Yohane 8:12-59
8 12 Hiloko Yesu a tlhela a vulavula na vona, a ku: “Hi mina ku vonakala ka misava.+ Loyi a ndzi landzelaka a nge pfuki a fambe emunyameni, kambe u ta va ni ku vonakala+ ka vutomi.”
13 Kutani Vafarisi va ku: “Vumbhoni lebyi u byi vulaka a hi ntiyiso; hikuva u nyikela vumbhoni hi wena n’wini.”
14 Yesu a va hlamula a ku: “Hambiloko ndzi nyikela vumbhoni hi mina n’wini, leswi ndzi swi vulaka i ntiyiso, hikuva ndza ku tiva laha ndzi humaka kona ni laha ndzi yaka kona.+ Kambe n’wina a mi ku tivi laha ndzi humaka kona ni laha ndzi yaka kona.
15 Mi avanyisa hi ku ya hi mianakanyo ya vanhu;+ mina a ndzi avanyisi munhu.
16 Kambe niloko ndzi avanyisa, ndzi avanyisa hi ntiyiso, hikuva Tatana loyi a ndzi rhumeke u na mina.+
17 Nakambe, eNawini wa n’wina ku tsariwe leswi: ‘Vumbhoni bya vanhu vambirhi byi tiyile.’+
18 Hi mina ndzi nyikelaka vumbhoni mayelana na mina na Tatana na yena loyi a ndzi rhumeke u nyikela vumbhoni hi mina.”+
19 Hiloko va ku: “Tata wa wena u kwihi?” Yesu a va hlamula a ku: “A mi ndzi tivi ni Tata wa mina a mi n’wi tivi.+ Loko a mi ndzi tiva ni Tata wa mina a mi ta n’wi tiva.”+
20 U vule leswi loko a ri karhi a dyondzisa etempeleni a ri laha ku hlayisiwaka kona xuma.+ Kambe a nga kona loyi a nga n’wi khoma, hikuva nkarhi wakwe a wu nga si fika.+
21 A tlhela a ku: “Ndza famba naswona mi ta ndzi lava kambe mi ta fela exidyohweni xa n’wina.+ Laha ndzi yaka kona a mi nge fiki.”+
22 Kutani Vayuda va ku: “Xana u lava ku tidlaya? Hikuva u ri, ‘Laha ndzi yaka kona a mi nge fiki.’”
23 A ya emahlweni a ku eka vona: “N’wina mi huma etindhawini ta le hansi; mina ndzi huma etindhawini ta le henhla.+ Mi huma emisaveni leyi; mina a ndzi humi eka yona misava leyi.
24 Hi yona mhaka leyi ndzi nge: Mi ta fela eswidyohweni swa n’wina. Loko mi nga tshembi leswaku ndzi yena, hakunene mi ta fela eswidyohweni swa n’wina.”
25 Hiloko va ku eka yena: “Hi wena mani?” Yesu a va hlamula a ku: “Kahlekahle ndzo tidyela nkarhi hi ku vulavula na n’wina.
26 Ndzi ni swilo swo tala swo swi vula hi n’wina ni ku mi avanyisa. Kahlekahle, Loyi a ndzi rhumeke u vulavula ntiyiso, naswona leswi ndzi mi byelaka swona swi huma eka yena.”+
27 A va nga swi twisisi leswaku a a vulavula hi Tatana.
28 Yesu a ku: “Loko mi ta va mi hayeke N’wana wa munhu+ emhandzini, hi kona mi nga ta swi tiva leswaku ndzi yena,+ ni leswaku a ndzi endli nchumu hi ku tisungulela;+ ni leswi ndzi mi byelaka swona ndzi dyondzisiwe hi Tatana.
29 Loyi a ndzi rhumeke u na mina; a nga ndzi lahlanga, hikuva ndzi endla swilo leswi n’wi tsakisaka nkarhi hinkwawo.”+
30 Vo tala va va ni ripfumelo eka yena loko a ri karhi a vula swilo leswi.
31 Kutani Yesu a byela Vayuda lava veke ni ripfumelo eka yena a ku: “Loko mi yingisa leswi ndzi swi vulaka, mi vadyondzisiwa va mina,
32 mi ta tiva ntiyiso+ kutani ntiyiso wu ta mi tshunxa.”+
33 Va hlamula va ku: “Hina hi vana va Abrahama naswona a hi si tshama hi va mahlonga ya munhu. Hikwalaho ka yini u ku, ‘Mi ta tshunxeka’?”
34 Yesu a ku: “Hakunene ndzi tiyisile ndzi ri eka n’wina, loyi a endlaka xidyoho i hlonga ra xidyoho.+
35 Ku tlula kwalaho, hlonga a ri tshami endlwini ya n’wini wa rona hilaha ku nga heriki; kambe n’wana u tshama hilaha ku nga heriki.
36 Kutani loko N’wana a mi tshunxa, mi ta tshunxeka hakunene.
37 Ndza swi tiva leswaku mi vana va Abrahama. Kambe mi lava ku ndzi dlaya hikuva leswi ndzi swi vulaka a swi vuli nchumu eka n’wina.
38 Ndzi mi byela leswi ndzi swi voneke loko ndza ha ri na Tatana,+ kambe n’wina mi endla swilo leswi mi swi tweke eka tata wa n’wina.”
39 Hiloko va n’wi hlamula va ku: “Tata wa hina i Abrahama.” Yesu a ku: “Loko a mi ri vana va Abrahama,+ a mi ta endla mitirho ya Abrahama.
40 Kambe sweswi mi lava ku ndzi dlaya, mina loyi a mi byeleke ntiyiso lowu ndzi wu tweke eka Xikwembu.+ Abrahama a nga swi endlanga sweswo.
41 Mi endla mitirho ya tata wa n’wina.” Va ku eka yena: “Hina a hi velekiwanga evuoswini;* hi ni Tatana un’we, ku nga Xikwembu.”
42 Yesu a ku: “Loko Xikwembu a xi ri Tata wa n’wina, a mi ta ndzi rhandza,+ hikuva ndzi huma eka xona. A ndzi titelanga, kambe hi xona xi ndzi rhumeke.+
43 Hikwalaho ka yini mi nga swi twisisi leswi ndzi mi byelaka swona? Hikuva a mi swi yingisi leswi ndzi swi vulaka.
44 Mi huma eka tata wa n’wina Diyavulosi naswona mi lava ku endla ku rhandza ka yena.+ A a ri mudlayi ku sukela eku sunguleni.+ U hambukile entiyisweni hikuva a nga na ntiyiso. Loko a hemba swi va swi huma embilwini yakwe, hikuva i muhembi ni tata wa mavunwa.+
45 Mina ndzi mi byela ntiyiso kambe a mi ndzi tshembi.
46 I mani eka n’wina loyi a nga ni vumbhoni bya leswaku ndzi dyohile? Loko ku ri leswaku ndzi vulavula ntiyiso, hikwalaho ka yini mi nga ndzi tshembi?
47 Loyi a humaka eka Xikwembu u yingisa leswi Xikwembu xi n’wi byelaka swona.+ N’wina a mi yingisi, hikuva a mi humi eka Xikwembu.”+
48 Vayuda va n’wi hlamula va ku: “Xana ha hemba loko hi ku, ‘U Musamariya+ naswona u ni dimona’?”+
49 Yesu a ku: “A ndzi na dimona kambe ndzi xixima Tatana, n’wina a mi ndzi xiximi.
50 A ndzi tilaveli ku dzunisiwa;+ kambe u kona Loyi a faneleke a dzunisiwa naswona hi yena a avanyisaka.
51 Hakunene ndzi tiyisile ndzi ri eka n’wina, loyi a yingisaka leswi ndzi swi vulaka, a nge pfuki a file.”+
52 Vayuda va ku: “Sweswi ha swi tiva leswaku u ni dimona. Abrahama u file ni vaprofeta va file, kambe wena u ri, ‘Loyi a ndzi yingisaka, a nge pfuki a file.’
53 Xana u vula leswaku u nkulu eka tata wa hina Abrahama, loyi a nga fa? Vaprofeta na vona va file. Xana wena u ehleketa leswaku u mani?”
54 Yesu a hlamula a ku: “Loko ndzi tidzunisa, a swi pfuni nchumu. Tatana hi yena loyi a ndzi dzunisaka,+ yena loyi mi vulaka leswaku i Xikwembu xa n’wina.
55 N’wina a mi n’wi tivi,+ kambe mina ndza n’wi tiva.+ Loko ndzo vula leswaku a ndzi n’wi tivi ndzi ta va ndzi ri muhembi ku fana na n’wina. Kambe ndza n’wi tiva naswona ndza n’wi yingisa.
56 Abrahama tata wa n’wina a a langutele siku leri a ndzi ta ta ha rona hi mahlongati. U ri vonile siku rero kutani a tsaka.”+
57 Hiloko Vayuda va ku: “U hi byela leswaku u vone Abrahama kambe a wu si va ni malembe ya 50.”
58 Yesu a ku: “Hakunene ndzi tiyisile ndzi ri eka n’wina, ndzi ve kona Abrahama a nga si va kona.”+
59 Hiloko va rhwalela maribye leswaku va n’wi khandla, kambe Yesu a tumbela ivi a huma etempeleni.
Tinhlamuselo ta le hansi
^ Kumbe “hikwalaho ko tikhoma ku biha hi swa masangu.” Hi Xigriki, i por·nei′a. Vona Tinhlamuselo.
