Xiendlakalo xin’wana lexi Timbhoni ta Yehovha a ti xi langutele hi mahlongati lembe leri i ku humesiwa ka Xiyenge 1 xa vhidiyo leyi nge, Mahungu Lamanene Hi Ku Ya Hi Yesu. Vanhu va timiliyoni se va xi vonile. Naswona i xiyenge xo sungula xa swiyenge swa 18! I yini leswi endliwaka exihundleni leswi endlaka leswaku ku humesiwa ka nxaxamelo lowu ku koteka, naswona wena u wu seketela njhani ntirho lowu?

 Erhavini ra le Australasia, laha swo tala swa swiphemu swa nxaxamelo wa vhidiyo leyi nge, Mahungu Lamanene swi rhekhoderiwaka kona, kwalomu ka 50 ku ya eka 80 wa vanhu va va kona loko xiphemu ha xin’we xi rhekhodiwa. a Vatlangi ni lava seketelaka ntirho wo rhekhoda va nyikiwa swakudya swa ninhlikanhi, swo lalela ni swinambunambu. Swakudya leswi nga ta dyiwa swi hleriwa ka ha ri ni nkarhi. Esther, loyi a tirhaka eka Ndzawulo ya Swakudya, u ri: “Hi xava swakudya eka switolo swo hambanahambana leswaku hi kuma swakudya leswi akaka miri hi nxavo wa le hansi. Hi cincacinca maswekelo leswaku ku nga vi ni swakudya leswi lahliwaka.” Siku rin’wana ni rin’wana, ku tirhisiwa kwalomu ka 72 wa tirhandi (ZAR) leswaku munhu ha un’we a kuma swakudya.

 Vatlangi ni lava seketelaka ntirho wo rhekhoda a va lavi swakudya ntsena kambe va lava ni ku sirheleriwa. Va sirheleriwa eka yini? Masiku yo tala eAustralia ku va ku nga ri na mapapa naswona ka kufumela hambiswiritano ku ni miseve yo tala ya dyambu leyi nga ni khombo. Leswaku va nga hisiwi hi dyambu ni leswaku va nga karharisiwi hi ku hisa, lava seketelaka ntirho wo rhekhoda va pfuneta hi ku dzima matende ni ku lulamisa tindhawu leti nga ni tifene naswona va tiyiseka leswaku swilo swo fana ni tisunscreen, tiamburela ni mati swi kumeka hi ku olova. Kevin, loyi a tirhaka eka Ndzawulo ya Mpfumawulo ni Tivhidiyo u ri: ”Vo tala lava endlaka ntirho lowu hi lava pfunetaka eBethele. Va endla mitirho leyi ni yin’wana hi ku titsongahata naswona va tsakile. A hi nga ta swi kota ku endla ntirho lowu va nga ri kona.”

 Tivhidiyo tin’wana a swi koteki ku ti rhekhodela erhavini, hambi ku ri ku ti rhekhodela endzhaku ka muako kumbe exitudiyo. Hikwalaho ka sweswo, tivhidiyo ti rhekhoderiwa endhawini yin’wana. Leswaku va kota ku rhekhoda tivhidiyo ta le mikarhini ya Bibele laha ku nga riki ni tintambhu ta gezi, mapatu lama nga ni xikontiri ni tiyindlu ta manguva lawa, vatlangi ni lava seketelaka ntirho wo rhekhoda hakanyingi va boheka ku teka riendzo va ya etindhawini ta le kule ni doroba. Mpahla ya vona ni switirhisiwa swi fanele swi pakiwa, swi tleketliwa swi tlhela swi vekiwa laha ku hlayisekeke endhawini yo rhekhodela eka yona. Loko va nga si sungula ku rhekhoda, vahlanganisi lava pfunetaka ku endla tivhidiyo va tiyiseka leswaku ku ni tijanareta, mati lama tengeke yo nwa ni swihambukelo. Vatlangi ni lava seketelaka ntirho wo rhekhoda va amukeriwa emakaya ya Timbhoni ta kwalaho leti nga ni malwandla, eka titrailer, etihotela kumbe eka ticabin.

 Ku rhekhodela etindhawini tin’wana swa durha, swi dya nkarhi naswona swa karharisa. Kutani hi 2023, Huvo leyi Fumaka yi pasise ku xaviwa ka switirhisiwa swa thekinoloji leswi cinca cincaka makombiselo ya tivhidiyo leswi koxaka 44,7 wa timiliyoni ta tirhandi (ZAR). Thekinoloji leyi yi kota ku humesa swifaniso swa tivhidiyo leswi vonakaka kahle ni ku tirhisa mavoni lama endlaka swifaniso sweswo swi vonaka onge hi le handle. Hikwalaho ka sweswo, hakanyingi hi nga papalata tindhawu leti durhaka to rhekhodela eka tona. Darren, xirho xa Komiti Ya Rhavi ra le Australasia, u ri: “Ku rhekhoda hi switirhisiwa swa thekinoloji leswi cinca cincaka makombiselo ya tivhidiyo swi endla leswaku vatlangi va nga karhali naswona swi endla leswaku lava rhekhodaka va teka xiphemu xin’we xa vhidiyo ko tala. Hi xikombiso, loko a hi rhekhodela ehandle, a hi ta va ni timinete ti nga ri tingani to rhekhoda ku pela ka dyambu ri nga si pela. Kambe hi ku tirhisa switirhisiwa swa thekinoloji leswi cinca cincaka makombiselo ya tivhidiyo hi nga swi kota ku kombisa ku pela ka dyambu ko tala kukondza vhidiyo yi huma kahle.”

 Ku laveka madzana ya vatlangi ni vanhu vo pfuneta leswaku ku rhekhodiwa xiyenge ha xin’we xa vhidiyo leyi nge, Mahungu Lamanene. Xana va titwa njhani hi malunghiselelo hinkwawo ya ku va khathalela?

 Amber, loyi a fambeke ku tlula 700 wa tikhilomitara ku suka ekaya rakwe le Melbourne leswaku a ya tirha eka projeke leyi, u tsale a ku: “Ku sukela loko ndzi fikile erivaleni ra swihahampfhuka, vamakwerhu eBethele va ndzi khathalele kahle. Vamakwerhu vo tala va le Bethele va ndzi rhambile leswaku ndzi ta dya ni ku nwa tiya na vona. Endhawini leyi hi rhekhodelaka eka yona, hinkwavo va endle ndzi titwa ndzi tshunxekile ni ku rhandziwa. Ndzi kume mikateko yo tala eka riendzo leri. A ndzi titwanga ndzi titsone swo karhi!”

 Derek u tirha ni ntlawa lowu endlaka tivhidiyo. U ri: “Tindzawulo to tala ti hi seketerile ku sukela eku sunguleni. Ndza va khensa vamakwerhu lava tirhiseke nkarhi, mali ni matimba ya vona eka projeke leyi. Va hi seketela, hi ku swi rhandza ni hi musa. Yehovha u hi katekisile hinkwerhu. Ndza tshemba leswaku a nga khathali hi vuyelo bya ntirho wa hina ntsena kambe wa khathala ni hi ndlela leyi hi endlaka ntirho wa hina hayona.”

 Ha wu tlangela nseketelo lowu mi hi nyikeke wona eka nxaxamelo lowu wa tivhidiyo hi ku tirhisa minyikelo ya n’wina, ku katsa ni leyi mi yi endleke hi ku tirhisa donate.pr418.com.