“Emalembeni ma nga ri mangani lama hundzeke, a hi nga ta swi ehleketa leswaku a hi ta kuma tidyondzo ta Bibele hi ku tirhisa JW Layiburari app.” Xana u pfumelelana na yona mhaka leyi? Marito wolawo a ma ri xiphemu xa mbulavulo lowu tiyisaka nhlana lowu nyikeriweke hi Geoffrey Jackson eka Xiviko Xa 2020 Xa Huvo leyi Fumaka #6. U ye emahlweni a ku: “Kambe sweswi ha tivutisa leswaku a hi ta swi kotisa ku yini ku kuma tidyondzo ta Bibele hi nkarhi lowu wa xitsongwatsongwana loko a hi nga ri na yona app leyi. Eka malembe lama hundzeke, Yehovha a ri karhi a hi hlomisela swiyimo swo fana ni leswi.”

 Xana Yehovha a a hi hlomisa njhani? Xana i yini leswi katsekeke eka ku vumba JW Layiburari app naswona a ku laveka yini leswaku yi kota ku tirha kahle ni ku tshama yi ri exiyin’weni lexinene?

 Hi May 2013, Huvo leyi Fumaka yi kombele MEPS Programming, eka ndzawulo ya yindlunkulu ya misava hinkwayo leswaku va endla app leyi nga ni Vuhundzuluxeri Bya Misava Leyintshwa lebyi pfuxetiweke. Paul Willies loyi a tirhaka hi MEPS Programming u ri: “A hi nga si tshama hi humesa app ya le fonini eka switolo swo xavisa ti app. Kambe hi hlanganile tanihi ntlawa leswaku hi tshika ku endla mitirho yin’wana ivi hi tirhisana ni tindzawulo tin’wana leswaku hi kunguhata ku endla app ni leswi lavekaka eka yona. A hi tshamela ku khongela naswona Yehovha u hi pfunile leswaku eka nhlangano wa lembe ni lembe hi kota ku humesa app leyi endzhaku ka tin’hweti ta ntlhanu ntsena!”

 Ntlhontlho wun’wana a ku ri ku cinca app leyi leswaku yi va layiburari leyi nga ni tibuku to tala leti kumekaka hi tindzimi to tala. Loko ku fika January 2015, tibuku to tala ta Xinghezi se a ti kumeka eka app naswona endzhaku ka tin’hweti ta tsevu, lava tirhisaka app leyi a va ta swi kota ku kopa tibuku teto hi tindzimi ta madzana.

 Ku sukela kwalaho, vamakwerhu va engetele swo tala eka app leyi hi ku chela tivhidiyo, va hlengeleta tibuku ni ku chela tinsimu ni tivhidiyo ta le tinhlengeletanweni ta vandlha swi va endhawini yin’we naswona va endle swi koteka leswaku vatirhisi va app va nghena eka Nkongomiso Wo Endla Ndzavisiso hi ku tirhisa tsalwa ra le Bibeleni.

 Layiburari ya JW yi pfuriwa eka switirhisiwa swa elektroniki swo ringana 8 wa timiliyoni siku ni siku ni ku pfuriwa eka swo tlula 15 wa timiliyoni n’hweti ni n’hweti! Xana ku laveka yini leswaku yi tirha kahle eka switirhisiwa sweswo? Makwerhu Willies u ri: “Ntirho wa app a wu heli. Hi ya emahlweni hi chela leswintshwa ni ku endla leswaku yi olova ku yi tirhisa ni ku vuyerisa vatirhisi va yona. Leswi michini ya switirhisiwa swa elektroniki yi tshamelaka ku pfuxetiwa, na hina a hi fanele hi endla ku cinca loku nga ta endla leswaku app yi tshama yi ri enkarhini. A hi fanele hi tlhela hi yi hlayisa ni ku engetela swin’wana eka software ya hina tanihi leswi tibuku ni tivhidiyo a swi ya swi kumeka eka JW Layiburari.” Leswi kumekaka eka JW Layiburari hi tindzimi to hambanahambana i tibuku to ringana 200 000 ni tinhlokomhaka leti ngo yingiseriwa kunene kumbe tivhidiyo to tlula 600 000!

 Leswaku app leyi yi tshama yi ri exiyin’weni xa kahle, ku laveka swo tala ku tlula michini ya tikhompyuta. Ku fanela ku xaviwa ti layisense ta ti software tin’wana ta tikhomphyuta. Hi lembe, layisense yin’we a yi durha 1 500 wa tidolara ta le Amerika. Nakambe hi lembe, Progreme ya MEPS a yi koxa 10 000 wa tidolara ta le Amerika eka switirhisiwa swo huma eka tikhampani to hambanahambana ku endlela leswaku app yi tirha kahle eka tikhomphyuta, ti-tablet ni le ka tifoni.

 JW Layiburari yi hungute mali leyi a yi tirhisiwa eka ku kandziyisa, ku endla tibuku ni ku ti yisa emavandlheni. Hi xikombiso, xiya xibukwana xa ku Kambisisa Matsalwa Siku Ni Siku. Hi kandziyise kwalomu ka 12 wa timiliyoni ta tikopi ta xibukwana xa ku Kambisisa Matsalwa Siku Ni Siku xa 2013. Kambe eka xa 2020, hi kandziyise ntsena kwalomu ka ntlhanu wa timiliyoni ta swibukwana hambileswi a ho va na kwalomu ka 700 000 wa vakandziyisi emisaveni hinkwayo. Hikwalahokayini ku ve ni ku cinca? Vamakwerhu vo tala sweswi va hlaya tsalwa ra siku eka JW Layiburari. a

 JW Liyiburari yi pfuna vatirhisi va yona hi tindlela to tala. Geneviève wa le Canada, u boxa ndlela leyi app leyi yi n’wi pfuneke hayona leswaku a tshama a ri eku dyondzeni nkarhi ni nkarhi. U ri: “A ndzi tshembi leswaku a ndzi ta swi kota ku dyondza mixo ni mixo hileswi a ndzi ta boheka ku rhanga ndzi hlengeleta tibuku. hi ku tirhisa app leyi, ndzi kota ku kuma leswi ndzi swi lavaka eka tablet ya mina. Kambe ku tshamela ku dyondza hi ndlela leyi nkarhi ni nkarhi, swi tiyise ripfumelo ra mina ni ku ndzi tshineta eka Yehovha.”

 Nkoka wa app ya JW Layiburari wu vonake ngopfu hi nkarhi wa ntungu wa COVID-19. Charlyn wa le United States u ri: “Se ku hundze lembe ndzi nga si vona kopi leyintshwa ya tibuku ta hina hikwalaho ka leswi ku nga ni ntungu wa COVID-19 emisaveni hinkwayo. Kambe JW Layiburari yi hi nyike leswi hi swi lavaka leswaku hi tiyisa ripfumelo ra hina naswona ndza n’wi khensa Yehovha hikwalaho ka lunghiselelo leri ra rirhandzu.”

 Vanhu vo tala va ti twa ku fana na Faye wa le Philippines. U ri: “Ndzi tirhisa app yin’we ntsena leswaku ndzi tshama ndzi ri ekusuhi na Yehovha. Hi yona ndzi sungulaka ndzi yi pfula nimixo. Hi yona ndzi yi yingiselaka loko ndzi endla mitirho ya le kaya. Ndzi lunghiselela hi yona tinhlengeletano ta vandlha. Ndzi lunghiselela hi yona loko ndzi lava ku ya dyondza na munhu Bibele. Ndzi hlalela tivhidiyo leti nga endzeni ka yona loko ndzi nga endli nchumu. Loko ndzi fole layini, ndzi hlaya hi yona tibuku kumbe Bibele. Hakunene i nchumu wa risima.”

 Nakambe app leyi yi vonake yi ri ya risima ngopfu entirhweni wo chumayela. Hi xikombiso, makwerhu un’wana wa xisati wa le Cameroon a ri entirhweni wo chumayela naswona a a lava tsalwa leri a voneke ri tirhisiwa hi makwerhu un’wana wa xisati eka mavhiki lama nga hundza. Kambe a nga ha tsundzuki leswaku a ri kumeka kwihi. U ri: “Ndza tsaka hileswi ndzi tsundzukeke marito matsongo ya le ka rona. Ndzi pfule app ivi ndzi ya eka Bibele kutani ndzi secha marito wolawo. Hi ku hatlisa, ndzi ri kumile. Sweswi hi ku tirhisa app, ndzi kota ku kuma matsalwa yo tala lawa ndzi ma rivalaka.”

 Minyikelo ya n’wina leyi mi yi nyikelaka hi ku tirhisa tindlela leti kumekaka eka donate.pr418.com yi endla swi koteka ku humelerisa, ku hlayisa ni ku antswisa JW Layiburari app leswaku yi tirhisiwa hi vamakwerhu emisaveni hinkwayo. Ha yi khensa swinene minyikelo ya n’wina ya ku tirhandzela.

1. October 2013—Ku humesiwa ka app ya Vuhundzuluxeri Bya Misava Leyintshwa lebyi pfuxetiweke

2. January 2015—Tibuku tin’wana ti sungule ku kumeka hi Xinghezi naswona ti landzeriwe hi tin’wana ta tindzimi ta madzana

3. November 2015—Ku cheriwe swo khwatihata

4. May 2016—Ku cheriwe tab ya tinhlengeletano ta vandlha

5. May 2017—Ku cheriwe xo kopa tinotsi

6. December 2017—Ku cheriwe swo pfuneta ku Dyondza Bibele

7. March 2019—Ku endliwe swi koteka ku dawuniloda tibuku leti ngo yingiseriwa kunene, ku hlalela tivhidiyo, ni ku pfula Nkongomiso Wo Endla Ndzavisiso

8. January 2021—Ku cheriwe swo tala leswi kumekaka eka Tiphine Hi Vutomi Hilaha Ku Nga Heriki!