Yobo 42:1-17
42 Kutani Yobo a hlamula Yehovha a ku:
2 “Se ndza swi tiva leswaku u kota ku endla swilo hinkwaswo,Naswona a wu tsandziwi hi nchumu.+
3 U te, ‘I mani loyi a pfilunganyaka xitsundzuxo xa mina a nga tivi nchumu?’+
Hikwalaho ndzi vulavule swilo leswi ndzi nga swi twisisikiSwilo swo hlamarisa, leswi ndzi nga tiviki nchumu ha swona.+
4 U te, ‘Ndzi kombela u ndzi yingisa, loko ndzi vulavula.
Ndzi ta ku vutisa, wena u ndzi hlamula.’+
5 Ndzi twe mavarivari ha wena,Kambe sweswi ndza ku vona hi matihlo ya mina.
6 Hikwalaho ndza tisola hileswi ndzi swi vuleke,+Ndzi tshame enkumeni ni le ntshurini.”+
7 Endzhaku ka loko Yehovha a vule marito lawa eka Yobo, Yehovha a byela Elifazi wa Mutemani a ku:
“Ndzi mi hlundzukerile wena ni vanghana va wena vambirhi,+ hikuva a mi vulavulanga ntiyiso hi mina,+ a mi fananga na Yobo nandza wa mina.
8 Sweswi tekani tinkuzi ta nkombo ni makhuna ya nkombo mi ya eka nandza wa mina Yobo, mi ya tiendlela gandzelo ro hisiwa. Kutani Yobo nandza wa mina u ta mi khongelela.+ Ndzi ta amukela xikhongelo xa yena naswona a ndzi nge mi xupuli hikwalaho ka vuphukuphuku bya n’wina, hikuva a mi vulavulanga ntiyiso hi mina, kambe Yobo hi yena a nga vulavula ntiyiso.”
9 Hiloko Elifazi wa Mutemani, Bilidadi wa Muxuha na Sofara wa Munamani va famba va ya endla hilaha Yehovha a va byeleke hakona. Kutani Yehovha a amukela xikhongelo xa Yobo.
10 Endzhaku ka loko Yobo a khongelele vanghana vakwe,+ Yehovha a herisa maxangu ya Yobo+ a tlhela a n’wi tlherisela ni rifuwo rakwe. Yehovha a n’wi nyika leswi a a ri na swona swi phindhiwe kambirhi.+
11 Vamakwavo hinkwavo va xinuna ni va xisati ni khale ka vanghana vakwe+ va n’wi endzela va ta dya swakudya na yena endlwini yakwe. Va n’wi tshandzisa va tlhela va n’wi chavelela hikwalaho ka makhombo lawa Yehovha a pfumeleleke leswaku ma n’wi wela. Un’wana ni un’wana wa vona a n’wi nyika mali ni xingwavila xa nsuku.
12 Kutani Yehovha a katekisa Yobo ku tlula eku sunguleni,+ lerova a va ni tinyimpfu ta 14 000, tikamela ta 6 000, swipano swa tihomu swa 1 000 ni timbhongolo+ ta matswele ta 1 000.
13 A tlhela a va ni vana va majaha va nkombo ni vanhwanyana vanharhu.+
14 Nhwanyana wo sungula a n’wi thya vito ra Yemima, wa vumbirhi a n’wi thya Kesiya wa vunharhu a n’wi thya Kereni-hapuku.
15 A ku nga ri na vavasati lava a va saseke ku fana ni vana va Yobo va vanhwanyana etikweni hinkwaro, tata wa vona u va avele ndzhaka swin’we ni vamakwavo va xinuna.
16 Endzhaku ka sweswo, Yobo a hanya malembe ya 140, a vona vana vakwe, vatukulu vakwe, vatukuluxinguwe vakwe ni vana va vona.
17 Yobo a hetelela a file endzhaku ko hanya nkarhi wo leha ni ku tiphina hi vutomi.
