Lembe ra 2020 ri ve ni timhangu to tala ta ntumbuluko naswona ntungu wa COVID-19 lowu hlaseleke misava hinkwayo wu sungule hi rona lembe leri. Xana Timbhoni ta Yehovha ti va pfune njhani lava khumbekeke?

 Hi lembe ra ntirho ra 2020, a Vahlanganisi va Komiti ya Huvo Leyi Fumaka va nyike mpfumelelo wo tirhisa mali yo ringana 28 miliyoni wa tidolara b eka ntirho wo phalala. Sweswo swi endle leswaku vanhu vo hundza 200 lava weriweke hi timhangu va phalariwa, ku katsa ni lava weriweke hi ntungu wa COVID-19, lava hlaseriweke hi swidzedze, lava weriweke hi ndhambi eAfrika, lava pfumalaka swakudya eVenezuela ni lava xanisekaka hikwalaho ka dyandza eZimbabwe. Minyikelo yi pfunile leswaku ku xaviwa swakudya, mati, ndhawu yo tshama, nhundzu yo lunghisa miako, swiambalo, swa vutshunguri, nhundzu yo basisa ni ku aka miako. Xiya swikombiso swi nga ri swingani swa ntirho wo phalala.

 COVID-19. Ntungu wu khumbe vamakwerhu vo tala emisaveni hinkwayo emirini, emiehleketweni ni hi tlhelo ra timali. Leswaku ku pfuniwa vamakwerhu lava, Tikomiti to Phalala (Disaster Relief Committees [DRCs]) leti tlulaka 800, ti simekiwile emisaveni hinkwayo. Tikomiti leti ti khathalela swilaveko swa vamakwerhu ni ku yisa swiviko eka Vahlanganisi va Komiti leswaku va tiva mphalalo lowu lavekaka.

 Lembe hinkwaro, va DRCs va pfune vo tala leswaku va kuma swakudya, mati, swo ti basisa mavoko ni mirhi leyi lavekaka ya vutshunguri. Ematikweni man’wana, va DRCs va tlhele va tirhisana ni vakulu leswaku va pfuna vamakwerhu ku kuma mpfuno lowu humaka eka mfumo.

 Hambi ku ri lava nga riki Timbhoni va wu vonile ntirho wa hina wo phalala. Hi xikombo, Field Simwinga loyi a nga khomixinara wa xifundzha xa Nakonde eZambia, u byele vamakwerhu a ku: “Ha khensa swinene hileswi mi tinyikeke nkarhi wo phalala mindyangu leyi lavaka mpfuno.”

 Ku Pfumaleka Ka Swakudya eAngola. Ntungu wa COVID-19 wu endle leswaku swakudya swi kayivela ni ku tlhela swi durha eAngola. Vamakwerhu vo tala a swi va tikela ku xava swakudya.

 Rhavi ra le Brazil ri komberiwe leswaku ri pfuna vamakwerhu hi ku va yisela swakudya. Leswaku va kota ku yi tirhisa hi vutlhari mali yo phalala, vamakwerhu va lave ndlela yo chipa yo xava swakudya ni ku swi rhumela eka vamakwerhu. Saka rin’we a ri durha kwalomu ka 22 wa tidolara loko va ri xava ni ku ri rhumela kambe ntiko wa rona a ku ri 20 wa tikhilogiramu (44 lb) laha endzeni ka rona a ku ri na rhayisi, tiboncisi ni mafurha yo sweka. Hi siku ku rhumeriwe masaka ya kwalomu ka 33 544, leswi endlaka nhlayo ya 654 wa tilodi. Swakudya sweswo swi pfune vanhu vo hundza 50 000!

 Xana vamakwerhu va titwa njhani hi ntirho lowu wo phalala? Alexandre loyi a tshamaka endhawini leyi nga yoxe eAngola, u ri: “Lebyi i vumbhoni lebyi nga lo tlangandla, bya leswaku Yehovha wa ndzi rhandza naswona a ndzi swanga. Ndzi ni nhlangano wa Yehovha lowu ndzi rhandzaka swinene!” Mariza, manana loyi a kurisaka n’wana a ri yexe, u ri: “Yehovha u xi twile xirilo xa mina. Ndza n’wi khensa swinene ni nhlangano wakwe!”

 Ku Phalala eKa Dyandza Leri nga eZimbabwe. Hi lembe ra ntirho ra 2020, tiko ra Zimbabwe ri ve ni dyandza leri siyeke timiliyoni ta vanhu ti ri karhi ti sika hi ndlala. Timbhoni leti ringanaka gidi ta le Zimbabwe a ti sika hi ndlala.

 Ku simekiwe ntlhanu wa ti DRC leswaku ti pfuneta eku phalaleni ka vamakwerhu hi swakudya. Vahuweleri lava ringanaka dzana va pfunetile hi ku layicha swakudya, tinhundzu ni ku lombisa timovha ta vona leswaku ti tirhisiwa. c Hi nkarhi wolowo wa lembe ra ntirho wa 2020, ku tirhisiwe mali ya kwalomu ka $691 561 leswaku ku phalariwa vanhu vo hundza 22 700!

 Mikarhi yin’wana vamakwerhu a va ha ku heleriwa hi swakudya loko mphalalo wu fika. Loko swakudya swi fika, vamakwerhu va dzunise Yehovha. Van’wana a va namba va sungula ku yimbelela tinsimu ta Mfumo.

 Emugangeni wun’wana, tinoni timbirhi ta Timbhoni ti ye enhlengeletanweni ya vaakatiko leyi a yi bula hi mphalalo lowu humaka eka nhlangano lowu nga riki wa mfumo (nongovernmental organization [NGO]). Kambe a wu kucetela swa tipolitiki eka lava lavaka mphalalo, kutani tinoni teto ti teke xiboho xo ala mphalalo wolowo. Loko va ri karhi va famba, va tlhaviwe hi marito va tlhela va byeriwa leswi: “Mi nga ha vuyi eka hina mi ta kombela swakudya!” Kambe endzhaku ka mavhiki mambirhi, vamakwerhu va fike emugangeni wolowo ivi va phalala tinoni teto hi swakudya, hi nkarhi wolowo mphalalo wa NGO a wu nga se fika!

 Ntirho wo phalala eZimbabwe wu nyikele vumbhoni bya kahle ngopfu. Hi xikombiso, xiya ntokoto wa Prisca loyi a tshamaka emugangeni lowutsongo. Hambileswi dyandza ri tikiseke swiyimo, Prisca a a tshama a ri eku chumayeleni hi Ravunharhu ni hi Ravuntlhanu, hambi ku ri hi nguva yo rima. Vaakelani vakwe va n’wi sandze va ku: “U ta dlayisa ndyangu wa wena hi ndlala hikwalaho ka ku chumayela ka wena.” Prisca a a va hlamula hi ndlela leyi: “Yehovha a nga se tshama a tsandzeka ku khathalela malandza yakwe.” Swi nga se ya kwihi, u kume mphalalo lowu humaka eka nhlangano wa Yehovha. Leswi swi hlamarise vaakelani vakwe lava endzhaku va nga te: “Xikwembu a xi se tshama xi ku fularhela, kutani hi lava ku dyondza swo tala hi xona.” Vaakelani vakwe lava ringanaka nkombo, sweswi hi vulavulaka se va yingisela tinhlengeletano ta vandlha leti haxiwaka eka xiyanimoya.

 Leswi makumu ma nga kwala nyongeni, ha ha ta ya hi weriwa hi timhangu ta ntumbuluko. (Matewu 24:3, 7) Minyikelo ya n’wina ya malwandla leyi nyikeriwaka hi tindlela to hambanahambana leti kumekaka eka donate.pr418.com ya tlangeriwa swinene. Yi ta tirhisiwa kahle leswaku yi phalala lava lavaka mpfuno wa leswi va swi pfumalaka.