Yohane 10:1-42
10 “Hakunene ndzi tiyisile ndzi ri eka n’wina, munhu loyi a nga ngheniki hi nyangwa etshangeni ra tinyimpfu kambe a nghena hi kun’wana, i khamba ni muphangi.+
2 Kambe loyi a nghenaka hi nyangwa hi yena murisi wa tinyimpfu.+
3 Murindzi wa nyangwa wa n’wi pfulela,+ kutani tinyimpfu ti yingisa rito rakwe.+ U ti vitana hi mavito, a ti humesa.
4 Loko a ti humesile hinkwato leti nga ta yena, u famba emahlweni ka tona, kutani ti n’wi landzela, hikuva ti tiva rito rakwe.
5 A ti nge n’wi landzeli munhu un’wana, ti ta baleka hikuva a ti ri tivi rito rakwe.”
6 Yesu u va byele xifaniso lexi, kambe a va xi twisisanga.
7 Yesu a tlhela a ku: “Hakunene ndzi tiyisile ndzi ri eka n’wina, hi mina nyangwa leyi tinyimpfu ti nghenaka ha yona.+
8 Hinkwavo lava tiendlaka mina i makhamba ni vaphangi; kambe tinyimpfu a ti nge va yingisi.
9 Hi mina nyangwa; loyi a nghenaka hi mina u ta ponisiwa naswona u ta kota ku nghena a tlhela a huma a kuma ni madyelo lamanene.+
10 Loko khamba ri ta, ri tela ku ta yiva ni ku dlaya.+ Mina ndzi tile leswaku tinyimpfu ti ta kuma vutomi lebyi nga heriki.
11 Ndzi murisi lonene;+ murisi lonene u nyikela vutomi byakwe hikwalaho ka tinyimpfu takwe.+
12 Munhu loyi a thoriweke, loyi a nga riki murisi naswona tinyimpfu ti nga riki ta yena loko a vona mhisi yi ta u tshika tinyimpfu a baleka kutani mhisi yi fika yi ti hlasela ivi ti hangalaka,
13 a nga na mhaka ni tinyimpfu hikuva i munhu loyi a thoriweke.
14 Ndzi murisi lonene. Ndza ti tiva tinyimpfu ta mina na tona ta ndzi tiva,+
15 hilaha Tatana a ndzi tivaka hakona na mina ndza n’wi tiva;+ naswona ndzi nyikela vutomi bya mina hikwalaho ka tinyimpfu ta mina.+
16 “Ndzi ni tinyimpfu tin’wana, leti nga riki ta tshanga leri;+ na tona ndzi fanele ndzi ti tisa, ti ta yingisa rito ra mina, ti va ntlhambi wun’we ni murisi a va un’we.+
17 Hi swona swi endlaka leswaku Tatana a ndzi rhandza,+ hikuva ndzi nyikela vutomi bya mina+ leswaku ndzi tlhela ndzi byi kuma.
18 A nga kona loyi a nga tekaka vutomi bya mina, kambe ndzi byi nyikela hi ku swi rhandza. Ndzi ni mfanelo yo byi nyikela naswona ndzi ni mfanelo yo tlhela ndzi byi kuma.+ Nawu lowu ndzi wu kume eka Tatana.”
19 Vayuda+ va tlhela va holova hikwalaho ka marito lawa.
20 Vo tala va vona a va ku: “U ni dimona naswona wa penga. Hikwalaho ka yini mi n’wi yingisela?”
21 Van’wana a va ku: “Leswi a swi vulaka a swi nge vuriwi hi munhu loyi a nga ni dimona. Xana dimona ri nga swi kota ku hanyisa ri pfula matihlo ya lava nga voniki?”
22 Hi nkarhi wolowo a ku ri ni Nkhuvo Wa Ku Basisiwa Ka Tempele eYerusalema. A ku ri xixika,
23 naswona Yesu a a ri karhi a famba etempeleni endhawini leyi vuriwaka rikupakupa* ra Solomoni.+
24 Kutani Vayuda va n’wi rhendzela ivi va ku: “Xana hi ta rindza ku fikela rini? Loko u ri Kreste hikwalaho ka yini u nga hi byeli?”
25 Yesu a va hlamula a ku: “Ndzi mi byerile kambe a mi ndzi tshembanga. Mitirho leyi ndzi yi endlaka hi vito ra Tatana, ya ndzi vulavulela.+
26 Kambe a mi ndzi tshembi hikuva a mi tinyimpfu ta mina.+
27 Tinyimpfu ta mina ti yingisa rito ra mina, ndza ti tiva naswona ta ndzi landzela.+
28 Ndzi ti nyika vutomi lebyi nga heriki,+ a ti nge lovisiwi naswona a nga kona loyi a nga ta ti wutla evokweni ra mina.+
29 Tinyimpfu leti Tata wa mina a ndzi nyikeke tona i ta nkoka swinene naswona a nga kona loyi a nga ti wutlaka evokweni rakwe.+
30 Mina na Tatana hi ni vun’we.”+
31 Hiloko Vayuda va tlhela va rhwalela maribye va lava ku n’wi khandla.
32 Yesu a va hlamula a ku: “Ndzi mi kombe mitirho yo tala leyinene leyi humaka eka Tatana. Hi wihi ntirho lowu mi lavaka ku ndzi khandlela wona?”
33 Vayuda va n’wi hlamula va ku: “A hi ku khandleli ntirho lowunene kambe hi ku khandlela leswi u sandzaka+ ni ku tiendla xikwembu.”
34 Yesu a va hlamula a ku: “Xana a ku tsariwanga eNawini wa n’wina leswaku ‘Ndzi te: “Mi swikwembu”’?+
35 Loko xi va vule ‘swikwembu’+ lava rito ra Xikwembu ri vuleke leswaku a va lulamanga, naswona matsalwa a ma hembi,
36 Tatana u ndzi hlawurile a tlhela a ndzi rhuma emisaveni, hikwalaho ka yini mi ku, ‘Ndza sandza,’ hileswi ndzi nga te, ‘Ndzi N’wana wa Xikwembu’?+
37 Loko leswi ndzi swi endlaka swi nga humi eka Tatana, mi nga ndzi tshembi.
38 Kambe loko swi huma eka yena, hambiloko mi nga ndzi tshembi, tshembani leswi ndzi swi endlaka+ leswaku mi ta swi tiva leswaku mina na Tatana hi ni vun’we.”+
39 Va tlhela va ringeta ku n’wi khoma kambe a chupula.
40 Hiloko a tlhela a tsemakanya Yordani a ya laha Yohane a a khuvulela kona eku sunguleni,+ a fika a tshama kona.
41 Kutani vanhu vo tala va ta eka yena, va ku: “Yohane a nga endlanga singita ni rin’we kambe swilo hinkwaswo leswi a swi vuleke hi munhu loyi a swi ri ntiyiso.”+
42 Kutani vo tala va sungula ku va ni ripfumelo eka yena.
Tinhlamuselo ta le hansi
^ Kumbe “vhurandi.”
