Yeremiya 43:1-13
43 Loko Yeremiya a heta ku byela vanhu hinkwavo marito lawa hinkwawo lama humaka eka Yehovha Xikwembu xa vona, ku nga rito rin’wana ni rin’wana leri Yehovha Xikwembu xa vona a n’wi rhumeke leswaku a va byela rona,
2 Azariya n’wana Hoxaya, Yohanani+ n’wana Kariya ni vavanuna hinkwavo lava tikukumuxaka va byela Yeremiya va ku: “Leswi u swi vulaka i mavunwa! Yehovha Xikwembu xa hina a nga ku rhumanga leswaku u ku, ‘Mi nga yi eEgipta mi ya tshama kona.’
3 Kambe u kuceteriwa hi Baruku+ n’wana wa Neriya leswaku hi nyiketiwa eka Vakalidiya, leswaku va hi dlaya kumbe va hi yisa evuhlongeni eBabilona.”+
4 Yohanani n’wana wa Kariya ni tindhuna hinkwato ta masocha ni vanhu hinkwavo a va ri yingisanga rito ra Yehovha ra leswaku va tshama etikweni ra Yuda.
5 Kambe Yohanani n’wana wa Kariya ni tindhuna hinkwato ta masocha va teke vanhu hinkwavo lava saleke va le Yuda lava vuyeke leswaku va ta tshama etikweni va huma ematikweni hinkwawo lawa a va hangalakele eka wona va famba na vona.+
6 Va teke vavanuna, vavasati, vana, vana va vanhwanyana va hosi ni vanhu hinkwavo lava Nebuzaradani+ ndhuna ya varindzi a va siyeke na Gedaliya+ n’wana wa Ahikama+ n’wana wa Xafani,+ swin’we na muprofeta Yeremiya na Baruku n’wana wa Neriya.
7 Va ya etikweni ra Egipta hikuva a va ri yingisanga rito ra Yehovha, kutani va fika eTahapenese.+
8 Hiloko Yehovha a vulavula na Yeremiya eTahapenese a ku:
9 “Teka maribye lamakulu, u ma fihla endhawini leyi andlariweke hi switina u ma funengeta hi ridaka ro aka ha rona enyangweni ya yindlu ya Faro eTahapenese, vavanuna va Vayuda va ri karhi va ku langutile.
10 Kutani u ku eka vona, ‘Yehovha wa mavuthu, Xikwembu xa Israyele u ri: “Ndzi vitana Nebukadnetsara* hosi ya le Babilona, nandza wa mina+ naswona ndzi ta veka xiluvelo xakwe ehenhla ka maribye lawa, lawa ndzi ma fihleke, kutani u ta ndlandlamuxa tende rakwe ra vuhosi ehenhla ka wona.+
11 U ta fika a hlasela tiko ra Egipta.+ Loyi a faneriwaka hi ntungu u ta dlayiwa hi ntungu, loyi a faneriwaka hi vuhlonga u ta yisiwa evuhlongeni kasi loyi a faneriwaka hi banga u ta dlayiwa hi banga.+
12 Ndzi ta hisa tiyindlu* ta swikwembu swa le Egipta hi ndzilo,+ hosi yoleyo yi ta hisa tiyindlu ta swikwembu sweswo kutani yi swi yisa evuhlongeni. Yi ta titsondzela hi tiko ra Egipta hilaha murisi a titsondzelaka nguvu yakwe hakona, kutani yi ta suka kwalaho hi ku rhula.*
13 Yi ta faya tiphuphu ta Beta-xemexe* etikweni ra Egipta naswona yi ta hisa tiyindlu* ta swikwembu swa le Egipta hi ndzilo.”’”
Tinhlamuselo ta le hansi
^ Hi Xiheveru, “Nebukadretsara,” ku nga matsalelo lama hambaneke.
^ Kumbe “titempele.”
^ Kumbe “yi nga vavisekanga.”
^ Kumbe “Yindlu (Tempele) ya Dyambu,” ku nga Heliyopolisi.
^ Kumbe “titempele.”
