Yeremiya 8:1-22
8 “Hi nkarhi wolowo,” ku vula Yehovha, “marhambu ya tihosi ta Yuda, marhambu ya tihosana ta kona, marhambu ya vaprista, marhambu ya vaprofeta ni marhambu ya vaaki va Yerusalema ma ta humesiwa emasirheni.
2 Ma ta hangalasiwa edyambyini ni le n’wetini ni le tinyeletini hinkwato ta le matilweni* ku nga swilo leswi va nga rhandza swona, leswi va swi tirheleke, leswi va swi landzeleke, leswi va swi lavisiseke ni leswi va swi khinsameleke.+ A ma nge hlengeletiwi kumbe ku lahliwa. Ma ta fana ni manyoro ehenhla ka misava.”+
3 “Kutani vanhu lava poneke vandyangu lowu wo homboloka va ta hlawula rifu ematshan’weni ya vutomi etindhawini hinkwato leti ndzi nga ta va hangalasela eka tona,” ku vula Yehovha wa mavuthu.
4 “U fanele u va byela u ku, ‘Yehovha u ri:
“Xana va ta wa va nga ha pfuki?
Loko un’wana a hundzuka, xana un’wanyana na yena u ta hundzuka?
5 Hikwalaho ka yini vanhu lava, ku nga Yerusalema, va tshamela ku ka va nga tshembeki eka mina?
Va khomelele vukanganyisi;Va ala ku hundzuka.+
6 Ndzi rhiye ndleve, ndzi ya emahlweni ndzi yingisela kambe ndlela leyi a va vulavula ha yona a yi nga lulamanga.
A ku na munhu loyi a hundzukeke evubihini byakwe kumbe a vutiseke a ku, ‘Ndzi endle yini?’+
Un’wana ni un’wana u tshamela ku tlhelela endleleni leyi landzeriwaka hi vanhu vo tala, ku fana ni hanci leyi tsutsumelaka enyimpini.
7 Hambi ku ri ntavila ematilweni ya wu tiva nkarhi lowu yi faneleke yi rhurhela endhawini yin’wana ha wona;*Gugurhwana* ni mbewulana ni bokota* swi vuya hi nkarhi lowu faneleke.*
Kambe vanhu va mina a va ku twisisi ku avanyisa ka Yehovha.”’+
8 ‘Mi nga vurisa ku yini mi ku: “Hi tlharihile naswona hi na nawu* wa Yehovha”?
Hikuva entiyisweni xitsalo xa mavunwa+ xa vatsari xi tirhisiwe ku tsala mavunwa.
9 Lavo tlhariha va khomiwe hi tingana.+
Va chuhile naswona va ta phasiwa.
Waswivo! Va fularhele rito ra Yehovha,Xana va ni vutlhari byihi?
10 Hikwalaho vasati va vona ndzi ta va nyika vavanuna van’wana,Masimu ya vona ndzi ta ma nyika vanhu van’wana;+Hikuva ku sukela eka lontsongo ku ya eka lonkulu, un’wana ni un’wana u bindzula hi ndlela leyi nga tshembekiki;+Ku sukela eka muprofeta ku ya eka muprista, un’wana ni un’wana u hanya hi vukanganyisi.+
11 Va ringeta ku tshungula timbanga ta nhwanyana wa vanhu va mina hi ku n’wi byela va ku,“Ku ni ku rhula! Ku ni ku rhula!”
Kasi a ku na ku rhula.+
12 Xana va khomiwa hi tingana hikwalaho ka swilo swo nyenyetsa leswi va swi endleke?
A va khomiwi hi tingana nikatsongo!
A va swi tivi leswaku swi njhani ku khomiwa hi tingana!+
Hikwalaho va ta wa exikarhi ka lava weke.
Va ta khunguvanyeka loko ndzi va xupula,’+ ku vula Yehovha.
13 ‘Loko ndzi va hlengeleta, ndzi ta va herisa,’ ku vula Yehovha.
‘A ku nge sali madiriva emudiriveni, a ku nge sali makuwa enkuweni naswona matluka ma ta vuna.
Leswi ndzi va nyikeke swona swi ta va lahlekela.’”
14 “Hikwalaho ka yini hi tshame laha?
A hi hlengeletaneni hi nghena emitini leyi biyeleriweke+ hi fela kona.
Hikuva Yehovha Xikwembu xa hina u ta hi lovisa,Naswona u hi nyika mati lama nga ni chefu leswaku hi nwa,+Hikuva hi dyohele Yehovha.
15 A ku languteriwe ku rhula kambe leswinene a swi tanga,A ku languteriwe nkarhi wo horisiwa kambe ku ni ku chava!+
16 Ku twiwe mpfumawulo wa ku hefemuteka ka tihanci takwe eDani.
Loko tihanci takwe ti rila,Tiko hinkwaro ra tsekatseka.
Nala wa ta a fika a herisa tiko ni hinkwaswo leswi nga eka rona,Muti ni vaaki va wona.”
17 Yehovha u ri: “Hikuva ndzi mi rhumela tinyoka,Tinyoka leti nga ni vuxungu, leti nga ta ka ti nga lawuriwi,Ti ta mi luma.”
18 Gome ra mina a ri tshunguleki;Mbilu ya mina ya vabya.
19 Nhwanyana wa vanhu va minaWa huwelela a ri etikweni ra le kule a kombela mpfuno a ku:
“Xana Yehovha a nga le Siyoni?
Kumbe xana hosi yakwe a yi le ka yena?”
“Hikwalaho ka yini va ndzi hlundzukisile hi swifaniso swa vona leswi vatliweke,Hi swikwembu swa vona swa le matikweni man’wana leswi nga pfuniki nchumu?”
20 “Ntshovelo wu hundzile, ximumu xi herile,Kambe a hi ponisiwanga!”
21 Ndzi tsemeke nhlana hikwalaho ka ku wa ka nhwanyana wa vanhu va mina;+Ndzi ni gome.
Ndza chava.
22 Xana a ku na balsama* eGiliyadi?+
Kumbe xana a nga kona loyi a horisaka* kwale?+
Hikwalaho ka yini nhwanyana wa vanhu va mina a nga holanga?+
Tinhlamuselo ta le hansi
^ Hi Xiheveru, “vuthu ra le tilweni.”
^ Kumbe “mikarhi leyi vekiweke.”
^ Ku nga muxaka wun’wana wa matuva lamatsongo.
^ Kumbexana “nchukwana.”
^ Kumbe “swa rhurha.”
^ Kumbe “xileriso.”
^ Kumbe “mafurha yo nun’hwela yo tshungula.”
^ Kumbe “a ku na dokodela.”
