Yobo 26:1-14
26 Yobo a hlamula a ku:
2 “Vona ndlela leyi u pfuneke la nga riki na matimba ha yona!
Vona ndlela leyi u poniseke voko ra loyi a nga riki na matimba ha yona!+
3 Hakunene, u pfune loyi a nga riki na vutlhari hi ku n’wi nyika xitsundzuxo!+
U dyondzise vo tala vutlhari bya wena!
4 Xana u ringeta ku vulavula na mani,Naswona i moya wa mani lowu ku leriseke leswi u swi vulaka?
5 Lava feke va rhurhumela;Va le hansi ka lwandle ni leswi tshamaka eka rona.
6 Hinkwaswo leswi nga eSirheni* swi lo dlaa, eka Xikwembu,+Ni ndhawu ya ndzoviso* a yi funengetiwanga.
7 Xi andlala matilo* laha ku nga riki na nchumu,+Xi hayeka misava empfhukeni;
8 Xi tsondzela mati emapapeni ya xona,+Leswaku mapapa ma nga tikiwi kutani ma buluka;
9 Xi pfala xiluvelo xa xona,Xi xi funengeta hi papa.+
10 Xi endla ndzilakano ehenhla ka mati;+Xi hambanisa munyama ni ku vonakala.
11 Tiphuphu ta tilo ta tsekatseka;Ti hlamarisiwa hi ku tshinya ka xona.
12 Xi dunga lwandle hi matimba ya xona,+Xi tshovelela xivandzana* xa le lwandle hi ku twisisa ka xona.+
13 Xi basisa matilo hi moya wa xona;Voko ra xona ri tlhava nyoka leyi balekaka.
14 Waswivo! Leswi ko va swiphemunyana swa tindlela ta xona;+Ku hleveteriwe switsongo ntsena ha xona!
Kutani i mani la nga twisisaka ku dzindza ka xona ka matimba?”+
Tinhlamuselo ta le hansi
^ Kumbe “eSheol.” Vona Tinhlamuselo.
^ Kumbe “Abadoni.”
^ Hi Xiheveru, “n’walungu.”
^ Hi Xiheveru, “Rahava.”
