Timbhoni ta Yehovha ti kuma mikandziyiso ni tivhidiyo leti sekeriweke eBibeleni eka switirhisiwa swa elektroniki ku tlula eku sunguleni. Kambe eka tindhawu tin’wana to tala vamakwerhu a va na yona Inthanete. Van’wana va tshama etindhawini leti ku tshamelaka ku famba gezi, laha Inthanete ya kona yi nonokaka kumbe laha ku pfumalaka Inthanete hi ku helela.

 Hambiswiritano, vamakwerhu vo tala namuntlha va swi kota ku dawuniloda mikandziyiso eka switirhisiwa swa elektroniki hambiloko va nga ri na Inthanete! Xana leswi swi kotekisa ku yini?

 JW Box i nchumu wutsongo lowu nyikiwaka mavandlha lama nga le tindhawini leti nga ni xiphiqo xa Inthanete. Nchumu lowu wu hoxiwa rhuta ni progreme ya khompyuta leyi endliweke hi Ndzawulo Ya Swa Tikhompyuta ya le Bethele naswona progreme leyi yi ni mikandziyiso ni tivhidiyo leswi nga eka jw.org. Xibokisana ha xin’we xi durha kwalomu ka $75 U.S.

 Vamakwerhu loko va ri eHolweni Ya Mfumo, va khoneketa switirhisiwa swa vona swa elektroniki eka JW Box kutani va dawuniloda mikandziyiso ni tivhidiyo. Hambi lava nga ni switirhisiwa swa khale kumbe leswi nga durhiki va nga swi kota ku khoneketa. Kambe ku vuriwa yini loko vandlha ri nga ri na Inthanete, swi kotekisa ku yini leswaku JW Box yi tshama yi ri ni mikandziyiso ya sweswinyana? Rhavi ri rhumela ti-USB leti taka ni swilo leswintshwa leswi nga eka Jw.org leswi fikaka swi hoxiwa eka JW Box naswona USB ha yin’we yi durha kwalomu ka $4 U.S.

 JW Box yi va pfune njhani vamakwerhu? Nathan Adruandra, tatana loyi a tshamaka eDemocratic Republic of Congo, u ri: “I khale ndzi ri karhi ndzi ringeta ku Dawuniloda drama leyi nge, ‘Oho Yehovha, . . . Ndzi Tshemba Wena’ ni leyi nge Tsundzuka Nsati Wa Lota. Kambe ndzi tsandzekile naswona sweswo swi ndzi hete matimba. Sweswi se ndza swi kota ku dawuniloda tivhidiyo leti eka foni ya mina naswona leswi swa hi pfuna tanihi vatswari ku dyondzisa vana va hina ku antswa.”

 Makwerhu loyi a pfunaka mavandlha ya le Nigeria ku seta JW Box u ri: “Vamakwerhu va teka JW Box yi ri nyiko leyi humaka eka Yehovha. Va tsake ngopfu hikuva sweswi swa va olovela ku dawuniloda mikandziyiso ni tivhidiyo eka Switirhisiwa Swo Pfuneta Ku Dyondzisa.”

 Ti JW Box to tlula 1 700 ti rhumeriwe vamakwerhu va le Afrika, eOceania, ni le Amerika Dzonga naswona ka ha endliwa malunghiselelo yo rhumela tin’wana eka mavandlha yo tala. Xana mali yo hakelela swilo leswi yi huma kwihi? Yi huma eka minyikelo ya ntirho wa misava hinkwayo leyi vo tala va yi nyikelaka hi ku tirhisa xiyenge lexi nge nyikela eka donate.pr418.com. Ha nkhensa ku hanana ka n’wina.