Yehovha wa swi rhandza ku dyondzisa vanhu vakwe. Hikwalaho ka sweswo nhlangano wakwe wu endle swikolo swo hlayanyana ku letela swichudeni leswaku swi kota ku endla swiavelo swa swona. Xin’wana xa swikolo swoleswo i Xikolo Xa Vachumayeri Va Mfumo (SKE). Emalembeni ya sweswinyana, nhlangano wa Xikwembu a wu teki tidyondzo leti dyondziwaka ti ri tona ta nkoka ntsena kambe ni miako leyi ku dyondzeriwaka eka yona. Xikongomelo nkulu i ku antswisa ndhawu leswaku valeteri va kota ku dyondzisa ni swichudeni swi kota ku dyondza kahle. Xana minyikelo ya wena yi hi pfuna njhani leswaku hi kota ku fikelela xikongomelo lexi?

 Ku ringana malembe yo tala, swikolo leswi hleriwaka hi nhlangano a swi khomeriwa eTiholweni ta Mfumo kumbe ta Tinhlengeletano. Kutani hikwalahokayini hi ake ni ku pfuxeta miako leyi engetelekeke leyi sweswi yi tirhiseriwaka ntsena swikolo leswi hleriwaka hi nhlangano? Xiya swivangelo swinharhu.

 Swilaveko leswikulu. Christopher Mavor, mupfuni wa Komiti Ya Ntirho Ya Huvo Leyi Fumaka u hlamusele a ku: “Tihofisi ta rhavi ti vike leswaku ku ni xilaveko lexikulu xa vamakwerhu va xinuna ni vaxisati ensin’wini. Hi xikombiso, hi 2019 rhavi ra le Brazil ri ringanyete leswaku ku laveka mathwasana ya le SKE ya kwalomu ka 7 600 leswaku ma langutela swilaveko swa nsimu ya le rhavini ra vona.” Rhavi ra le United States ri vike xilaveko xa maphayona lama fanelekaka lama nga letelaka van’wana ku chumayela eka tsima ro hlawuleka emadorobeni lamakulu, laha swikepe swi fikelaka kona ni le makhotsweni. Nakambe ku ni xilaveko lexikulu xa vamakwerhu lava nga tirhaka eka Ndzawulo Yo Pulana Ni Ku Aka ni Tikomiti to Vulavurisana ni Swibedlhele. Mathwasana ya le SKE ma nga pfuna eka swilaveko swo tano.

 Swichudeni leswi engetelekeke. Marhavi yo tala ma kume swikombelo ku suka eka swichudeni swo tala ku tlula leswi va nga kotaka ku swi amukela. Hi xikombiso, rhavi ra le Brazil ri amukele swikombelo swa lava lavaka ku ya eSKE swa kwalomu ka 2 500 hi lembe rin’we. Kambe hikwalaho ka leswi ku nga riki na ndhawu leyi eneleke yo khomela swikolo, rhavi ri kote ku amukela swichudeni swa 950.

 Ndhawu yo etlela ya kahle. Loko xikolo xi khomeriwa eHolweni ya Mfumo kumbe ya Tinhlengeletano, hi xitalo swichudeni swi amukeriwa emakaya ya vamakwerhu va kwalaho. Lunghiselelo rero ri tirha kahle etindhawini leti ku hleriwaka titlilasi ti nga ri tingani hi lembe. Kambe laha ku nga ni titlilasi to hlayanyana swi nga ha tika leswaku vamakwerhu va kwalaho va amukela swichudeni tin’hweti to tala elembeni. Kutani miako yi le kusuhi ni laha tlilasi yi khomeriwaka kona naswona yi endleriwe swichudeni ntsena.

 Muako lowu ku nga ni ndhawu yin’we yo dyondzela eka yona, ndhawu yo etlela ya valeteri ni swichudeni swa kwalomu ka 30 ku katsa ni tindhawu tin’wana swi nga koxa kwalomu ka timiliyoni to hlayanyana ta tidolara ta le Amerika hi ku ya hi ndhawu ni swiyimo swin’wana.

 Mikarhi yo tala swikolo swi akeriwa endhawini leyi miyeleke, ehandle ka doroba kambe ekusuhi ni laha swo famba swa mani na mani swi kumekaka kona. Xikolo xi akiwa laha ku nga ni nhlayo yo tala ya vahuweleri lava nga pfunaka hi nkarhi wa xikolo naswona va khathalela miako ni switirhisiwa.

 Miako leyi yi va yi ri ni tilayiburari, tindhawu to hlayela eka tona, tikhomphyuta, tiprintara ni switirhisiwa swin’wana. Hi mikarhi yo tala, ku va ni ndhawu leyi swichudeni ni valeteri va dyaka swin’we. Ku endliwa ndhawu leyi eneleke yo endla vutiolori ni ku hungasa eka yona.

 Ndhawu yo dyondzela eka yona yi endliwa hi ndlela yo hlawuleka. Troy loyi a tirhaka ni Ndzawulo Yo Pulana Ni Ku Aka eWarwick le New York u ri: “Hi kombele Ndzawulo Ya Swikolo Leswi Hleriwaka Hi Nhlangano ku hi pfuna hi aka titlilasi leti a ti ta antswisa ndhawu yo dyondzela eka yona. Vamakwerhu va kwalaho va hi nyike nkongomiso wa ndlela leyi titlilasi a ti fanele ti akiwa ha yona ku katsa ni mavoni ni leswi a swi laveka ku endla swa mpfumawulo ni tivhidiyo.” Mayelana ni ku hoxa swa mpfumawulo, Zoltán muleteri eSKE wa le Hungary, u ri: “Eku sunguleni a hi nga ri na swikurisamarito kutani mikarhi yo tala a hi tsundzuxa swichudeni ku tlakusa rito loko swi vulavula. Kambe leswi sweswi ku nga ni swikurisa marito etafuleni ha rin’we, a swa ha boheki ku tlakusa rito!”

 Ku antswisiwa ka miako swi va pfune njhani valeteri ni swichudeni? Angela loyi a yeke eSKE ePalm Coast, eFlorida le U.S.A, u ri: “I ndhawu leyi rhuleke swinene. Swilo hinkwaswo swi hleriwe kahle ku katsa ni ndlela leyi titlilasi ti endliweke hayona ni makamara ya hina kutani sweswo swi endla leswaku hi kota ku hlaya ni ku dyondza kahle.” Csaba muleteri eHungary, u tsakisiwa hi ku dya swin’we ni swichudeni. U vula leswaku loko va ri karhi va dya swin’we, “swichudeni swa tiphofula swi hi byela mintokoto ya swona. Hi ndlela yoleyo hi kota ku swi tiva kahle swichudeni. Hikwalaho ka sweswo, hi kota ku swi dyondzisa hi ndlela leyi fambisanaka ni swilaveko swa swona.”

 Swichudeni ni valeteri va teka ku antswisiwa ka miako tanihi nkateko lowu humaka eka ‘Muleteri wa hina Lonkulu’ Yehovha. (Esaya 30:20, 21) Makwerhu wa xisati wa le Philippines loyi a yeke eSKE eka muako lowu antswisiweke wu va xikolo, u ri: “Ndhawu yoleyo yi hi tsundzuxe leswaku a hi ngo va swichudeni ntsena kambe a hi ri vaendzi vo hlawuleka va Yehovha. U lava hi tiphina loko hi ri karhi hi dyondza Rito rakwe.”

 Miako ya swikolo yi nga akiwa, yi antswisiwa ni ku khathaleriwa hikwalaho ka minyikelo ya n’wina, leyi yo tala ya yona yi nyikeriwaka hi donate.pr418.com. Ha ku khensa swinene ku hanana ka n’wina.