Yeremiya 39:1-18
39 Hi lembe ra vukaye ra ku fuma ka Hosi Sedekiyasi wa Yuda, hi n’hweti ya vukhume, Hosi Nebukadnetsara* wa le Babilona a ta ni masocha yakwe hinkwawo eYerusalema va fika va wu rhendzela.+
2 Hi lembe ra vu-11 ra ku fuma ka Sedekiyasi, hi n’hweti ya vumune hi siku ra vukaye, va boxe khumbi ra muti.+
3 Kutani tihosana hinkwato ta hosi ya le Babilona ti fika ti nghena ti tshama eGedeni ya le Xikarhi,+ ku nga Negala-xarezere Samigara, Nebo-sasekimi Rabusarisi,* Negala-xarezere Rabumaga* ni tihosana letin’wana hinkwato ta hosi ya le Babilona.
4 Loko Hosi Sedekiyasi wa le Yuda ni masocha hinkwawo va va vona, va baleka+ emutini nivusiku hi ndlela leyi hundzaka hi le ntangeni wa hosi, va huma hi gede leyi nga le xikarhi ka makhumbi mambirhi, va famba hi ndlela leyi yaka eAraba.+
5 Kambe masocha ya Vakalidiya ma va hlongorisa, ma kuma Sedekiyasi emananga ya le Yeriko.+ Ma n’wi khoma ma n’wi tisa eka Hosi Nebukadnetsara* wa le Babilona eRibla+ etikweni ra Hamati+ laha a nga fika a n’wi gweva.
6 Hosi ya le Babilona yi teke vana va Sedekiyasi yi va dlaya eRibla a langutile, yi tlhela yi dlaya ni tindhuna hinkwato ta le Yuda.+
7 Hiloko yi dlaya Sedekiyasi matihlo, endzhaku ka sweswo yi n’wi boha hi tinketana ta koporo yi n’wi yisa eBabilona.+
8 Kutani Vakalidiya va hisa yindlu ya hosi ni tiyindlu ta vanhu,+ va mbundzumuxa ni makhumbi ya Yerusalema.+
9 Nebuzaradani+ ndhuna ya varindzi a teka vanhu hinkwavo lava a va sele emutini, lava tinyiketeke eka yena ni lava saleke a va yisa evuhlongeni eBabilona.
10 Kambe Nebuzaradani ndhuna ya varindzi a siya swisiwana, leswi a swi nga ri na nchumu etikweni ra Yuda. Hi siku rero a swi nyika ntirho wo rima masimu ya madiriva ni masimu man’wana.+
11 Hosi Nebukadnetsara* wa le Babilona a nyika Nebuzaradani ndhuna ya varindzi swileriso leswi, leswi khumbaka Yeremiya a ku:
12 “N’wi teke u n’wi hlayisa; u nga n’wi vavisi, n’wi nyike xin’wana ni xin’wana lexi a xi kombelaka.”+
13 Hiloko Nebuzaradani ndhuna ya varindzi, Nebuxazibani Rabusarisi,* Negala-xarezere Rabumaga* ni vakulukumba hinkwavo va hosi ya le Babilona va rhumela vanhu
14 leswaku va ya teka Yeremiya eXivaveni* xa Murindzi+ kutani a nyiketiwa eka Gedaliya+ n’wana wa Ahikama+ n’wana wa Xafani,+ leswaku a tisiwa endlwini yakwe. Kutani a tshama ni vanhu lavan’wana.
15 Loko Yeremiya a ha pfaleriwe eXivaveni xa Murindzi,+ Yehovha a vulavula na yena a ku:
16 “Famba u ya byela Ebedi-meleke+ wa Muetiyopiya u ku, ‘Yehovha wa mavuthu, Xikwembu xa Israyele u ri: “Ndzi endla leswi ndzi swi vuleke hi muti lowu loko ndzi ku ndzi tisa khombo ku nga ri leswinene naswona u ta swi vona swi endleka hi siku rero.”’
17 “‘Kambe ndzi ta ku ponisa hi siku rero, a wu nge nyiketiwi eka vanhu lava u va chavaka,’ ku vula Yehovha.
18 “‘Hikuva ndzi ta ku sirhelela naswona a wu nge dlayiwi hi banga. A wu nge dlayiwi hikwalaho+ ka leswi u ndzi tshembeke,’+ ku vula Yehovha.”
Tinhlamuselo ta le hansi
^ Hi Xiheveru, “Nebukadretsara,” ku nga matsalelo lama hambaneke.
^ Kumbe hi ku ya hi matsemelo yo hambana ya rito eka ndzimana ya Xiheveru, “Negala-xerezere, Samigara-nebo, Sasekimi, Rabusarisi.”
^ Kumbe “ndhuna ya masalamusi (mungoma wa tinyeleti).”
^ Hi Xiheveru, “Nebukadretsara,” ku nga matsalelo lama hambaneke.
^ Hi Xiheveru, “Nebukadretsara,” ku nga matsalelo lama hambaneke.
^ Kumbe “ndhuna ya le hubyeni.”
^ Kumbe “ndhuna ya masalamusi (mungoma wa tinyeleti).”
^ Vona Tinhlamuselo.
