Yohane 7:1-52
7 Endzhaku ka sweswo, Yesu a ya emahlweni a chumayela* eGaleliya, a a nga swi lavi ku chumayela eYudiya hikuva Vayuda a va lava ku n’wi dlaya.+
2 Hambiswiritano, Nkhuvo wa Vayuda wa Titabernakela*+ a wu ri kusuhi.
3 Hiloko vamakwavo+ va ku eka yena: “Suka laha u ya eYudiya, leswaku vadyondzisiwa va wena lavan’wana va ta vona masingita lawa u ma endlaka.
4 Hikuva a ku na munhu loyi a endlaka nchumu wo karhi exihundleni loko a lava ku tiviwa. Leswi u swi endlaka, swi endle emahlweni ka vanhu hinkwavo.”
5 Entiyisweni, vamakwavo a va nga ri na ripfumelo eka yena.+
6 Hiloko Yesu a ku eka vona: “Nkarhi wa mina a wu si fika,+ kambe n’wina mi nga ya nkarhi wun’wana ni wun’wana.
7 Misava a yi na xivangelo xa ku mi venga, kambe mina ya ndzi venga, hileswi ndzi vulaka leswaku mitirho ya yona yi hombolokile.+
8 Yanani enkhubyeni; mina a ndzi yi hikuva nkarhi wa mina a wu si fika.”+
9 Loko a heta ku va byela timhaka leti, a sala eGaleliya.
10 Kuteloko vamakwavo va ye enkhubyeni, na yena a ya kwale, kambe a a nga lavi leswaku vanhu va n’wi vona.
11 Hiloko Vayuda va sungula ku n’wi lava enkhubyeni va ku: “Munhu luyani u kwihi?”
12 Mintshungu a yi n’unun’uta ngopfu hikwalaho ka yena. Van’wana a va ku: “I munhu lonene.” Van’wanyana va ku: “A hi munhu lonene. U hambukisa ntshungu.”+
13 Vanhu a va chava ku vulavula hi yena hikwalaho ka leswi a va chava Vayuda.+
14 Loko nkhuvo wu ri exikarhi, Yesu a ya etempeleni a sungula ku dyondzisa.
15 Hiloko Vayuda va sungula ku hlamala, va ku: “Munhu loyi u ma tivela kwihi Matsalwa+ hikuva a nga dyondzanga eswikolweni?”*+
16 Kutani Yesu a va hlamula a ku: “Leswi ndzi swi dyondzisaka a swi humi eka mina, kambe swi huma eka loyi a ndzi rhumeke.+
17 Loko munhu a lava ku endla ku rhandza ka Xikwembu, u ta swi tiva loko leswi ndzi swi dyondzisaka swi huma eka xona+ kumbe ndzi tisungulela swona.
18 Loyi a vulavulaka leswi humaka emiehleketweni yakwe u lava ku dzunisiwa; kambe loyi a lavaka leswaku ku dzunisiwa loyi a n’wi rhumeke,+ u vulavula ntiyiso naswona a ku na vubihi eka yena.
19 Muxe u mi nyike Nawu.+ Kambe a nga kona ni un’we eka n’wina loyi a wu yingisaka. Hikwalaho ka yini mi lava ku ndzi dlaya?”+
20 Hiloko ntshungu wu ku: “U ni dimona. I mani loyi a lavaka ku ku dlaya?”
21 Yesu a ku: “Ndzi endle singita rin’we naswona hinkwenu mi hlamarile.
22 Hikwalaho Muxe u mi nyike nawu wa leswaku mi yimba,+ a wu nga humi eka yena, kambe a wu huma eka vakokwana+ naswona mi yimbisa munhu hi savata.
23 Loko swi koteka leswaku munhu a yimbisiwa hi savata leswaku ku nga tluriwi Nawu wa Muxe, hikwalaho ka yini mi ndzi hlundzukela hi leswi ndzi hanyiseke munhu hi savata?+
24 Mi nga vi ni xihlawuhlawu loko mi avanyisa, kambe avanyisani hi ndlela yo lulama.”+
25 Hiloko vaaki van’wana va le Yerusalema va ku: “Xana munhu loyi a hi yena loyi va lavaka ku n’wi dlaya?+
26 Vonani, u vulavula emahlweni ka vanhu, kambe a va vuli nchumu eka yena. Xana varhangeri va hina se va tshemba leswaku loyi i Kreste?
27 Hina ha ku tiva laha munhu loyi a humaka kona;+ kambe loko Kreste a ta, a nga kona loyi a nga ta tiva laha a humaka kona.”
28 Loko Yesu a ri karhi a dyondzisa etempeleni a ku: “Ma ndzi tiva mi tlhela mi tiva laha ndzi humaka kona. Ndzi lo rhumiwa+ naswona Loyi a ndzi rhumeke wa hanya, kambe a mi n’wi tivi.+
29 Mina ndza n’wi tiva,+ hikuva ndzi muyimeri wakwe naswona ndzi rhumiwe hi Yena.”
30 Hiloko va ringeta ku n’wi khoma,+ kambe va tsandzekile, hikuva nkarhi wakwe a wu nga si fika.+
31 Nilokoswiritano, ntshungu wu va ni ripfumelo eka yena,+ wu ku: “Xana loko Kreste a fika u ta endla masingita yo tala ku tlula lama endliweke hi munhu loyi?”
32 Vafarisi va twa ntshungu wu ri karhi wu hlevetela timhaka leti ha yena, hiloko vaprista lavakulu ni Vafarisi va rhuma varindzi leswaku va ya n’wi khoma.
33 Kutani Yesu a ku: “Ndzi ta va na n’wina nkarhinyana ndzi nga si tlhelela eka Loyi a ndzi rhumeke.+
34 Mi ta ndzi lava, kambe a mi nge ndzi kumi naswona laha ndzi nga ta va ndzi ri kona a mi nge swi koti ku ta.”+
35 Hikwalaho, Vayuda va vulavula va ri voxe va ku: “Xana munhu loyi u lava ku ya kwihi, laha hi nga ta ka hi nga n’wi kumi? Xana u lava ku ya eka Vayuda lava hangalakeke exikarhi ka Magriki ivi a dyondzisa Magriki?
36 Xana u vula yini loko a ku, ‘Mi ta ndzi lava, kambe a mi nge ndzi kumi naswona laha ndzi nga ta va ndzi ri kona a mi nge swi koti ku ta’?”
37 Hi siku ro hetelela, ku nga siku lerikulu ra nkhuvo,+ Yesu a suka a yima a ku: “Loko ku ri ni munhu loyi a nga ni torha, a a te eka mina a ta nwa mati.+
38 Loyi a pfumelaka eka mina, hilaha tsalwa ri vuleke hakona ri ku: ‘Swinambyana swa mati lama nyikaka vutomi swi ta khuluka swi huma eka yena.’”+
39 Hambiswiritano, a vula leswi hi moya lowo kwetsima lowu lava pfumelaka eka yena a va ta wu kuma ku nga ri khale; hikuva a va nga si wu kuma,+ tanihi leswi Yesu a a nga si vangamisiwa.+
40 Van’wana lava tweke marito lawa va ku: “Hakunene loyi i Muprofeta.”+
41 Van’wana a va ku: “Loyi i Kreste.”+ Kambe van’wana a va ku: “Xana Kreste a nga huma eGaleliya?+
42 Xana tsalwa a ri vuli leswaku Kreste u ta huma eka vana va Davhida+ eBetlehema,+ ku nga ximutana lexi Davhida a a tshama eka xona?”+
43 Hiloko ntshungu wu sungula ku phikizana hikwalaho ka yena.
44 Hambiswiritano, van’wana va vona a va lava ku n’wi khoma, kambe va tsandzeka.
45 Hiloko varindzi va tlhelela eka vaprista lavakulu ni Vafarisi, kutani Vafarisi va ku: “Hikwalaho ka yini mi nga vuyanga na yena?”
46 Varindzi va ku: “A ku na munhu loyi a tshameke a vulavula hi ndlela leyi.”+
47 Hiloko Vafarisi va ku: “Xana na n’wina se mi xisiwile?
48 Xana ku ni murhangeri eka hina kumbe Mufarisi loyi a pfumeleke eka yena?+
49 Kambe Xikwembu a xi va tsakeli vanhu lava, lava nga wu tiviki Nawu.”
50 Hiloko Nikodema, loyi a a ri un’wana wa vona, loyi a tshameke a ya eka Yesu, a ku eka vona:
51 “Xana Nawu wa hina wa swi pfumelela leswaku hi avanyisa munhu hi nga si n’wi yingisela ni ku tiva leswi a swi endleke?”+
52 Va n’wi hlamula va ku: “Xana na wena u huma eGaleliya? Kambisisa Matsalwa kutani u ta swi vona leswaku a ku na muprofeta loyi a nga ta huma eGaleliya.”*
Tinhlamuselo ta le hansi
^ Hi Xigriki, “famba.”
^ Kumbe “Mitsonga.”
^ Ku nga eswikolweni swa varabi.
^ Tibuku tin’wana ta khale leti tshembekaka, ti suse ndzimana 53 ku ya eka ndzima 8, ndzimana 11.
