Xana u wela eka vanhu va timiliyoni lava tshameke va weriwa hi maxelo yo biha? Maxelo wolawo ni ndlela leyi ma onhaka hayona swi ta hi tindlela to hambanahambana. Hakanyingi swidzedze swi vanga moya wo chavisa lowu onhaka swinene elwandle. Xihangu xi nga ha vanga ku mbundzumuka ka misava naswona swidzedze swi nga ha vanga ku dzindza ka tilo ni rihati leri nga hisaka nhova. Nakambe dyandza, moya wo hisa ni swidzedze leswi vaka kona hi nkarhi wa vuxika, na swona swa onha swinene.

 Etindhawini to tala, timhangu leti vangiwaka hi maxelo yo biha ti ya ti andza swinene. Xiviko lexi humaka eka International Federation of Red Cross and Red Crescent Societies xi ri: “Nhlayo ya vanhu lava khumbiwaka hi timhangu yi ya yi tlakuka tanihi leswi swidzedze, mpfula ya matimba ni dyandza swi yaka swi andza naswona swi koxa vutomi ni nhlayiseko wa vanhu ni ku endla leswaku lembe ni lembe vanhu va timiliyoni va sala va pfumala makaya.”

 Loko swilo leswi swi humelela, swi vavisa vanhu emirini ni ku va twisa timbilu ku vava. Va twa ku vava hileswi va lahlekeriweke hi nhundzu, makaya kumbe ku loveriwa hi lava va va rhandzaka.

 Loko u tshame u xaniseka hikwalaho ka timhangu leti vangiwaka hi maxelo yo biha, Bibele yi nga ku pfuna leswaku u kota ku tiyisela. Ya chavelela, yi nyika ntshembo naswona yi ni switsundzuxo leswi pfuneke vanhu vo tala lava na vona va tshameke va weriwa hi maxelo lama nga ni khombo. (Varhoma 15:4) Yi tlhela yi hlamula xivutiso xa nkoka lexi karhataka vanhu vo tala, lexi nge: Loko ndzi humeleriwa hi swilo swo biha, xana swi vula leswaku Xikwembu xa ndzi ba?

 Bibele yi dyondzisa leswaku Xikwembu a hi xona xi vangaka ku xaniseka loku nga kona namuntlha. Ya hi tiyisekisa leswaku a “xi nge ringiwi hi swilo swo biha naswona xona a xi ringi munhu.” (Yakobo 1:13) Leswi swi vula leswaku a hi xona xi vangaka maxelo lama nga ni khombo emasikwini ya namuntlha.

 Bibele ya yi boxa mikarhi leyi Xikwembu a xi tirhisa ntumbuluko wa xona ku xupula vanhu vo homboloka. Kambe swiendlakalo sweswo a swi fani ni leswi vangaka timhangu leti nga languteriwangiki namuntlha, leti vavisaka vanhu vo biha ni vo lulama. Ku hambana ni sweswo, Bibele yi hi byela leswaku mikarhi hinkwayo Xikwembu a xi sirhelela vanhu vo lulama, xi va lemukisa hi khombo leri a ri tata ni ku va byela xivangelo xa rona. Hi xikombiso, Xikwembu xi vule xivangelo xo tisa Ndhambi hi nkarhi wa Nowa, vanhu va lemukisiwe ka ha ri ni nkarhi naswona xi sirhelele Nowa ni ndyangu wakwe.—Genesa 6:13; 2 Petro 2:5.

 Loko u lava ku tiva swo tala mayelana nileswaku Xikwembu a xi xupuli vanhu hi timhangu ta ntumbuluko namuntlha, vona nhlokomhaka leyi nge: “What Does the Bible Say About Natural Disasters?”

 Bibele yi vula leswaku Yehovha a i Xikwembu lexi khathalaka hi vanhu naswona xi ni ntwelavusiwana. Xiya matsalwa lama landzelaka lama chavelelaka.

•   Esaya 63:9: “Nkarhi hinkwawo lowu a va twa ku vava, na yena [Xikwembu] a a twa ku vava.”

   Leswi vulaka swona: Yehovha u twa ku vava loko vanhu va xaniseka.

•    1 Petro 5:7: “Xa khathala hi n’wina.”

   Leswi vulaka swona: Yehovha wa khathala hi vuhlayiseki bya wena.

 Rirhandzu ra Yehovha ri n’wi susumetela leswaku a teka goza. Wa hi chavelela hi ku tirhisa Bibele leyi hi nyikaka ntshembo hi vumundzuku lebyi ku nga ta va ku nga ha ri na maxelo yo biha.—2 Vakorinto 1:3, 4.

 Bibele yi hi tshembisa leswaku Yehovha u ‘lava ku hi nyika vumundzuku lebyi hi byi languteleke.’ (Yeremiya 29:11) U lava leswaku vanhu va tiphina eparadeyisini laha misaveni, handle ko chavisiwa hi maxelo yo biha.—Genesa 1:28; 2:15; Esaya 32:18.

 Xikwembu xi ta hi nyika vumundzuku byebyo hi ku hi tisela Mfumo wa xona wa le tilweni lowu hosi ya wona ku nga Yesu. (Matewu 6:10) I Yesu ntsena la nga ni matimba ni vutlhari byo kota ku sivela timhangu leti vangiwaka hi maxelo. Loko Yesu a ri laha misaveni, u swi kombisile leswaku u ni matimba yo lawula maxelo. (Marka 4:37-41) U ta fuma hi vutlhari ni ku twisisa, a dyondzisa vanhu ku hlayisa mbangu ni ntumbuluko. (Esaya 11:2) Ehansi ka vulawuri byakwe, vanhu a va nge he vavisiwi hi timhangu leti vangiwaka hi maxelo.

 U nga ha tivutisa, ‘Xana Yesu u ta ma tirhisa rini matimba yakwe yo lawula maxelo?’ Leswaku u kuma nhlamulo ya xivutiso lexi, vona nhlokomhaka leyi nge: “Mfumo Wa Xikwembu Wu Ta Sungula Rini Ku Fuma Misava?”

 Xitsundzuxo xa le Bibeleni xi nga ku pfuna leswaku u langutana ni maxelo lama nga ni khombo.

•   Loko ma nga si sungula: Tiyimisele ku teka goza hi xihatla.

   Leswi Bibele yi swi vulaka: “Lowo tlhariha u vona khombo kutani a tumbela, kambe loyi a nga riki na ntokoto u ya emahlweni a famba kutani a langutana ni vuyelo bya swiendlo swakwe.”—Swivuriso 22:3.

   Leswi vulaka swona: Tshama u lunghekile leswaku u ta kota ku teka goza ro ponisa ndyangu wa wena hi xihatla.

   Ntokoto: “Hi siku leri hi nga pona ritshwa, a hi lunghekile. A hi ri ni nkwama wa hina wa ndzindza khombo. Endzeni ka nkwama a ku ri ni swa vutshunguri. A hi longe ni swiambalo. Vanhu van’wana a va pfilunganyekile, va nga tivi leswaku va ta endla yini. Kambe hina a hi ri ni swilo leswi a hi swi lava, hikwalaho ka sweswo ndza tlangela!”—Tamara wa le California, eU.S.A.

•   Hi nkarhi wa mhangu: Ehleketa ntsena hi swilo swa nkoka.

   Leswi Bibele yi swi vulaka: “Hambiloko munhu a ri ni swilo swo tala, vutomi byakwe a byi humi eka swona.”—Luka 12:15.

   Leswi vulaka swona: Vutomi i bya nkoka ku tlula nhundzu.

   Ntokoto: “Loko xidzedze lexi vuriwaka Lawin b xi onha kaya ra hina, a ndzi nga tivi leswaku ndzi fanele ndzi endla yini. Kambe lexi ndzi sunguleke ndzi xi endla a ku ri ku khongela eka Yehovha Xikwembu hi mbilu ya mina hinkwayo. Ndzi swi xiyile leswaku hi lahlekeriwe hi nhundzu ntsena, ku nga ri vutomi bya hina.”—Leslie wa le Phillippines.

•   Endzhaku ka mhangu: U nga vileli hi siku ra mundzuku kambe ehleketa ntsena hi siku ra namuntlha.

   Leswi Bibele yi swi vulaka: “Mi nga tshuki mi vilela hi siku leri landzelaka hikuva siku leri landzelaka ri ta va ni mivilelo ya rona.”—Matewu 6:34.

   Leswi vulaka swona: U nga vileli hileswi nga ta endleka mundzuku.

   Ntokoto: “Endzhaku ka loko xidzedze lexi vuriwaka Irma xi khukhule kaya ra mina, a ndzi ehleketa hi swilo swo tala naswona sweswo swi ndzi vangele xitirese. Ndzi ringete ku yingisa nkongomiso wa le Bibeleni, lowu vulaka leswaku ndzi fanele ku ehleketa hi swa siku ra namuntlha. Mpfuno lowu humaka eka Yehovha wu endle ndzi kota ku tiyisela hi ndlela leyi a ndzi nga yi ehleketi.”—Sally wa le Florida eU.S.A.

 Leswaku u kuma leswi engetelekeke leswi u nga swi endlaka, hlaya nhlokomhaka leyi nge: “Leswi U Nga Swi Endlaka Leswaku U Pona Loko Ku Ri Ni Mhangu.”