Yobo 27:1-23
27 Yobo a ya emahlweni ni swivuriso swakwe a ku:
2 “Ndza hlambanya hi Xikwembu lexi hanyaka, lexi alaka ku ndzi komba vululami,+Ndza hlambanya hi Lowa Matimba Hinkwawo, loyi a ndzi twiseke ku vava,+
3 Loko ntsena ndza ha hefemulaNaswona moya wa Xikwembu wa ha ri etinhompfini ta mina,+
4 Nomu wa mina a wu nge vulavuli leswi nga lulamangiki;Ni ririmi ra mina a ri nge vulavuli vuxisi!
5 A ndzi nge pfuki ndzi vule leswaku mi lulamile!
Ndzi ta fa ndza ha tshembekile!+
6 Ndzi ta tshama ndzi tshembekile;+Mbilu ya mina a yi nge ndzi gwevi loko ntsena ndza ha hanya.
7 Nala wa mina a a fane ni lowo homboloka,Lava ndzi hlaselaka a va fane ni lava nga lulamangiki.
8 Hikuva xana munhu la nga chaviki Xikwembu u va ni ntshembo wihi loko a lovisiwa,+Loko Xikwembu xi n’wi herisa?
9 Xana Xikwembu xi ta twa xirilo xakweLoko a weriwa hi maxangu?+
10 Kumbe xana u ta tsaka hikwalaho ka Lowa Matimba Hinkwawo?
Xana u ta vitana Xikwembu mikarhi hinkwayo?
11 Ndzi ta mi dyondzisa matimba ya Xikwembu;A ndzi nge mi tumbeteli nchumu hi Lowa Matimba Hinkwawo.
12 Loko ku ri hileswaku hinkwenu mi vone swivono,Hikwalaho ka yini mi vulavula leswi nga pfuniki nchumu?
13 Yoleyo i hakelo ya lowo homboloka leyi humaka eka Xikwembu,+Ndzhaka ya vaxanisi leyi humaka eka Lowa Matimba Hinkwawo.
14 Loko vana vakwe va tala, va ta dlayiwa hi banga,+Naswona vatukulu vakwe va ta kayivela swakudya.
15 Lava nga ta sala endyangwini wakwe va ta dlayiwa hi ntungu,Ni tinoni ta vona a ti nge va rileli.
16 Hambiloko o hlengeleta silivhere yi tala ku fana ni misava,A hlengeleta swiambalo swo saseka ku fana ni vumba,
17 Hambiloko o swi hlengeleta,Lowo lulama u ta swi ambala,+Lavo lulama va ta avelana silivhere yakwe.
18 Yindlu leyi a yi akaka a yi tiyanga, yi fana ni xisaka xa nsumba,Yi fana ni ndhawu yo tumbela eka yona+ leyi endliweke hi murindzi.
19 U ta ya eku etleleni a ri xigwili kambe a nge hlengeleti nchumu;Loko a pfula matihlo, ku ta va ku nga ri na nchumu.
20 U ta weriwa hi ku chava ku fana ni ndhambi;U ta vutliwa hi xidzedze nivusiku.+
21 U ta rhwariwa hi moya wa le vuxeni, a nga ha vi kona;Wu n’wi susa wu n’wi yisa ekule ni ndhawu yakwe.+
22 Wu ta n’wi hunga hi tihanyi+
Loko a ri karhi a ringeta ku wu balekela.+
23 Wu ta n’wi bela mavokoWu tlhela wu n’wi bela noti+ wu ri endhawini ya wona.*
Tinhlamuselo ta le hansi
^ Kumbexana “Va n’wi bela mavoko va tlhela va n’wi bela noti va ri endhawini ya vona.”
