Sweswinyana, varhangeri va misava, van’wasayense ni vativi va thekinoloji, va vule swo karhi mayelana ni thekinoloji leyi kotaka ku tekelela ndlela leyi vanhu va endlaka swilo ni ku ehleketa hayona. Hambileswi va pfumelaka leswaku ya pfuna, kambe va tlhela va vilerisiwa hi ndlela yo biha leyi yi nga tirhisiwaka hayona.

•   “Thekinoloji leyi, hi yin’wana ya tithekinoloji ta matimba swinene namuntlha, yi antswisa vutomi bya vanhu . . . Kasi hi hala tlhelo, yi hi tekela tin’wana ta timfanelo ta hina ni rungula rin’wana ra xihundla naswona yi endla swi hi tikela ku tshemba ndlela leyi mfumo wu fumaka hayona.”—Kamala Harris, xandla xa presidente ya le United States, May 4, 2023.

•   Eka nhlokomhaka leyi humesiweke hi May 9, 2023, eka BMJ Global Health, a ntlawa wa madokodela ya matiko ni vativi va swa rihanyo lava rhangeriwaka hi Dokodela Frederik Federspiel wu tsale wu ku: “Hambileswi thekinoloji leyi yi tshembisaka ku tisa ku cinca eka swa rihanyo yi nga tlhela yi vangela rihanyo ra hina khombo.”

•   “Vanhu va nga tirhisa thekinoloji leyi ku hangalasa rungula ra mavunwa. Ku nga ri khale yi nga endla leswaku vanhu swi va tikela ku kuma mitirho. Vanhu van’wana lava tirhaka hi thekinoloji va vilerisiwa ngopfu hileswaku enkarhini lowu taka thekinoloji ya muxaka lowu yi nga vangela vanhu khombo.”—The New York Times, May 1, 2023.

 Loko nkarhi wu ri karhi wu famba swi ta tikomba loko vanhu va ta tirhisa thekinoloji leyi ku pfuna vanhu kumbe ku va vangela khombo. Xana Bibele yi ri yini hi mhaka leyi?

 Bibele yi kombisa leswaku mixaka yo karhi ya thekinoloji leyi vanhu va yi tshubuleke a yi nge tirhiseriwi swilo leswinene ntsena.

1.  1. Hambileswi vanhu va nga ni makungu lamanene, a va swi ehleketi leswaku swiendlo swa vona swi nga va ni vuyelo byo biha.

   •   “Ku ni ndlela leyi vonakaka yi lulamile eka munhu, kambe emakumu yi yisa eku feni.”—Swivuriso 14:12.

2.  2. Munhu a nge swi koti ku lawula ndlela leyi van’wana va swi tirhisaka hayona kahle swilo leswi a swi endleke kumbe va nga swi tirhisi kahle.

   •   ‘Ndzi boheka ku siyela munhu loyi a nga ta ta endzhaku ka mina ntirho wa mina. Naswona i mani la tivaka leswaku munhu wa kona u ta tlhariha kumbe u ta va xiphukuphuku? Nilokoswiritano u ta lawula swilo hinkwaswo leswi ndzi tirhiseke matimba ya mina ni vutlhari leswaku ndzi swi kuma.’—Eklesiasta 2:18, 19.

 Mhaka yoleyo yi swi kombisa kahle leswaku hikwalahokayini hi lava nkongomiso lowu humaka eka Muvumbi wa hina.

 Muvumbi wa hina u tshembisa leswaku a nge pfuki a pfumelele thekinoloji yo karhi leyi vanhu va yi endlaka leswaku yi lovisa misava kumbe vanhu.

•   “Misava yi tshama hilaha ku nga heriki.”—Eklesiasta 1:4.

•   “Lavo lulama va ta tshama emisaveni, va ta hanya eka yona hilaha ku nga heriki.”—Pisalema 37:29.

 Hi ku tirhisa Bibele, Muvumbi wa hina u hi nyika nkongomiso lowu nga ta endla leswaku hi va ni ku rhula hi tlhela hi va ni vumundzuku lebyi sirhelelekeke. Leswaku u dyondza leswi engetelekeke mayelana ni leswi Bibele yi swi vulaka, hlaya nhlokomhaka leyi nge, “U Nga Wu Kuma Kwihi Nkongomiso Lowu Tshembekaka Wo Va Ni Vumundzuku Lebyinene?” ni leyi nge, “A Real Hope for a Better Tomorrow.”