Yeremiya 35:1-19
-
Varekabi va veka xikombiso lexinene xo yingisa (1-19)
35 Rito leri fikeke eka Yeremiya ri huma eka Yehovha emasikwini ya Yoyakimi+ n’wana wa Yosiya, hosi ya le Yuda ri te:
2 “Yana endyangwini wa Varekabi,+ u ya vulavula na vona kutani u va tisa endlwini ya Yehovha eka rin’wana ra makamara yo dyela eka wona; u fika u va nyika vhinyo va nwa.”
3 Hiloko ndzi teka Yazaniya n’wana wa Yeremiya n’wana wa Habaziniya, vamakwavo, vana vakwe hinkwavo va majaha ni ndyangu hinkwawo wa Varekabi,
4 ndzi va tisa endlwini ya Yehovha. Ndzi va nghenisa ekamareni ro dyela eka rona ra vana va Hanani n’wana wa Igidaliya, nandza wa Xikwembu xa ntiyiso, leri a ri ri etlhelo ka kamara ro dyela eka rona ra tihosana, leri a ri ri ehenhla ka kamara ro dyela eka rona ra Maseya n’wana wa Xalumu murindzi wa nyangwa.
5 Hiloko ndzi veka swinwelo leswi teleke vhinyo emahlweni ka vavanuna vandyangu wa Varekabi kutani ndzi ku eka vona: “Nwanani vhinyo.”
6 Kambe va ku: “A hi nge yi nwi vhinyo hikuva Yehonadabu*+ n’wana wa Rekabi, kokwa wa hina u hi lerisile a ku, ‘Mi nga tshuki mi nwa vhinyo, n’wina kumbe vana va n’wina.
7 A mi fanelanga mi aka tiyindlu, mi byala mbewu kumbe mi rima kumbe mi va ni nsimu ya madiriva. Kambe mi fanele mi tshama ematendeni mikarhi hinkwayo leswaku mi ta hanya nkarhi wo leha etikweni leri mi tshamaka eka rona tanihi vafambi.’
8 Hikwalaho hi ya emahlweni hi yingisa rito ra Yehonadabu n’wana wa Rekabi kokwa wa hina eka hinkwaswo leswi a hi leriseke swona, hi ku ka hi nga nwi vhinyo, hina, vasati va hina, vana va hina va majaha ni va vanhwanyana.
9 A hi aki tiyindlu leswaku hi tshama eka tona naswona a hi na masimu ya madiriva kumbe masimu kumbe mbewu.
10 Hi ya emahlweni hi tshama ematendeni naswona hi yingisa hinkwaswo leswi Yehonadabu* kokwa wa hina a hi leriseke swona.
11 Kambe loko Hosi Nebukadnetsara* wa le Babilona a tile ku ta lwa ni tiko,+ hi te, ‘Tanani, a hi ngheneni eYerusalema leswaku hi balekela masocha ya Vakalidiya ni ya Vasiriya,’ kutani sweswi hi tshama eYerusalema.”
12 Yehovha a vulavula na Yeremiya a ku:
13 “Yehovha wa mavuthu, Xikwembu xa Israyele u ri, ‘Famba u ya byela vanhu va le Yuda ni vaaki va le Yerusalema u ku: “Xana nkarhi ni nkarhi a mi nga khutaziwi ku yingisa marito ya mina?”+ ku vula Yehovha.
14 “Yehonadabu n’wana wa Rekabi u lerise vatukulu va yena leswaku va nga nwi vhinyo, kutani va ma yingisile marito ya yena hi ku ka va nga yi nwi ku ta fikela namuntlha, xisweswo va landzela xileriso xa kokwa wa vona.+ Hambiswiritano, ndzi vulavule na n’wina hi ku phindhaphindha* kambe a mi ndzi yingisanga.+
15 A ndzi tshamela ku rhuma malandza ya mina eka n’wina ku nga vaprofeta, ndzi va rhuma hi ku phindhaphindha,*+ ndzi ku, ‘Ndzi kombela mi tshika tindlela ta n’wina to homboloka+ mi endla leswinene! Mi nga landzeli swikwembu swin’wana mi ya swi tirhela. Kutani mi ta ya emahlweni mi tshama etikweni leri ndzi ri nyikeke n’wina ni vakokwa wa n’wina.’+ Kambe a mi ndzi yingisanga.
16 Vatukulu va Yehonadabu n’wana wa Rekabi va yingise xileriso lexi kokwa wa vona a va nyikeke xona,+ kambe vanhu lava a va ndzi yingisanga.”’”
17 “Hikwalaho Yehovha Xikwembu xa mavuthu, Xikwembu xa Israyele u ri: ‘Ndzi tisela Yuda ni vaaki hinkwavo va le Yerusalema khombo leri ndzi va lemukiseke ha rona,+ hikuva ndzi vulavule na vona kambe a va yingisanga, a ndzi tshamela ku va vitana kambe a va hlamulanga.’”+
18 Yeremiya a byela ndyangu wa Varekabi a ku: “Yehovha wa mavuthu, Xikwembu xa Israyele u ri, ‘Leswi mi yingiseke xileriso xa Yehonadabu kokwa wa n’wina naswona mi yaka emahlweni mi yingisa swileriso swa yena hinkwaswo, mi endla leswi a mi leriseke swona,
19 Yehovha wa mavuthu, Xikwembu xa Israyele u ri: “Ku ta tshama ku ri ni ntukulu wa Yehonadabu* n’wana wa Rekabi loyi a ndzi tirhelaka.”’”
Tinhlamuselo ta le hansi
^ Hi Xiheveru, “Yonadabu,” vito leri komisiweke ra Yehonadabu.
^ Hi Xiheveru, “Yonadabu,” vito leri komisiweke ra Yehonadabu.
^ Hi Xiheveru, “Nebukadretsara,” ku nga matsalelo lama hambaneke.
^ Hi Xiheveru, “ndzi pfuke nimpundzu ndzi vulavula.”
^ Hi Xiheveru, “pfuka nimpundzu ndzi va rhuma.”
^ Hi Xiheveru, “Yonadabu,” vito leri komisiweke ra Yehonadabu.
