eka Yeremiya ri huma eka Yehovha endzhaku ka loko Hosi Sedekiyasi a endle ntwanano ni vanhu hinkwavo lava a va ri eYerusalema leswaku a huwelela ntshunxeko eka vona,+
9 leswaku un’wana ni un’wana u fanele a tshunxa mahlonga yakwe ya Vaheveru, ya xinuna ni ya xisati leswaku ku nga vi na munhu loyi a tshamaka ni Muyudakulobye a ri hlonga rakwe.
10 Hiloko tihosana hinkwato ni vanhu hinkwavo va yingisa. A va endle ntwanano wa leswaku un’wana ni un’wana u fanele a tshunxa mahlonga yakwe ya xinuna ni ya xisati a nga ha ma endli mahlonga. Va yingisile kutani va ma tshika ma famba.
11 Hambiswiritano, endzhaku ka nkarhi va landze mahlonga ya xinuna ni ya xisati lawa a va ma tshunxile kutani va tlhela va ma sindzisa ku va mahlonga.
12 Kutani rito ra Yehovha ri fika eka Yeremiya ri huma eka Yehovha ri ku:
13 “Yehovha Xikwembu xa Israyele u ri, ‘Ndzi endle ntwanano ni vakokwa wa n’wina+ hi siku leri ndzi va humeseke ha rona etikweni ra Egipta, endlwini ya vuhlonga,+ ndzi ku:
14 “Loko ku hela malembe ya nkombo, un’wana ni un’wana wa n’wina u fanele a tshunxa makwavo wa Muheveru loyi a xaviseriweke yena, loyi a tirheke malembe ya tsevu; u fanele u n’wi tshika a famba.”+ Kambe vakokwa wa n’wina va arile ku rhiya ndleve va ndzi yingisa.
15 Kutani n’wina ma ha ku cinca tindlela ta n’wina mi endla leswi lulameke ematihlweni ya mina hi ku tshunxa vamakwenu naswona mi endle ntwanano emahlweni ka mina endlwini leyi vitaniwaka hi vito ra mina.
16 Kambe mi tlhele mi cinca tindlela ta n’wina mi thyakisa vito ra mina+ hi ku landza mahlonga ya n’wina ya xinuna ni ya xisati lawa a mi ma tshunxile leswaku ma ya laha ma tsakelaka ku ya kona naswona mi tlhele mi ma sindzisa ku va mahlonga.’
17 “Hikwalaho Yehovha u ri: ‘N’wina a mi ndzi yingisanga hikuva a mi va tshunxanga vamakwenu ni vanhu van’wana.+ Kutani ndzi ta mi tshunxa,’ ku vula Yehovha, ‘loko banga, ntungu* ni ndlala+ swi mi dlaya naswona ndzi ta endla leswaku mifumo hinkwayo ya misava yi chava hikwalaho ka leswi nga ta mi humelela.+
18 Leswi hi leswi swi nga ta endleka eka vanhu lava tluleke ntwanano wa mina hi ku ka va nga ma hlayisi marito ya ntwanano lowu va wu endleke emahlweni ka mina, loko va tsema rhole ri va swiphemu swimbirhi kutani va hundza exikarhi ka swiphemu swa rona,+
19 ku nga, tihosana ta le Yuda, tihosana ta le Yerusalema, vatirhi va le hubyeni, vaprista ni vanhu hinkwavo va tiko lava hundzeke exikarhi ka swiphemu swa rhole:
20 Ndzi ta va nyiketa eka valala va vona ni le ka lava lavaka ku va dlaya naswona mitsumbu ya vona yi ta va swakudya swa swinyenyana ni swa swiharhi.+
21 Ndzi ta nyiketa Hosi Sedekiyasi wa le Yuda ni tihosana ta yena eka valala va vona ni le ka lava lavaka ku va dlaya ni le ka masocha ya hosi ya le Babilona,+ lawa ma tshikaka ku mi hlasela.’+
22 “‘Ndzi humesa xileriso,’ ku vula Yehovha, ‘ndzi ta va tlherisela emutini lowu, va ta lwa na wona, va wu teka kutani va wu hisa hi ndzilo;+ miti ya Yuda ndzi ta yi endla rhumbi, ku nga ha tshami munhu eka yona.’”+
Tinhlamuselo ta le hansi
^ Hi Xiheveru, “Nebukadretsara,” ku nga matsalelo lama hambaneke.
^ Kumbe “vuvabyi.”
