Yeremiya 48:1-47
-
Vuprofeta mayelana na Mowabu (1-47)
48 Eka Mowabu,+ Yehovha wa mavuthu, Xikwembu xa Israyele u ri:
“Khombo eka Nebo+ hikuva u herisiwile!
Kiriyatayimi+ u khomisiwe tingana, a khomiwa.
Vutumbelo* lebyi sirhelelekeke byi khomisiwe tingana byi hirimuxiwa.+
2 A va ha n’wi dzunisi Mowabu.
Va n’wi bohele makungu ya ku n’wi wisa eHexiboni+ va ku:
‘Tanani, a hi n’wi heriseni a nga ha vi tiko.’
Na wena Mademeni, u fanele u miyela,Hikuva banga ra ku landzela.
3 Ku twala xirilo eHoronayima,+Xa ku lovisiwa ni ku wa lokukulu.
4 Mowabu u lovisiwile.
Vana vakwe va rila.
5 Va rila va ri karhi va tlhandluka endleleni leyi yaka eLuhiti.
Kasi endleleni yo rhelela eHoronayima va twa vanhu va rila hikwalaho ka khombo.+
6 Balekani mi ponisa vutomi bya n’wina!
Mi fanele mi fana ni murhi wa yunipa emananga.
7 Hikwalaho ka leswi mi tshembaka mitirho ya n’wina ni xuma xa n’wina,Na n’wina mi ta khomiwa.
Kemoxi+ u ta ya evuhlongeni,Swin’we ni vaprista ni tihosana ta yena.
8 Loyi a lovisaka u ta nghena emutini wun’wana ni wun’wana,A wu kona muti lowu nga ta pona.+
Nkova wu ta nyamalala,Tiko leri nga rivala ri ta herisiwa, hilaha Yehovha a vuleke hakona.
9 Vekelani Mowabu mfungho,Hikuva loko a endliwa rhumbi u ta baleka,Miti ya yena yi ta va nchumu lowu chavisaka,A yi nge he vi na vaaki.+
10 A ku rhukaniwe loyi a endlaka ntirho wa Yehovha leswaku a hetisa nawu!
A ku rhukaniwe loyi a sivelaka banga rakwe leswaku ri nga dlayi!
11 Vamowabu a va kavanyetiwanga ku sukela evuntshweni bya vona,Ku fana ni vhinyo leyi dzikeke.
A va chululeriwanga eswibyeni swin’wana,A va si tshama va yisiwa evuhlongeni.
Hi yona mhaka leyi nantswo wa vona wu nga cincangiki,Ni nun’hwelo wa vona wu nga cincangiki.
12 “‘Hikwalaho, masiku ma ta,’ ku vula Yehovha, ‘lawa ndzi nga ta rhuma vanhu leswaku va ya va halata. Va ta va halata va gungundza swibya swa vona naswona va ta fayetela makhuwana ya vona.
13 Vamowabu va ta khomiwa hi tingana hikwalaho ka Kemoxi, hilaha Vaisrayele va khomiweke hi tingana hakona hikwalaho ka Bethele leyi a va yi tshembile.+
14 Mi vurisa ku yini mi ku: “Hi tinhenha ta matimba leti lunghekeleke nyimpi”?’+
15 ‘Mowabu u lovisiwile,Miti yakwe yi hlaseriwile,+Majaha ya vona lama nga ni matimba ma dlayiwile,’+Ku vula Hosi, leyi vito ra yona ku nga Yehovha wa mavuthu.+
16 Khombo ra Vamowabu ri ta fika ku nga ri khale,Ni ku wa ka vona ku le ku teni hi xihatla.+
17 Hinkwavo lava akelaneke na vona va ta va twela vusiwana,Hinkwavo lava tivaka vito ra vona.
Va byeleni mi ku: ‘Vona ndlela leyi nhonga ya matimba yi tshoviweke ha yona, nhonga ya ku saseka!’
18 Xika eku vangameni ka wena,U tshama ehansi u khomiwe hi torha,* wena nhwanyana la tshamaka eDiboni,+Hikuva loyi a lovisaka wa le Mowabu u tile leswaku a ta lwa na wena,Tindhawu ta wena leti biyeleriweke u ta ti endla rhumbi.+
19 Yima etlhelo ka patu u languta, wena muaki wa le Arowere.+
Vutisa wanuna ni wansati lava balekaka u ku, ‘Ku endleke yini?’
20 Mowabu u khomisiwe tingana naswona u khomiwe hi ku chava.
Rilani mi huwelela.
Vulani mi ri eArinoni+ leswaku Mowabu u lovisiwile.
21 “Ku avanyisiwe tiko leri nga rivala,+ Holoni, Yahasa+ na Mefati;+
22 Diboni,+ Nebo+ na Beta-diblatayimi;
23 Kiriyatayimi,+ Beta-gamulu na Beta-meyoni;+
24 Keriyoti+ na Bosira; ni miti hinkwayo ya tiko ra Mowabu, leyi nga le kule ni leyi nga ekusuhi.
25 ‘Matimba* ya Mowabu ma tsemiwile;Voko ra yena ri tshoviwile,’ ku vula Yehovha.
26 ‘N’wi dakwiseni,+ hikuva u tikurisile eka Yehovha.+
Mowabu u puluvundza emahlanteni yakwe,Naswona vanhu va n’wi hleka.
27 Xana a wu nga n’wi hleki Israyele?+
Xana Israyele u kumeke exikarhi ka makhambaLerova u hlakahla nhloko ni ku n’wi hlasela hi marito?
28 Siyani miti mi ya tshama eribyeni, n’wina vaaki va Mowabu,Mi fana ni tuva leri akaka xisaka xa rona etlhelo ka nkova.’”
29 “Hi twile hi ta manyunyu ya Mowabu—u titlakusa ngopfu—
Hi ku tinyungubyisa kakwe, manyunyu yakwe, ku titlakusa kakwe ni ku tikurisa ka mbilu yakwe.”+
30 “‘Ndzi tiva ku hlundzuka ka yena,’ ku vula Yehovha,‘Kambe leswi a swi vulaka a swi nge humeleli.
A va nge endli nchumu.
31 Hi yona mhaka leyi ndzi nga ta rilela Mowabu,Ndzi ta huwelela hikwalaho ka Mowabu
Ndzi rilela vavanuna va le Kiri-heresi.+
32 Wena murhi wa madiriva wa Sibma+ ndzi ta ku rilela,Ku tlula ndlela leyi Yazere+ a rileriweke ha yona.
Swihluke swa wena leswi kulaka swi tsemakanye lwandle.
Swi hundze lwandle swi fika eYazere.
Loyi a lovisaka u xikele+Ehenhla ka mihandzu ya wena ya ximumu ni le henhla ka madiriva ya wena lama tshoveriweke.
33 Ku tsaka ku susiwile entangeni wa mihandzu
Ni le tikweni ra Mowabu.+
Ndzi endle leswaku vhinyo yi nga ha khuluki endhawini leyi yi kameriwaka eka yona.
A nga kona loyi a nga ta pyanya a ri karhi a huwelela hi ku tsaka.
Ku ta va ni ku huwelela ka xirilo.’”+
34 “‘Ku ni xirilo ku sukela eHexiboni+ ku ya fika eEliyale.+
Va huwelela ku ya fika eYahasa,+Ku sukela eSowara ku ya fika eHoronayima,+ ku ya fika eEgilata-xelixiya.
Hambi ku ri mati ya Nimirimi ma ta phya.+
35 Ndzi ta herisa loyi a tisaka gandzelo endhawini leyi tlakukekeNi loyi a endlelaka xikwembu xakwe magandzelo eMowabu,’ ku vula Yehovha.
36 Hi yona mhaka leyi mbilu ya mina yi nga ta konya hikwalaho ka Mowabu ku fana ni xitiringo,*+Mbilu ya mina yi ta konya hikwalaho ka vanhu va le Kiri-heresi ku fana ni xitiringo.*
Hikuva rifuwo leri a ri kumeke ri ta nyamalala.
37 Hikuva tinhloko hinkwato ti ni mpandlha,+Ni malepfu hinkwawo ma tsemetiwile.
Mavoko hinkwawo ma xekeleriwile,+Naswona va bohe nguvu yo khwaxa emasengeni!’”+
38 “‘Ku ni xirilo,Ehenhla ka malwangu hinkwawo ya Mowabu
Ni le tindhawini ta yena hinkwato leti nga exikarhi ka muti.
Hikuva ndzi faye Mowabu
Ku fana ni khuwana leri nga ha laviwiki,’ ku vula Yehovha.
39 ‘Vonani ndlela leyi a nga chuha ha yona! Rilani!
Vonani ndlela leyi Mowabu a hundzulukeke ha yona a khomiwe hi tingana!
Mowabu u hundzuke xihlekiso,U chavisa hinkwavo lava akelaneke na yena.’”
40 “Hikuva Yehovha u ri:
‘Ku fana ni gama leri hahaka ri suka ehenhla ri kongoma ehansi hi rivilo,+U ta pfula timpapa takwe ehenhla ka Mowabu.+
41 Miti yi ta tekiwa,Ni tindhawu ta yena leti biyeleriweke ti ta tekiwa.
Hi siku rero mbilu ya tinhenha ta Mowabu
Yi ta fana ni mbilu ya wansati loyi a velekaka.’”
42 “‘Mowabu u ta lovisiwa a nga ha vi na vanhu,+Hikuva u tikukumuxile eka Yehovha.+
43 Ku chava, khele ni ntlhamu swi le mahlweni ka wena,Wena muaki wa Mowabu,’ ku vula Yehovha.
44 ‘Loyi a balekaka khombo u ta wela ekheleni,Kasi loyi a humaka ekheleni u ta phasiwa hi ntlhamu.’
‘Ndzi ta xupula Mowabu hi lembe leri ndzi ri hlawuleke,’ ku vula Yehovha.
45 ‘Lava balekaka va yime va hele matimba endzhutini wa Hexiboni.
Hikuva ndzilo wu ta huma eHexiboniNi langavi exikarhi ka Sihoni.+
Wu ta hisa mombo wa Mowabu
Ni xipalapala xa tinhenha leti nga ni madzolonga.’+
46 ‘Khombo eka wena Mowabu!
Vanhu va le Kemoxi+ va lovisiwile.
Hikuva vana va wena va majaha va yisiwe evuhlongeni,Ni vana va wena va vanhwanyana va ye evuhlongeni.+
47 Kambe ndzi ta hlengeleta mahlonga ya Mowabu exiphen’wini xo hetelela xa masiku,’ ku vula Yehovha.
‘Ri hela kwala rungula ra ku avanyisiwa ka Mowabu.’”+
Tinhlamuselo ta le hansi
^ Kumbe “Ndhawu leyi tlakukeke leyi sirhelelekeke.”
^ Kumbexana “endhawini leyi omeke.”
^ Hi Xiheveru, “Rimhondzo.”
^ Ku nga xitiringo xo chaya risimu ra xirilo enkosini.
^ Ku nga xitiringo xo chaya risimu ra xirilo enkosini.
