Hi March 2020, loko va World Health Organization va tivise ku COVID-19 i ntungu lowu nga ta hlasela misava hinkwayo, vo tala a va nga ehleketi leswaku xitsongwatsongwana lexi xi nga heta lembe xa ha ri kona. Ntungu lowu wu endle leswaku vanhu va timiliyoni laha ku katsekaka ni Timbhoni ta Yehovha, va vaviseke swinene emirini, emiehleketweni ni hi tlhelo ra timali. Xana Timbhoni ta Yehovha ti swi kote njhani ku hlengeleta ni ku endla ntirho wo phalala hi nkarhi lowu wo tika?

 Hi nkarhi wa ntungu wa COVID-19, Vahlanganisi va Komiti ya Huvo Leyi Fumaka ya Timbhoni ta Yehovha, va simeke Tikomiti to Phalala (Disaster Relief Committees [DRC]) leti tlulaka 950 emisaveni hinkwayo. Eswiyin’weni swin’wana, a va phalala ni vaakelani va le kusuhi naswona Timbhoni a ti kuma ni mpfuno lowu humaka eka mfumo. Va DRC va hlengelete mphalalo lowu fikeleleke tindhawu to tala.

 Hi xikombiso, twana leswi endliweke eParaguay. Phephahungu rin’wana ri vike leswaku leswi ntungu wu hoxeke xandla eka ku wa ka ikhonomi, “nhlayo ya vanhu vo tala lava tshamaka eParaguay va sika hi ndlala emakaya ya vona.” Kambe va DRC eParaguay se a va sungule ku phalala hi mabokisi lawa a ma ri ni nhundzu leyi a yi ta tirhisiwa mavhiki mambirhi, yo tanihi swakudya leswi eneleke, swisibi swo hlamba mavoko ni ti-sanitize eka mindyangu leyi nga ni vanhu va mune. Bokisi ha rin’we a ri durha kwalomu ka tidolara ta 30 ta le Amerika.

 Xana vatirhi vo phalala va tisirhelela njhani vona ni van’wana eka COVID-19? Va ambala ti-mask ni ku siya mpfhuka wo lehanyana loko va ri ni van’wana. Va tlhela va tiyiseka leswaku tikhampani leti va xavaka eka tona swakudya, ti fanele ti swi chicha laha swi nga ta basisiwa kona naswona ti fanele ti landzelela nawu wo tisirhelela. Sweswo swi katsa ni ku tiyiseka leswaku vaamukeri va swona va ambala swo tisirhelela, va basisa ni ku sanitize timovha ta vona ni ku veka mabokisi etindhawini leti sirhelelekeke. Xo hetelela, lava swi chichaka, a va tshineli ngopfu ekusuhi ni vamakwerhu lava nga ta swi amukela.

 Hi January 2021, Vahlanganisi va Komiti va nyike mpfumelelo wo tirhisa mali leyi tlulaka 25 miliyoni wa tidolara ta Amerika leswaku yi phalala eka ntungu wa COVID-19. Marhavi ni va DRC va tirhisa munyikelo lowu hi ndlela leyinene naswona va tirha hi matimba eka ku vulavurisana ni vaxavisi leswaku va xava leswi lavekaka hi mali ya le hansi. Hi xikombiso, eChile, vamakwerhu lava nga eka ntirho wo phalala a va lava ku xava ti-lentil leti tikaka tikhilogiramu ta 750 (1,653 lb). Kambe ntsengo wa tona a wu tlakusiwile loko nh’weti yi hela! Loko ku hundze tiawara timbirhi va twane hi ku xaviselana hi ntsengo lowu durhaka, muxavisi u va byele leswaku ku ni muxavi loyi a tlheriseke ti-lentil leti a a ti xavile. Kutani u va xavisele hi mali yo chipa leyi a ti xavisiwa hi yona khale!

 Kambe loko vamakwerhu va landza ti-lentil teto, muxavisi u ringete ku herisa ntwanano wa vona hi ku va hehla hileswaku va yisa swakudya etindhawini tin’wana swi nga ri enawini hilaha mihlangano leyin’wana yi endlaka hakona. Vamakwerhu va endle xikhongelo xo koma, kutani un’we wa vona a hlamusela muxavisi leswaku vandlha rin’wana ni rin’wana ri tise nhlayo ya lava lavaka mpfuno. Va tlhele va vula leswaku leswi mindyangu ni mindhavuko ya lava pfuniwaka yi nga faniki, bokisi ha rin’we ri ta va ni swilo leswi lavekaka endyangwini wo karhi lowu ri nga ta yisiwa eka wona. Xo hetelela, va n’wi byele leswaku minyikelo hinkwayo ni ntirho lowu endliwaka hi Timbhoni ta Yehovha, swi endliwa hi ku tirhandzela. Muxavisi u hlamarile swinene! A nga lo va hungutela nxavo ntsena, u tlhele a nyikela hi 400 wa tikhilogiramu (882 lb) wa ti-lentil.

 Ekaya ka noni leyi vuriwaka Lusu wa le Liberia, va tshama va ri ntlhanu. Loko siku rin’wana va ri karhi va dya swakudya swa nimixo naswona va ri eku hlayeni ka ndzimana ya siku, ntukulu wa Lusu loyi a nga ni malembe ya nkombo u xiye leswaku a ka ha ri na swakudya ekaya. U vutise kokwana wakwe a ku: “Se hi ta dya yini?” Lusu u n’wi byele leswaku se u khongerile hi mhaka leyi naswona wa tshemba leswaku Yehovha u ta va khathalela. Hi siku rero ninhlikanhi, Lusu u foneriwe hi vakulu va le vandlheni va n’wi byela leswaku a ta teka swakudya swo va phalala. Lusu u ri: “Ntukulu wa mina u vule leswaku wa swi tiva ku Yehovha wa swi twa swikhongelo ni ku swi hlamula hikuva u hlamule xikhongelo xa mina.”

 Wansati un’wana wa le Democratic Republic of Congo, i muakelani wa ndyangu lowu nga Timbhoni ta Yehovha. Endzhaku ka loko a va vone va ri eku amukeleni ka swakudya leswi humaka eka vamakwerhu, u te: “Loko ntungu wu hela, hi ta va Timbhoni ta Yehovha hikuva va khathalele vamakwavo wa vona hi nkarhi lowu wo tika.” Nuna wakwe u n’wi vutise a ku: “Xana u lava ku va Mbhoni ya Yehovha hikwalaho ka bege ya rhayisi?” U n’wi hlamule a ku: “A swi tano, kambe bege leyi u yi voneke ya rhayisi yi kombisa rirhandzu ra ntiyiso.”

 Timbhoni ta Yehovha ti kote ku khathalela swilaveko swa vamakwerhu lava pfumalaka hi nkarhi lowa ntungu hikwalaho ka minyikelo ya n’wina leyi humaka embilwini. Ha khensa swinene hileswi mi nyikelaka hi ku tirhisa maendlelo lama hlamuseriweke eka donate.pr418.com.