Yeremiya 37:1-21
37 Hosi Sedekiyasi+ n’wana wa Yosiya a sungula ku fuma ematshan’weni ya Koniya*+ n’wana wa Yoyakimi, hikuva Hosi Nebukadnetsara* wa le Babilona u n’wi endle hosi etikweni ra Yuda.+
2 Kambe Sedekiyasi ni malandza yakwe ni vanhu va tiko a va ma yingisanga marito ya Yehovha lawa a va byeleke wona hi ku tirhisa muprofeta Yeremiya.
3 Hosi Sedekiyasi a rhuma Yehukali+ n’wana wa Xelemiya na Sofaniya+ n’wana wa muprista Maseya va ya eka muprofeta Yeremiya, va fika va ku: “Hi kombela u hi khongelela eka Yehovha Xikwembu xa hina.”
4 Yeremiya a ha swi kota ku fambafamba exikarhi ka vanhu, hikuva a va nga si n’wi pfalela ekhotsweni.+
5 Masocha ya Faro a ma ri eku teni ma huma eEgipta+ kutani Vakalidiya lava a va rhendzele Yerusalema va swi twa. Hiloko va tshika ku hlasela Yerusalema.+
6 Rito ra Yehovha ri fika eka muprofeta Yeremiya ri ku:
7 “Yehovha Xikwembu xa Israyele u ri, ‘Mi fanele mi byela hosi ya le Yuda leyi mi rhumeke eka mina leswaku mi ta ndzi vutisa mi ku: “Vona! Masocha ya Faro lama telaka ku ku pfuna, ma ta boheka ku tlhelela etikweni ra wona eEgipta.+
8 Vakalidiya va ta vuya va ta lwa ni muti lowu va wu hlula va tlhela va wu hisa hi ndzilo.”+
9 Yehovha u ri, “Mi nga tixisi mi ku, ‘Vakalidiya a va nge he vuyi va ta lwa na hina,’ hikuva va ta tlhela va vuya.
10 Hambiloko mo dlaya masocha hinkwawo ya Vakalidiya lama lwaka na n’wina ku sala masocha lama vavisekeke ntsena, ma ta suka ematendeni ya wona ma ta hisa muti lowu hi ndzilo.”’”+
11 Loko masocha ya Vakalidiya ma tshike ku hlasela Yerusalema hikwalaho ka masocha ya Faro,+
12 Yeremiya a suka eYerusalema a ya etikweni ra Benjamini+ leswaku a ya kuma ndhawu yakwe exikarhi ka vanhu va ka vona.
13 Kambe loko a fika eGedeni ya Benjamini, mulanguteri wa varindzi, loyi vito ra yena a ku ri Iraya n’wana wa Xelemiya n’wana wa Hananiya, a khoma muprofeta Yeremiya a ku: “U balekela eka Vakalidiya!”
14 Kambe Yeremiya a ku: “A hi ntiyiso! A ndzi balekeli eka Vakalidiya.” Kambe a nga n’wi yingisanga. Hiloko Iraya a khoma Yeremiya a n’wi yisa eka tihosana.
15 Kutani tihosana ti hlundzukela Yeremiya,+ hiloko ti n’wi ba ti n’wi pfalela*+ endlwini ya Yonatani lowa matsalana, leyi a yi endliwe khotso.
16 Yeremiya a hoxiwa ekhotsweni leri nga munyama,* emakamareni lama nga ehansi ka misava, a tshama kona masiku yo tala.
17 Hosi Sedekiyasi a rhumela rito leswaku a ya vitaniwa, hiloko hosi yi n’wi vutisa swivutiso yi ri yoxe endlwini ya yona.+ Yi ku, “Xana ri kona rito leri humaka eka Yehovha?” Yeremiya a ku, “Ri kona,” a ya emahlweni a ku, “Hosi ya le Babilona yi ta ku hlula!”+
18 Yeremiya a tlhela a vutisa Hosi Sedekiyasi a ku: “Xana ndzi ku dyohele yini, wena ni malandza ya wena ni vanhu lava, lerova mi ndzi pfalela ekhotsweni?
19 Va kwihi vaprofeta va wena lava ku profeteleke va ku, ‘Hosi ya le Babilona a yi nge ti ku ta lwa na wena ni tiko leri’?+
20 Ndzi kombela u ndzi yingisa wena hosi yanga. Ndzi kombela leswaku u ndzi twela vusiwana. U nga ha ndzi tlheriseli endlwini ya matsalana Yonatani,+ handle ka swona ndzi ta fela kona.”+
21 Hiloko Hosi Sedekiyasi a lerisa leswaku Yeremiya a pfaleriwa ekhotsweni leri nga eXivaveni* xa Murindzi+ naswona siku ni siku a a nyikiwa xinkwa xa xirhendzevutana lexi humaka exitarateni xa vabaki,+ ku fikela loko xinkwa xi hela emutini.+ Yeremiya u ye emahlweni a tshama eXivaveni xa Murindzi.
Tinhlamuselo ta le hansi
^ Vito ra yena rin’wana i Yoyakini na Yekoniya.
^ Hi Xiheveru, “Nebukadretsara,” ku nga matsalelo lama hambaneke.
^ Hi Xiheveru, “nghenisa endlwini ya tinsimbhi.”
^ Hi Xiheveru, “endlwini ya xihlovo.”
^ Vona Tinhlamuselo.
