Yeremiya 40:1-16
40 Rito leri fikeke eka Yeremiya ri huma eka Yehovha endzhaku ka loko Nebuzaradani+ ndhuna ya varindzi a n’wi tshunxile eRhama.+ U n’wi yise kwalaho a bohiwe hi tinketana naswona a a ri ni mahlonga hinkwawo ya le Yerusalema ni ya le Yuda, lawa a ma yisiwa eBabilona.
2 Kutani ndhuna ya varindzi yi teka Yeremiya yi ku eka yena: “Yehovha Xikwembu xa wena u swi vule khale leswaku ndhawu leyi yi ta weriwa hi khombo leri,
3 Yehovha u ri tisile hilaha a vuleke hakona hikwalaho ka leswi n’wina mi dyoheleke Yehovha naswona mi nga ri yingisangiki rito ra yena. Hi yona mhaka leyi mi weriweke hi khombo leri.+
4 Namuntlha ndzi tshunxa tinketana leti nga emavokweni ya wena. Loko u swi tsakela ku famba na mina eBabilona, a hi fambe, ndzi ta ku hlayisa. Kambe loko u nga swi lavi ku famba na mina eBabilona sala. Tiko hinkwaro ri le mahlweni ka wena. Yana kun’wana ni kun’wana laha u tsakelaka ku ya kona.”+
5 Loko Yeremiya a ha kanakana ku tlhela, Nebuzaradani a ku: “Tlhelela eka Gedaliya+ n’wana wa Ahikama+ n’wana wa Xafani,+ loyi hosi ya le Babilona yi n’wi hlawuleke leswaku a langutela miti ya Yuda, u tshama na yena ni vanhu lavan’wana; kumbe u ya laha u tsakelaka ku ya kona.”
Kutani ndhuna ya varindzi yi n’wi nyika swakudya ni nyiko, yi n’wi tshika a famba.
6 Hiloko Yeremiya a ya eka Gedaliya n’wana wa Ahikama eMizpa+ kutani a tshama na yena ni vanhu lava a va sele etikweni.
7 Hi ku famba ka nkarhi tindhuna hinkwato ta masocha leti a ti ri enhoveni ni vavanuna lava a va ri na tona, va twa leswaku hosi ya le Babilona yi hlawule Gedaliya n’wana wa Ahikama leswaku a langutela tiko, vavanuna, vavasati ni vana ku nga vanhu hinkwavo va tiko lava nga swisiwana lava nga yisiwangiki eBabilona.+
8 Hiloko va ya eka Gedaliya eMizpa.+ Lava nga ya a ku ri Iximayele+ n’wana wa Nethaniya, Yohanani+ na Yonathani vana va Kariya, Seraya n’wana wa Tanahumeti, vana va Efayi wa le Netofa na Yezaniya+ n’wana wa Mukati swin’we ni vavanuna lava a va ri na vona.
9 Gedaliya n’wana wa Ahikama n’wana wa Xafani a hlambanyela tindhuna ni vanhu va tona a ku: “Mi nga chavi ku tirhela Vakalidiya. Tshamani etikweni, mi tirhela hosi ya Babilona, kutani swi ta mi fambela kahle.+
10 Mina ndzi ta tshama eMizpa leswaku ndzi va muyimeri wa n’wina eka* Vakalidiya lava taka eka hina. Kambe n’wina mi fanele mi hlengeleta mihandzu ya ximumu ni mafurha mi endla ni vhinyo, mi swi veka eswibyeni swa n’wina, mi tshama emitini leyi mi yi tekeke.”+
11 Vayuda hinkwavo lava a va ri eMowabu, eAmoni ni le Edomu swin’we ni lava a va ri ematikweni laman’wana hinkwawo, na vona va twe leswaku hosi ya le Babilona yi pfumelele leswaku vanhu van’wana va sala eYuda ni leswaku yi hlawule Gedaliya n’wana wa Ahikama n’wana wa Xafani leswaku a va murhangeri wa vona.
12 Hiloko Vayuda hinkwavo va sungula ku vuya hi le tindhawini hinkwato leti a va hangalakele eka tona, va te etikweni ra Yuda eka Gedaliya eMizpa. Va hlengeleta mihandzu yo tala ngopfu ya ximumu va endla ni vhinyo yo tala.
13 Yohanani n’wana wa Kariya ni tindhuna hinkwato ta masocha leti a ti ri enhoveni, va ta eka Gedaliya eMizpa.
14 Va fika va ku eka yena: “Xana a wu swi tivi leswaku Balisi hosi ya Vaamoni,+ u rhume Iximayele n’wana wa Nethaniya leswaku a ta ku dlaya?”+ Kambe Gedaliya n’wana wa Ahikama a nga va tshembanga.
15 Kutani Yohanani n’wana wa Kariya a byela Gedaliya exihundleni eMizpa a ku: “Ndzi lava ku ya dlaya Iximayele n’wana wa Nethaniya naswona a ku na munhu loyi a nga ta swi tiva. Hikwalaho ka yini a fanele a ku dlaya naswona hikwalaho ka yini vanhu hinkwavo va le Yuda lava hlengeletiweke va fanele va hangalasiwa ni vanhu lava saleke va le Yuda va lovisiwa?”
16 Kambe Gedaliya+ n’wana wa Ahikama a byela Yohanani n’wana wa Kariya a ku: “U nga swi endli sweswo hikuva leswi u swi vulaka hi Iximayele a hi ntiyiso.”
Tinhlamuselo ta le hansi
^ Hi Xiheveru, “yima emahlweni ka.”
