Yeremiya 42:1-22
42 Kutani tindhuna hinkwato ta masocha, Yohanani+ n’wana wa Kariya, Yezaniya n’wana wa Hoxaya ni vanhu hinkwavo, ku sukela eka lontsongo ku ya eka lonkulu, va tshinela
2 va byela muprofeta Yeremiya va ku: “Hi kombela leswaku u yingisa xikombelo xa hina xo kombiwa tintswalo, u hi khongelela eka Yehovha Xikwembu xa wena hikwalaho ka vanhu lava hinkwavo lava saleke, hikuva ku sale vanhu vatsongo+ hilaha u swi vonaka hakona.
3 Onge Yehovha Xikwembu xa wena a nga hi byela ndlela leyi hi faneleke hi famba ha yona ni leswi hi faneleke hi swi endla.”
4 Muprofeta Yeremiya a va hlamula a ku: “Ndzi mi twile, ndzi ta khongela eka Yehovha Xikwembu xa n’wina hilaha mi ndzi kombeleke hakona; kutani leswi Yehovha a nga ta swi vula ndzi ta mi byela swona. A ndzi nge mi fihleli nchumu.”
5 Va hlamula Yeremiya va ku: “Onge Yehovha a nga va mbhoni ya ntiyiso ni yo tshembeka naswona onge Yehovha Xikwembu xa wena a nga hi xupula loko hi nga endli leswi a swi vulaka hi ku tirhisa wena.
6 Hambi swa hi tsakisa kumbe a swi hi tsakisi, hi ta yingisa leswi Yehovha Xikwembu xa hina loyi hi ku rhumaka eka yena a nga ta swi vula, leswaku swilo swi hi fambela kahle hikwalaho ka leswi hi yingisaka rito ra Yehovha Xikwembu xa hina.”
7 Endzhaku ka masiku ya khume Yehovha a vulavula na Yeremiya.
8 Hiloko a vitana Yohanani n’wana wa Kariya ni tindhuna hinkwato ta masocha leti a ti ri na yena swin’we ni vanhu hinkwavo, ku sukela eka lontsongo ku ya eka lonkulu.+
9 A ku eka vona: “Yehovha Xikwembu xa Israyele loyi mi ndzi rhumeke eka yena leswaku ndzi kombela leswaku a mi komba tintswalo u ri:
10 ‘Loko hakunene mo tshama etikweni leri, ndzi ta mi aka a ndzi nge mi hirimuxi, ndzi ta mi byala a ndzi nge mi simuli, ndzi ta tisola* hikwalaho ka khombo leri ndzi mi tiseleke rona.+
11 Mi nga yi chavi hosi ya le Babilona leyi mi yi chavaka.’+
“‘Mi nga yi chavi,’ ku vula Yehovha, ‘hikuva ndzi na n’wina leswaku ndzi mi ponisa ni ku mi kutsula eka yona.
12 Ndzi ta mi komba tintswalo+ naswona yona yi ta va ni tintswalo eka n’wina, yi mi tlherisela etikweni ra n’wina.
13 “‘Kambe loko mi ku, “E-e, a hi nge tshami etikweni leri,” naswona mi nga ri yingisi rito ra Yehovha Xikwembu xa n’wina
14 hi ku vula mi ku, “E-e, hi ta ya etikweni ra Egipta,+ laha hi nga ta ka hi nga yi voni nyimpi kumbe hi twa nanga kumbe hi khomiwa hi ndlala hikwalaho ko pfumala xinkwa; kwalaho hi kona laha hi nga ta tshama kona,”
15 hikwalaho yingisani rito ra Yehovha, n’wina masalela ya Yuda. Yehovha wa mavuthu, Xikwembu xa Israyele u ri: “Loko mi tiyimisele ku ya eEgipta leswaku mi ya tshama* kona,
16 kutani banga leri mi ri chavaka ri ta mi kuma etikweni ra Egipta ni ndlala leyi mi yi chavaka yi ta mi landzelela eEgipta, mi ta fela kona.+
17 Vanhu hinkwavo lava tiyimiseleke ku ya eEgipta leswaku va ya tshama kona, va ta dlayiwa hi banga, hi ndlala ni hi ntungu.* A nga kona loyi a nga ta pona kumbe ku balekela khombo leri ndzi nga ta va tisela rona.”’
18 “Hikuva Yehovha wa mavuthu, Xikwembu xa Israyele u ri: ‘Hilaha ku hlundzuka ka mina ni vukarhi bya mina swi chuluriweke hakona ehenhla ka vanhu va le Yerusalema,+ ndzi ta chululela vukarhi bya mina ehenhla ka n’wina loko mo ya eEgipta, kutani vanhu va ta mi rhukana, va mi nyenya ni ku mi sandza+ naswona a mi nge he tlheli mi yi vona ndhawu leyi.’
19 “Yehovha u vulavule na n’wina, n’wina vanhu va le Yuda lava saleke. Mi nga yi eEgipta. Mi fanele mi swi tiva leswaku namuntlha ndzi mi lemukisile
20 leswaku xihoxo xa n’wina xi ta endla leswaku mi fa. Hikuva mi ndzi rhume eka Yehovha Xikwembu xa n’wina mi ku, ‘Hi khongelele eka Yehovha Xikwembu xa hina, u hi byela hinkwaswo leswi Yehovha Xikwembu xa hina a swi vulaka kutani hi ta swi endla.’+
21 Namuntlha ndzi mi byerile kambe a mi nge ri yingisi rito ra Yehovha Xikwembu xa n’wina kumbe mi endla xin’wana ni xin’wana lexi a ndzi rhumeke leswaku ndzi mi byela xona.+
22 Hikwalaho tivani leswaku mi ta dlayiwa hi banga, hi ndlala ni hi ntungu endhawini leyi mi lavaka ku ya eka yona mi ya tshama eka yona.”+
