Hi ti 27 ta January 2023, ku ta va ku ri siku leri vanhu vo tala ematikweni yo hambanahambana va nga ta tsundzuka ku Dlayeteriwa Ka Vayuda Va Le Yuropa Hi Manazi. Swiendlo swa nsele ni leswi tsemaka nhlana leswi endlekeke emalembeni yo tlula 75 lama hundzeke, swi nga ha ku endla u tivutisa leswaku hikwalahokayini Xikwembu xi pfumelele leswaku ku Dlayeteriwa Vayuda Hi Manazi.

•   Leswaku u tiva leswi Bibele yi swi vulaka hi mhaka leyi, hlaya nhlokomhaka leyi nge, “Ha Yini Vayuda Va Dlayeteriwile? Ha Yini Xikwembu Xi Nga Ku Sivelanga?”

 Vayuda va xaniseke ngopfu tanihi leswi a ku ri vona lava a va dlayeteriwa. Vanhu va timiliyoni va dlayiwe hi ndlela yo karhi leyi hleriweke ka ha ri emahlweni. Nakambe vanhu van’wana lava nga riki Vayuda na vona va xanisiwile va tlhela va dlayiwa hi nkarhi lowu a ku Dlayeteriwa Vayuda Va Le Yuropa Hi Manazi. Exikarhi ka vona a ku ri ni Timbhoni ta Yehovha leti a ti xanisiwa hikwalaho ka leswi ti swi pfumelaka leswi kumekaka eBibeleni.

•   Leswaku u twa swo tala hi mhaka leyi, hlaya nhlokomhaka leyi nge, “What Happened to Jehovah’s Witnesses During the Time of the Holocaust?”

 Vanhu vo tala va khomiwa hi rhumbyana ra leswaku swiendlakalo swo tanihi ku Dlayeteriwa Ka Vayuda Va Le Yuropa Hi Manazi swi nga tlhela swi endleka. Lexi tsakisaka, Bibele yi tshembisa leswaku enkarhini lowu taka, makhombo wolawo lama tsemaka nhlana a ma nge he vi kona.

•   “‘Hikuva ndzi swi tiva kahle leswi ndzi swi ehleketaka hi n’wina,’ ku vula Yehovha, ‘ndzi lava mi va ni ku rhula ku nga ri khombo, ndzi lava ku mi nyika vumundzuku lebyi mi byi languteleke.’”—Yeremiya 29:11. a

 Ntshembo lowu wu ta va wa xiviri loko Yehovha Xikwembu a herisa vuhomboloki hinkwabyo kutani a vuyetela ku onhiwa loku vangiweke hi byona. Ku nga ri khale u ta:

•   Herisa lavo homboloka lava vavisaka van’wana.—Swivuriso 2:22.

•   Horisa hinkwavo lava xanisekeke.—Nhlavutelo 21:4.

•   Pfuxa hinkwavo lava feke leswaku va tlhela va hanya emisaveni.—Yohane 5:28, 29.

 Hi nga swi tshemba switshembiso swa le Bibeleni leswi chavelelaka. Leswaku u dyondza ku hikwalahokayini u fanele u swi tshemba switshembiso leswi, ha ku rhamba leswaku u ringeta dyondzo ya hina ya mahala ya Bibele.