EMisaveni hinkwayo, vanhu va hlawula ku nga tirhisi swilo leswi endliweke swi huma eka swiharhi.

•   “Ku hanya hi matsavu(Veganism) i ndlela leyi vanhu va tiyimiseleke hayona ku nga vavisi kumbe ku tirhisa swiharhi leswaku va endla swakudya, swiambalo kumbe swilo swin’wana.”—The Vegan Society.

 Vanhu van’wana a vo hanya hi matsavu hi leswi va khathalaka hi swiharhi kambe hileswi va lavaka ku antswisa mbango, va lavaka rihanyo lerinene ni hi kwalaho ka vukhongeri lebyi va nga eka byona.

•   “Veganism yi hambanile ni tidayete letin’wana hikuva vanhu va yi teka ku ri nchumu lowu va nga tshembelaka eka wona, ku ri xiboho lexinene ni ndlela leyi munhu un’wana na un’wana a nga hoxaka xandla leswaku misava yi ya yi antswa.”—Britannica Academic.

 Xana Veganism yi nga antswisa vumundzuku bya laha misaveni? Bibele yi ri yini hi mhaka leyi?

 Bibele yi kombisa leswaku Muvumbi wa hina, Yehovha Xikwembu, a u teka vanhu va ri lava tlakukeke eka swiharhi naswona u va nyike vulawuri ehenhla ka swona. (Genesa 1:27, 28) Kahlekahle, Xikwembu xi pfumelele vanhu leswaku va endla swiharhi swi va swakudya. (Genesa 9:3) Hambiswiritano, a xi swi lavi leswaku vanhu va khoma swiharhi hi ndlela ya tihanyi.—Swivuriso 12:10.

 Hi ku ya hi Bibele, ku dya nyama i xiboho xa munhu. b Leswi hi hlawulaka ku swi dya a swi hi endli hi va vanhu lava antswaka eka Xikwembu. (1 Vakorinto 8:8) A hi fanelenga hi xopaxopa van’wana hikwalaho ka leswi va hlawulaka ku swi dya.—Varhoma 14:3.

 Bibele yi kombisa leswaku ndlela leyi hi hlawulaka ku hanya hayona a yi nge swi koti ku lulamisa swiphiqo leswi nga kona laha misaveni. Swiphiqo swo tala swi vangiwe hi tipolitiki, ndhawu ni swiphiqo swa ikhonomi emisaveni ku nga leswi munhu a nga ta ka a nga swi koti ku swi lulamisa. Bibele yi ri:

•   “A swi koteki ku ololoxa nchumu lowu gombonyokeke.”—Eklesiasta 1:15.

 Muvumbi wa hina u ta lulamisa swiphiqo leswi hi langutanaka na swona. Hi ndlela yo fanikisela, Bibele yi hlamusela leswi a nga ta swi endla.

•   “Hiloko ndzi vona tilo lerintshwa ni misava leyintshwa; hikuva tilo ro sungula ni misava yo sungula a swi nga ha ri kona ni lwandle a ri nga ha ri kona.”—Nhlavutelo 21:1.

 Xikwembu xi ta siva mifumo ya vanhu kumbe “tilo ro sungula,” hi “tilo lerintshwa” ku nga Mfumo wakwe wa le tilweni. Mfumo Wakwe wu ta susa “misava yo sungula,” ku nga vanhu vo homboloka naswona wu ta fuma “misava leyintshwa,” ni lava tiyimiseleke ku hanya hi milawu ya wona.

 Hi le hansi ka Mfumo wa Xikwembu ntsena laha vanhu va nga ta dyondza ku hanya hi ku rhula ni swiharhi ni ku sirhelela mbango.—Esaya 11:6-9.