Yohane 3:1-36
3 A ku ri ni wanuna un’wana loyi a a ri Mufarisi, vito rakwe a ku ri Nikodema,+ a a ri un’wana wa lava a va fuma Vayuda.
2 U ye eka Yesu nivusiku+ a fika a ku: “Rabi,*+ ha swi tiva leswaku u huma eka Xikwembu, hikuva a nga kona loyi a nga endlaka masingita+ lawa u ma endlaka loko a nga seketeriwi hi Xikwembu.”+
3 Yesu a n’wi hlamula a ku: “Hakunene ndzi tiyisile ndzi ri eka wena, loko munhu a nga velekiwanga ra vumbirhi,+ a nge wu voni Mfumo wa Xikwembu.”+
4 Nikodema a ku: “Munhu a nga velekiwa njhani se a kurile? Xana a nga tlhelela ekhwirini ra mana wakwe leswaku a tlhela a velekiwa?”
5 Yesu a hlamula a ku: “Hakunene ndzi tiyisile ndzi ri eka wena, munhu a nge ngheni eMfun’weni wa Xikwembu a nga velekiwanga hi mati+ ni moya.+
6 Nyama yi tswala swa nyama kambe moya wu tswala swa moya.
7 U nga hlamali loko ndzi ku byela ndzi ku: Mi fanele ku velekiwa ra vumbirhi.
8 Moya wu hungela laha wu lavaka ku ya kona, u twa mpfumawulo wa wona, kambe a wu ku tivi lomu wu humaka kona ni lomu wu yaka kona. Swi tano ni hi lava velekiweke hi moya.”+
9 Nikodema a ku: “Xana sweswo swi nga endlekisa ku yini?”
10 Yesu a n’wi hlamula a ku: “U mudyondzisi eIsrayele kambe a wu swi tivi swilo leswi.
11 Hakunene ndzi tiyisile ndzi ri eka wena, hi vulavula leswi hi swi tivaka naswona hi nyikela vumbhoni hi leswi hi swi voneke, kambe a mi byi amukeli vumbhoni lebyi hi byi nyikelaka.
12 Loko mi nga ndzi tshembi loko ndzi mi byela swilo swa laha misaveni, mi ta ndzi tshemba njhani loko ndzi mi byela swa le tilweni?
13 Ku tlula kwalaho, a ku na munhu loyi a nga tshama a tlhandlukela etilweni+ handle ka loyi a nga xika a huma kona,+ ku nga N’wana wa munhu.
14 N’wana wa munhu u ta hayekiwa emhandzini+ hilaha Muxe a hayekeke nyoka hakona ehenhla ka mhandzi emananga,+
15 leswaku loyi a pfumelaka eka yena a ta kuma vutomi lebyi nga heriki.+
16 “Hikuva Xikwembu xi rhandze misava swinene lerova xi nyikela hi N’wana wa xona loyi a tswariweke a ri swakwe,+ leswaku loyi a pfumelaka eka yena a nga lovisiwi kambe a kuma vutomi lebyi nga heriki.+
17 Hikuva Xikwembu a xi rhumanga N’wana wa xona emisaveni leswaku a ta yi avanyisa, kambe leswaku a ta yi ponisa.+
18 Loyi a pfumelaka eka yena a nge avanyisiwi.+ Kambe loyi a nga pfumeliki ana se u avanyisiwile, hikuva a nga pfumelanga evitweni ra N’wana wa Xikwembu loyi a tswariweke a ri swakwe.+
19 Leswi nga ta endla leswaku vanhu va avanyisiwa hi leswi: ku vonakala ku te emisaveni,+ kambe vanhu va rhandze munyama ku ri ni ku rhandza ku vonakala hikuva va endla swilo swo biha.
20 Hikuva loyi a hanyaka hi swilo swo biha u venga ku vonakala naswona a nga ti eku vonakaleni, leswaku mitirho yakwe yi nga vonaki.
21 Kambe loyi a endlaka leswinene u ta eku vonakaleni,+ leswaku mitirho yakwe yi ta vonaka leswaku yi fambisana ni ku rhandza ka Xikwembu.”
22 Endzhaku ka sweswo, Yesu ni vadyondzisiwa vakwe va ya eYudiya, a fika a tshamanyana na vona a khuvula vanhu.+
23 Yohane na yena a a ri eku khuvuleni eEnoni ekusuhi ni le Salime, hikuva a ku ri ni mati yo tala kwalaho,+ naswona vanhu a va tshamela ku ta va ta khuvuriwa;+
24 hikuva Yohane a a nga si pfaleriwa ekhotsweni.+
25 Vadyondzisiwa va Yohane va holove ni Muyuda un’wana hi mhaka ya ku tibasisa.
26 Hiloko va ya eka Yohane va fika va ku: “Rabi,* wanuna loyi a wu ri na yena entsungeni wa Yordani, loyi u nyikeleke vumbhoni ha yena,+ u le ku khuvuleni ka vanhu naswona hinkwavo va tsutsumela eka yena.”
27 Yohane a hlamula a ku: “Munhu u va ni swo karhi ntsena loko a nyikiwe hi Xikwembu.
28 Mi ndzi twile loko ndzi ku, ‘A hi mina Kreste,+ kambe Xikwembu xi ndzi rhume leswaku ndzi rhanga ndzi ta a nga si fika.’+
29 Loyi a nga ni mutekiwa i muteki.+ Kambe munghana wa muteki loko a yima a n’wi yingisa wa tsaka swinene loko a twa rito ra muteki. Kutani ndzi tsakile swinene.
30 Valandzeri va Kreste va fanele va andza, kambe va mina va ta hunguteka.”
31 Loyi a humaka ematilweni+ u tlula vanhu hinkwavo. Loyi a tswariweke emisaveni u vulavula swa laha misaveni hikuva u huma kona. Loyi a humaka ematilweni u le henhla ka vanhu hinkwavo.+
32 U nyikela vumbhoni hi leswi a swi voneke ni ku swi twa,+ kambe vumbhoni byakwe a byi amukeriwi hi munhu.+
33 Loyi a amukeleke vumbhoni byakwe u tiyisekisa leswaku Xikwembu xi ni ntiyiso.+
34 Loyi a rhumiweke hi Xikwembu u vulavula leswi humaka eka xona,+ hikuva a xi pimi loko xi nyika moya wa xona.
35 Tatana u rhandza N’wana+ naswona u n’wi nyike swilo hinkwaswo.+
36 Loyi a vaka ni ripfumelo eka N’wana u ta kuma vutomi lebyi nga heriki;+ loyi a nga yingisiki N’wana a nge byi kumi,+ kambe u ta weriwa hi vukarhi bya Xikwembu.+
