Yeremiya 6:1-30
6 N’wina vana va Benjamini, balekani eYerusalema mi ya tumbela.
Banani nanga+ eTekowa;+Lumekani ndzilo wa xikombiso eBeta-hakarimi!
Hikuva khombo ri le ku teni hi le n’walungwini, khombo lerikulu.+
2 Nhwanyana wa Siyoni u fana ni wansati wo saseka loyi a a nyikiwa xin’wana ni xin’wana lexi a xi lavaka.+
3 Varisi va ta ta ni mitlhambi ya vona.
Va ta dzima matende ya vona va n’wi rhendzela,+Un’wana ni un’wana u ta risela ntlhambi wakwe kwalaho.+
4 “Lunghekelani ku lwa ni muti wa Yerusalema!
Pfukani, a hi wu hlaseleni ninhlikanhi!”
“Khombo eka hina hikuva dyambu ri rhengile,Mindzhuti ya nimadyambu yi ya yi leha!”
5 “Pfukani, a hi hlaseleni nivusiku
Hi lovisa swihondzo swa wona leswi biyeleriweke.”+
6 Yehovha wa mavuthu u ri:
“Tsemani mirhi mi aka khumbi leri nga ta mi pfuna ku hlasela Yerusalema.+
I muti lowu faneleke wu tihlamulela;Exikarhi ka wona ku ni ntshikilelo ntsena.+
7 Tanihi leswi mati yo titimela ma humaka exihlobyeni,Ni muti lowu i xihlovo xa vubihi.
Eka wona ku twakala madzolonga ni ku lovisiwa;+Vuvabyi ni khombo swi tshama swi ri emahlweni ka mina.
8 Wena Yerusalema, yingisa xitsundzuxo, loko swi nga ri tano ndzi ta suka eka wena ndzi nyangatsekile;+Ndzi ta ku endla rhumbi, tiko leri nga riki na vaaki.”+
9 Yehovha wa mavuthu u ri:
“Va ta ma khwaja hi ku helela masalela ya Israyele ku fana ni madiriva yo hetelela emurhini wa madiriva.
Tlhela u hundzisa voko ra wena ku fana ni loyi a hlengeletaka madiriva emirhini ya madiriva.”
10 “Xana ndzi fanele ndzi vulavula na vamani ndzi tlhela ndzi va lemukisa?
I vamani va nga ta yingisa?
Waswivo! Tindleve ta vona ti pfalekile,* lerova a va swi koti ku yingisela.+
Waswivo! Va hlekula rito ra Yehovha;+A va ri tsakeli.
11 Hikwalaho ndzi tele hi vukarhi bya Yehovha,A ndza ha koti ku tikhoma.”+
“Byi chululele ehenhla ka n’wana exitarateni,+Eka ntlawa wa majaha lama hlengeletaneke.
Hinkwavo va ta khomiwa, wanuna swin’we ni nsati wakwe,Vakhalabye swin’we ni vanhu lava dyuhaleke swinene.+
12 Tiyindlu ta vona ti ta nyikiwa van’wana,Swin’we ni masimu ya vona ni vasati va vona.+
Hikuva ndzi ta lwa ni vaakatiko,” ku vula Yehovha.
13 “Hikuva ku sukela eka lontsongo ku ya eka lonkulu, un’wana ni un’wana u bindzula hi ndlela leyi nga tshembekiki;+Ku sukela eka muprofeta ku ya eka muprista, un’wana ni un’wana u hanya hi vukanganyisi.+
14 Va ringeta ku tshungula timbanga ta vanhu va mina hi ku va byela ntsena va ku,‘Ku ni ku rhula! Ku ni ku rhula!’
Kasi a ku na ku rhula.+
15 Xana va khomiwa hi tingana hikwalaho ka swilo swo nyenyetsa leswi va swi endleke?
A va khomiwi hi tingana nikatsongo!
A va swi tivi leswaku swi njhani ku khomiwa hi tingana!+
Hikwalaho va ta wa exikarhi ka lava weke.
Va ta khunguvanyeka loko ndzi va xupula,” ku vula Yehovha.
16 Yehovha u ri:
“Yimani laha tindlela ti hlanganaka kona kutani mi vona.
Vutisani hi tindlela ta khale swinene,Vutisani leswaku ndlela leyinene yi kwihi kutani mi famba hi yona,+Mi tikumela ku wisa.”
Kambe va ri: “A hi nge fambi eka yona.”+
17 “Ndzi veke varindzi+ lava nga te,‘Yingisani mpfumawulo wa nanga!’”+
Kambe va te: “A hi nge wu yingisi.”+
18 “Hikwalaho yingisani n’wina matiko!
Mi swi tiva n’wina ntshungu,Leswi nga ta va humelela.
19 Yingisa wena misava!
Vanhu lava ndzi va tisela khombo+Hikwalaho ka makungu ya vona,Hikuva a va ma yingisanga marito ya minaVa fularhele nawu* wa mina.”
20 “A swi pfuni nchumu eka mina leswi mi ndzi tiselaka murhi wa risuna wa le XebaNi rihlanga ro nun’hwela ra le tikweni ra le kule.
A ndzi ma amukeli magandzelo ya n’wina yo hisiwa,A ma ndzi tsakisi.”+
21 Hikwalaho Yehovha u ri:
“Ndzi vekela vanhu lava swikhunguvanyiso,Swi ta va wisa,Vatatana ni vana va majaha,Muakelani ni munghana wakwe,Hinkwavo va ta lova.”+
22 Yehovha u ri:
“Waswivo! Vanhu lava humaka etikweni ra le n’walungwini va le ku teni,Naswona tiko lerikulu ri ta pfuxiwa ku suka eswiphen’wini swa le kule swinene swa misava.+
23 Va ta khoma vurha* ni tlhari.
Va ni tihanyi naswona a va nge vi na ntwelavusiwana.
Rito ra vona ri ta pfuma ku fana ni lwandle,Naswona va gade tihanci.+
Va lunghekele ku lwa ku fana ni wanuna wa nyimpi loyi a lwaka na wena, Wena nhwanyana wa Siyoni.”
24 Hi xi twile xiviko xa vona.
Mavoko ya hina ma hele matimba;+Hi le maxangwini,Switlhavi* leswi fanaka ni swa wansati loyi a velekaka.+
25 U nga yi emasin’wini,Naswona u nga fambi endleleni,Hikuva nala u khome banga;Ku ni ku chava matlhelo hinkwawo.
26 Wena nhwanyana wa vanhu va mina,Ambala xiambalo* xo khwaxa,+ u vumbuluka enkumeni.
Rila u kalakala onge hiloko u rilela n’wana loyi a nga yexe,+Hikuva mulovisi u ta hi tela hi xitshuketa.+
27 “Ndzi ku* endle munhu loyi a tengisaka nsuku ni silivhere exikarhi ka vanhu va mina,Loyi a lavisisaka hi vukheta;U fanele u xiya ni ku kambisisa ndlela ya vona.
28 Hinkwavo va ome tinhloko,+Va fambafamba va onha vanhu mavito.+
Va fana ni koporo ni nsimbhi;Hinkwavo va onhakile.
29 Swilo swo pfurhetela ndzilo swi vavuriwile.
Endzilweni wa vona ku ni ntsopfu.
Munhu u endla ndzilo wu hisa swinene, kambe sweswo a swi pfuni nchumu,+Vanhu lavo biha a va susiwanga exikarhi ka vanhu.+
30 Vanhu va ta va vitana silivhere leyi tshikiweke,Hikuva Yehovha u va tshikile.”+
Tinhlamuselo ta le hansi
^ Hi Xiheveru, “Ndleve ya vona a yi yimbisiwanga.”
^ Kumbe “xileriso.”
^ Kumbe “mpaxu.”
^ Hi Xiheveru, “Switlhavi swo veleka.”
^ Kumbe “nguvu.”
^ Ku nga Yeremiya.
