Xiphemu 4

Hosi Yo Sungula eIsrayele Ku Ya eVuhlongeni eBabilona

Sawulo u ve hosi yo sungula eIsrayele. Kambe Yehovha u n’wi lahlile, naswona Davhida u hlawuriwe ku va hosi ematshan’weni ya yena. Hi ta dyondza swo tala hi Davhida. Loko a ha ri muntshwa, u lwe ni xihontlovila lexi vuriwaka Goliyadi. Endzhakunyana u balekele Hosi Sawulo lowa mavondzo. Kutani Abigayele wo saseka u n’wi sivele ku endla swilo swo biha.

Hi ta tlhela hi dyondza swo tala hi Solomoni n’wana Davhida, loyi a veke hosi ya Israyele endzhaku ka Davhida. Eka tihosi tinharhu leto sungula ta le Israyele, yin’wana ni yin’wana ya tona yi fume malembe ya 40. Endzhaku ka ku fa ka Solomoni, Israyele ri ve mimfumo yimbirhi, mfumo wa le n’walungwini ni mfumo wa le dzongeni.

Mfumo wa le n’walungwini wa tinyimba ta 10 wu ve kona ku ringana malembe ya 257 wu nga si lovisiwa hi Vaasiriya. Endzhaku ka malembe ya 133, mfumo wa le dzongeni wa tinxaka timbirhi na wona wu lovisiwile. Hi nkarhi wolowo Vaisrayele va yisiwe evuhlongeni eBabilona. Kutani Xiphemu xa VUMUNE xi katsa malembe ya 510 ya matimu, laha ku humeleleke swiendlakalo swo tala leswi tsakisaka.