Yesu u byele vadyondzisiwa va yena a ku: “Mi ta va timbhoni ta mina . . . ku ya fika emakumu ka misava.” (Mitirho 1:8) Namuntlha Timbhoni ta Yehovha ti tirha hi matimba leswaku ti endla tano. Hambiswiritano, ka ha ri ni matiko yo tala lama nga ni vanhu vo tala lava faneleke va chumayeriwa. Nakambe ku ni matiko man’wana lama nga ni nhlayo yitsongo ya Timbhoni. (Matewu 9:37, 38) Xana hi endla yini leswaku hi kota ku fikelela vanhu vo tala?

 Leswaku hi kota ku hetisisa xileriso xa Yesu, Komiti Ya Ntirho ya Huvo leyi Fumaka ya Timbhoni ta Yehovha yi rhumele varhumiwa etindhawini leti ku nga ni xilaveko emisaveni hinkwayo. Sweswi, ku ni varhumiwa va 3 090, lava chumayelaka emisaveni hinkwayo. a Vo tala va vona va kume ndzetelo exikolweni xa Bibele, xo tanihi Xikolo xa Vachumayeri va Mfumo. Varhumiwa va tiyimisele ku sukela makaya ya vona va rhurhela ematikweni man’wana. Hikwalaho ka leswi va rhandzaka Yehovha, ndzetelo lowu va wu kumeke ni ntokoto wa vona swi endla leswaku va tirha hi ku tshembeka entirhweni wo chumayela ni ku vekela lava ha ku sungulaka ku chumayela xikombiso lexinene.

 Eka hofisi yin’wana ni yin’wana ya rhavi, Ndzawulo Ya Vamakwerhu Lava Nga eNsin’wini eka Ndzawulo ya Ntirho va tirhisana ni Komiti ya Rhavi leswaku va khathalela swilaveko swa varhumiwa hi ku va nyika tiyindlu leti nga exiyin’weni lexinene, hi ku va khathalela hi swa rihanyo ni ku va nyika swimalana swo tixavela leswi va swi lavaka. Hi lembe ra ntirho ra 2020, Timbhoni Ta Yehovha ti tirhise mali ya kwalomu ka 27 miliyoni wa tidolara ta Amerika, leswaku va hlayisa varhumiwa. Hi khensa lunghiselelo leri hikuva varhumiwa va tirhisa matimba ya vona hinkwawo leswaku va tirha ntirho lowu wo chumayela ni ku tlhela va tiyisa vamakwerhu emavandlheni lawa va nga eka wona.

 Xana varhumiwa va pfunete njhani eka ntirho wo chumayela? Frank Madsen, loyi a tirhaka eRhavini ra Malawi u ri: “Leswi varhumiwa lava a va ri ni xivindzi ni vuswikoti, va pfune vamakwerhu emavandlheni leswaku va kota ku chumayela ni le tindhawini leti a swi nga koteki, ku fana ni le tindhawini leti biyeleriweke ni laha ku vulavuriwaka ririmi rimbe. Nakambe ku tirha ka vona hi matimba leswaku va dyondza ririmi ni ndhavuko swa ndhawu yoleyo swi vekela van’wana xikombiso lexinene ni ku hlohlotela vantshwa leswaku va tirha hi matimba va tlhela va tsakela ku nghenela ntirho wa nkarhi hinkwawo. Hi khensa Yehovha hi varhumiwa lava.”

 Xirho xa Komiti ya Rhavi xa le tikweni rin’wana xi ri: “Varhumiwa i swikombiso leswinene leswi kombisaka leswaku vanhu va Yehovha va ni vun’we emisaveni hinkwayo. Hambi vanhu lava nga riki Timbhoni, va swi xiya leswaku a hi hambanisiwi hi mindhavuko kambe tidyondzo ta Bibele hi tona ti hi pfunaka leswaku hi va ni vun’we naswona ha tiphina tanihi vamakwerhu.”

 Xana varhumiwa va va pfuna njhani vahuweleri lava tirhaka na vona nsimu? Paulo wa le Timor-Leste, wa wu tlangela ntirho wa varhumiwa lava nga le vandlheni ra ka vona. U ri: “Ndhawu leyi hi tshamaka eka yona yi hisa swinene. Kambe hambileswi varhumiwa hakanyingi va humaka etindhawini leti titimelaka, sweswo a swi va siveli ku ya emahlweni ni ntirho wo chumayela. Mixo wun’wana ni wun’wana va va kona leswaku va lunghiselela ntirho wo chumayela. Ndzi tshamela ku va vona va endla maendzo yo vuyela ninhlikanhi dyambu ri ri karhi ri vavula ni ku chumayela nimadyambu. Va pfune vanhu vo tala ku tiva ntiyiso ku katsa na mina. Hikwalaho ka ku tikarhata ka vona ni nkhinkhi lowu va nga na wona, va tirhisa vutomi bya vona hinkwabyo leswaku va tirhela Yehovha ni ku khutaza vandlha hinkwaro leswaku ri endla tano.”

 Ketti loyi a nga phayona ra nkarhi hinkwawo eMalawi, u tsundzuka vatekani va varhumiwa lava nga pfuna ndyangu wa yena, u ri: “Hi nkarhi lowu va nga tisiwa evandlheni ra ka hina a ndzi ri Mbhoni ndzi ri ndzexe ekaya. Va ndzi pfunile swinene naswona va ve vanghana va hina ekaya. Xikombiso xa vona lexinene xi pfune vana va mina va swi vona leswaku ku tirhela Yehovha swa enerisa swi tlhela swi tisa ntsako. Ndza va khensa varhumiwa lava hikuva vana va mina vanharhu se i maphayona ya nkarhi hinkwawo naswona nuna wa mina se u sungula ku va kona etinhlengeletanweni ta vandlha.”

 Xana mali yo hlayisa varhumiwa lava yi huma kwihi? Yi huma eka minyikelo ya vamakwerhu emisaveni hinkwayo, yin’wana ya yona yi nyikeriwa hi ku tirhisa website ya hina ya donate.pr418.com. Minyikelo leyi vanhu va yi nyikelaka hi ku tirhandzela ya tlangeriwa swinene.