Yeremiya 41:1-18
41 Hi n’hweti ya vunkombo, Iximayele+ n’wana wa Nethaniya n’wana wa Elixama loyi a a ri n’wana wa le vuhosini naswona a a ri un’wana wa vakulukumba lava a va tshembiwa hi hosi, a ta ni vavanuna va khume eka Gedaliya n’wana wa Ahikama eMizpa.+ Loko va ha ri eku dyeni swin’we eMizpa,
2 Iximayele n’wana wa Nethaniya ni vavanuna va khume lava a va ri na yena va suka va yima va dlaya Gedaliya n’wana wa Ahikama n’wana wa Xafani hi banga. A dlaya loyi hosi ya le Babilona yi n’wi hlawuleke leswaku a va mulanguteri wa tiko.
3 Iximayele u tlhele a dlaya ni Vayuda hinkwavo lava a va ri na Gedaliya eMizpa ni masocha ya Vakalidiya lawa a ma ri kwalaho.
4 Hi siku ra vumbirhi endzhaku ka ku dlayiwa ka Gedaliya, loko mhaka leyi yi nga si tiviwa hi munhu,
5 ku te vavanuna va 80 lava humaka eXikeme,+ eXilo+ ni le Samariya.+ A va tsemete malepfu, va handzule swiambalo swa vona hi le xikarhi, va tixekelerile+ naswona va khome magandzelo ya mavele ni murhi wa risuna+ leswaku va swi tisa endlwini ya Yehovha.
6 Kutani Iximayele n’wana wa Nethaniya a suka eMizpa a ya va hlanganisa, a famba a ri karhi a rila. Loko a hlangana na vona a ku: “Tanani eka Gedaliya n’wana wa Ahikama.”
7 Kambe loko va fika emutini, Iximayele n’wana wa Nethaniya ni vavanuna lava a va ri na yena va va dlayile, va va lahlela exihlobyeni.
8 Kambe a ku ri ni vavanuna va khume exikarhi ka vona lava nga byela Iximayele va ku: “U nga hi dlayi hikuva hi ni ndhawu leyi hi fihleke eka yona koroni, maxalana, mafurha ni vulombe enhoveni.” Hiloko a nga va dlayi swin’we ni vamakwavo.
9 Iximayele a lahlela mitsumbu hinkwayo ya vavanuna lava a va dlayeke exihlobyeni lexikulu lexi endliweke hi Hosi Asa hikwalaho ka Hosi Baxa wa le Israyele.+ Xihlovo lexi hi xona lexi Iximayele n’wana wa Nethaniya a nga xi tata hi vavanuna lava dlayiweke.
10 Iximayele a teka vanhu hinkwavo lava saleke eMizpa+ a va endla mahlonga, ku katsa ni vana va vanhwanyana va hosi ni vanhu hinkwavo lava a va sale eMizpa, lava Nebuzaradani ndhuna ya varindzi a va pfaleleke ekhotsweni ra Gedaliya+ n’wana wa Ahikama. Iximayele n’wana wa Nethaniya u va endle mahlonga kutani a tsemakanya a ya eka Vaamoni.+
11 Loko Yohanani+ n’wana wa Kariya ni tindhuna hinkwato ta masocha leti a ti ri na yena va twa vubihi hinkwabyo lebyi endliweke hi Iximayele n’wana wa Nethaniya,
12 va teka vavanuna hinkwavo va famba va ya lwa na Iximayele n’wana wa Nethaniya kutani va n’wi kuma ekusuhi ni mati yo tala* eGibiyoni.
13 Vanhu hinkwavo lava a va ri na Iximayele va tsakile loko va vona Yohanani n’wana wa Kariya ni tindhuna hinkwato ta masocha leti a ti ri na yena.
14 Kutani vanhu hinkwavo lava Iximayele a va endleke mahlonga ku sukela eMizpa+ va ya eka Yohanani n’wana wa Kariya.
15 Kambe Iximayele n’wana wa Nethaniya ni vavanuna vakwe va nhungu va balekela Yohanani va ya eka Vaamoni.
16 Yohanani n’wana wa Kariya ni tindhuna hinkwato ta masocha leti a ti ri na yena va teka vanhu hinkwavo lava humaka eMizpa lava nga va tshunxa eka Iximayele n’wana wa Nethaniya, endzhaku ka loko a dlaye Gedaliya+ n’wana wa Ahikama. Va tisa vavanuna, masocha, vavasati, vana ni vatirhi va le hubyeni ku suka eGibiyoni.
17 Hiloko va famba va ya tshama endhawini ya vaendzi ya Kimihama ekusuhi na Betlehema,+ hi xikongomelo xo ya nghena eEgipta+
18 hikwalaho ka Vakalidiya. Hikuva a va va chava, tanihi leswi Iximayele n’wana wa Nethaniya a dlayeke Gedaliya n’wana wa Ahikama, loyi hosi ya le Babilona a yi n’wi hlawule leswaku a langutela tiko.+
Tinhlamuselo ta le hansi
^ Kumbexana “tiva lerikulu.”
