TSHAMANI MI RINDZILE!

2022: Lembe Ra Mangava—Xana Bibele Yi Ri Yini Hi Mhaka Leyi?

TLANGA

Hi 2022, a hi tshamela ku twa hi swiviko swa tinyimpi, swiphiqo swa ikhonomi ni timhangu ta ntumbuluko. I Bibele ntsena leyi hlamuselaka xivangelonkulu xa swiendlakalo leswi.

Xivangelo xa swiendlakalo leswi veke kona hi 2022

Swilo leswi endlekeke hi 2022, swi ya swi swi veka erivaleni leswaku hi hanya enkarhini lowu Bibele yi wu vitaka ‘masiku yo hetelela.’ (2 Timotiya 3:1) Nkarhi wolowo wu sungule hi 1914. Xiya ndlela leyi swiendlakalo swa sweswinyana swi fambisanaka hayona nileswi Bibele yi vuleke leswaku swi ta endleka emikarhini ya hina:

“Tinyimpi.”—Matewu 24:6.

“ Hi 2022 eYuropa Ku Tlhele Ku Va Na Nyimpi Yo Chavisa Swinene.” a

Vona nhlokomhaka leyi nge, “Tiko Ra Rhaxiya Ri Hlasela Tiko Ra Ukraine.”

“Ku kayivela ka swakudya.”—Matewu 24:7.

“2022 A Ku Ri Lembe Ra Ku Pfumaleka Ka Swakudya Swinene.” b

Vona nhlokomhaka leyi nge, “Nyimpi Leyi Nga Kona eUkraine Yi Endla Leswaku Ku Kayivela Ka Swakudya Ku Ya Ku Andza eMisaveni Hinkwayo.”

“Mintungu.”—Luka 21:11.

“Ku tlhele ku va na ntungu wa swimungwamungwana loko hi hala tlhelo monkeypox yi ya yi va xiphiqo naswona COVID-19 yi ya emahlweni yi va ni khombo swinene, xiyimo lexi xi yi veke erivaleni ndlela leyi mavabyi lama tlulelaka ma nga ni khombo hayona ni ndlela leyi vanhu va nga kotiki ku tisirhelela eka wona.” c

Vona nhlokomhaka leyi nge, “Vanhu Vo Ringana 6 Wa Timiliyoni Va Lovile Hikwalaho Ka COVID.”

‘Swilo swo chavisa.’—Luka 21:11.

“Maxelo yo hisa swinene, dyandza, ku hisiwa ka nhova ni swidzedze. Ximumu xa 2022 xi ta tsundzukiwa hi swiendlakalo swa ku cincacinca ka maxelo leswi vangeke khombo, laha swi endleke leswaku ku lova vanhu va magidi naswona swi endle leswaku vanhu vo ringana timiliyoni va sala va nga ha ri na makaya.” d

Vona nhlokomhaka leyi nge, “Maxelo Lama Hisaka Swinene eMisaveni Hinkwayo”

“Mpfilumpfilu.”—Luka 21:9.

“Hi 2022 vanhu va toyatoyele mimfumo hileswi a va hlundzuke swinene hikwalaho ka swiphiqo swa ikhonomi, ngopfungopfu hikwalaho ka ku durha ka swilo.” e

Vona nhlokomhaka leyi nge, “Swilo Swi Ya Swi Nyanya Ku Durha eMisaveni Hinkwayo.”

Ku ta endleka yini lembe leri taka?

A ku na loyi a swi tivaka hi ku kongoma leswi nga ta endleka hi 2023. Lexi hi xi tivaka hileswaku ku nga ri khale Mfumo wa Xikwembu wu ta tisa ku cinca lokukulu emisaveni. (Daniyele 2:44) Mfumo lowu wu ta herisa lexi endlaka vanhu va xaniseka wu tlhela wu tiyiseka leswaku ku rhandza ka Xikwembu ka endleka emisaveni.—Matewu 6:9, 10.

Ha ku kombela leswaku u yingisa xitsundzuxo xa Yesu Kreste xa ku ‘tshama u rindzile’ u vona ndlela leyi swiendlakalo swa misava swi hetisisaka vuprofeta bya Bibele hayona. (Marka 13:37) Hi kombela u tihlanganisa na hina leswaku u ta dyondza swo tala mayelana ni ndlela leyi Bibele yi nga ku pfunaka hayona sweswi ni ndlela leyi yi nga nyikaka wena swin’we ni ndyangu wa wena ntshembo wa xiviri hi vumundzuku lebyinene.

a AP News, “Hi 2022 eYuropa Ku Tlhele Ku Va Na Nyimpi Yo Chavisa Swinene,” hi Jill Lawless, December 8, 2022.

b Nhlangano Wa Swakudya Wa Misava “Ku Kayivela Ka Swakudya Ku Ya Ku Andza eMisaveni Hinkwayo.”

c JAMA Health Forum, “Ku Hanya Hi Mikarhi Ya Mintungu Ku Sukela Eka Covid-19, Monkeypox, Swimungwamungwana Ni Mavabyi Man’wana,” hi Lawrence O. Gostin, JD, September 22, 2022.

d Earth.Org, “Hi Xihi Xivangelo Lexi Endleke Leswaku Ku Va Ni Ku Cincacinca Ka Maxelo Hi Ximumu Xa 2022?” hi Martina Igini, October 24, 2022.

e Carnegie Endowment for International Peace, “Ku Hlundzuka Hikwalaho Ka Ikhonomi Swi Endle Leswaku Vanhu Va Toyatoya eMisaveni Hinkwayo Hi 2022,” hi Thomas Carothers na Benjamin Feldman, December 8, 2022.