Leswi ku khuvuriwaka vanhu vo tala swinene lembe ni lembe, ku ya ku laveka miako yo tala leyi hi nga ta gandzela Yehovha eka yona. Hikwalaho ka sweswo Tindzawulo To Pulana Ni Ku Aka emisaveni hinkwayo a ti kunguhate ku aka kumbe ku antswisa tindhawu ta vugandzeri to tlula 2 700 hi lembe ra ntirho ra 2020. a

 Lexi twisaka ku vava makungu lawa ma kavanyetiwe hi ntungu wa COVID-19. Leswaku ku sirheleriwa vamakwerhu ni leswaku hi yingisa milawu leyi mfumo wu yi vekeke, Komiti yo Kandziyisa Ya Huvo Leyi Fumaka yi yimise mitirho yoleyo emisaveni hinkwayo. Hambiswiritano, hi lembe ra ntirho ra 2020, ku akiwe ku tlhela ku antswisiwa tindhawu ta vugandzeri to tlula 1 700 ku nga si fika ntungu lowu. Ku engetela kwalaho, ku hetiwe tiprojeke letikulu to tlula 100 emarhavini. A hi vone ndlela leyi tiprojeke timbirhi ti vuyeriseke vamakwerhu ha yona.

 Rhavi ra le Cameroon. Rhavi ra vona ra khale leri a ri ri eDouala, a ri ri ritsongo swinene naswona a ri lava ku antswisiwa swinene. Komiti Yo Kandziyisa a yi lava ku antswisa rhavi rolero, kambe a swi ta durha swinene ku tlula mali leyi a ri ta xavisiwa ha yona. Kutani ku endliwe vulavisisi ku vona loko swi ta antswa ku aka eka ndhawu yin’wana kumbe ku xava ndhawu ni ku antswisa muako wa yona kambe a va yanga kule ni makungu lawa hikwalaho ka swiyimo.

 Loko swa ha ri tano, vamakwerhu va twe leswaku mfumo wa ndhawu yoleyo wu lava ku endla patu etlhelo ka Holo yin’wana yo khomela tinhlengeletano ta miganga en’walungwini wa le Douala. Patu rolero a ri ta endla leswaku swi olova ku tisa switirhisiwa endhawini yoleyo. Ku akiwa ka patu rolero a swi fambisana kahle ni leswi rhavi rolero a ri swi lava. Kutani Huvo Leyi Fumaka yi endle xiboho xa leswaku ku akiwa rhavi lerintshwa laha Holo ya Tinhlengeletano ta Miganga yi nga kona.

 Timbhoni ni van’watinkontiraka va tirhe swin’we eka projeke leyi, sweswo swi endle leswaku ku hlayisiwa nkarhi ni mali. Kahlekahle, eka projeke leyi ku tirhisiwe mali ya le hansi swinene ku tlula leyi a yi languteriwile, ku sale mali yo tlula timiliyoni timbirhi ta tidolara ta le Amerika! Ndyangu wa Bethele a wu tsakile swinene ku rhurhela endhawini leyintshwa naswona hi nkarhi lowu nga hetiki mbilu ku fike COVID-19.

 Ndyangu wa Bethele ya le Cameroon wu vuyeriwile swinene hi ku tshama ni ku tirha endhawini leyinene naswona wu teka rhavi leri lerintshwa ku ri nyiko leyi humaka eka Yehovha. Vatekani van’wana va ri, “Hi lava ku tirha hi matimba naswona a hi swi lavi ku yi tekela ehansi nyiko leyi.”

 Hofisi Ya Vuhundzuluxeri ya Xitojolabal leyi nga eMexico. Ku ringana malembe yo tala, ntlawa wa vahundzuluxeri va Xitojolabal a wu tirha erhavini ra le Central America, leri a ri ri ekusuhi na Doroba ra Mexico. Hambiswiritano, ririmi leri, ri vulavuriwa ngopfu eAltamirano ni le Las Margaritas laha mpfhuka wa kona ku nga tikhilomitara ka kwalomu ka 1 000! Hikwalaho ka sweswo, vahundzuluxeri a swi va tikela ku fambisana ni ku cinca ka ririmi ra Xitojolabal. Naswona rhavi a swi ri tikela ku kuma vamakwerhu lava lavekaka va le kusuhi leswaku va ta pfuneta hi ku hundzuluxela ni ku rhekoda.

 Hikwalaho ka sweswo, Komiti Yo Tsala ya Huvo Leyi fumaka a yi lava leswaku ndzawulo leyi ya vuhundzuluxeri yi rhurhela laha ku vulavuriwaka Xitojolabal. Leswaku sweswo swi koteka rhavi ri teke xiboho xo xava ni ku antswisa muako wa kona. Ku endla tano a swi ta endla leswaku va hlayisa mali yo tala ku tlula ku sungula hansi va aka kumbe ku hirha tihofisi.

 Muhundzuluxeri un’wana u hlamusele ndlela leyi a vuyeriweke ha yona, u te: “Ndzi ve muhundzuluxeri ku ringana malembe ya khume erhavini, kambe a ndzi nga si tshama ni hlangana ni ndyangu ni wun’we laha kusuhi lowu vulavulaka ririmi ra mina. Sweswi tihofisi ta hina ti le xikarhi ka ndhawu leyi ku vulavuriwaka ririmi ra Xitojolabal. Ndzi bula ni vanhu lava vulavulaka Xitojolabal masiku hinkwawo. Leswi swi endle ndzi ri tiva kahle ririmi leri naswona swi antswise ntirho wa mina.”

 Ku ni mitirho yo tala leyi lavaka ku endliwa hi lembe ra ntirho ra 2021, mitirho yoleyo yi katsa ti-RTO ta 75 ni swikolo swo dyondzisa Bibele, loko swiyimo swi pfumela. Ntirho wa tiprojeke letikulu ta nhungu leti katsaka projeke ya le ntsindza wa misava hinkwayo eRamapo le New York ni ku rhurhisiwa ka rhavi ra Argentina ni ra Italy wu ta ya emahlweni. Ku engetela kwalaho ku laveka Tiholo ta Mfumo letintshwa to tlula 1 000 naswona sweswi ku ni tindhawu to khomela tinhlengeletano ta vandlha to tlula 6 000 leti nga fanelekiki leti lavaka ku cinciwa nakambe ku ni Tiholo ta Mfumo ta 4 000 leti lavaka ku lunghisiwa.

 Xana ntirho lowu hinkwawo wu hakeleriwa njhani? Makwerhu Lázaro González, xirho xa Komiti Ya Rhavi ra le Central America, u hlamule xivutiso lexi loko a ri karhi a vulavula hi projeke ya Hofisi ya Vuhundzuluxeri ya Xitojolabal. “Laha rhavi ra hina ri nga kona a ku na switirhisiwa swo tala. Kutani loko vamakwerhu emisaveni hinkwayo a va nga seketeli ntirho lowu, a swi nga ta koteka leswaku ku akiwa tihofisi ta vuhundzuluxeri leswaku ku pfuneka vamakwerhu. Minyikelo ya vamakwerhu emisaveni hinkwayo yi endle leswaku swi koteka leswaku vahundzuluxeri va kota ku va ekusuhi ni vanhu lava vulavulaka ririmi leri va ri hundzuluxelaka. Hi va nkhensa swinene vamakwerhu emisaveni hinkwayo hikwalaho ka minyikelo ya vona.” I ntiyiso, tiprojeke leti to aka ta humelela, hi nkhensa swinene minyikelo ya n’wina eka ntirho wa misava hinkwayo, leyi yo tala ya yona yi endliwaka hi ku tirhisa xiyenge lexi nge minyikelo donate.pr418.com.