Wanuna La Nga Chaviki
Dyondzo 74
Wanuna La Nga Chaviki
VONA vanhu lava va hleka jaha leri. Xana wa ri tiva? I Yeremiya. I muprofeta wa nkoka swinene wa Xikwembu.
Endzhakunyana ka loko Hosi Yosiya a sungule ku herisa swifaniso swa hava etikweni, Yehovha u byele Yeremiya leswaku a va muprofeta Wakwe. Hambiswiritano, Yeremiya a a anakanya leswaku wa ha ri ntsongo ku va muprofeta. Kambe Yehovha u vule leswaku Yena u ta n’wi pfuna.
Yeremiya u byele Vaisrayele leswaku va tshika ku endla swilo swo biha. U te: ‘Vanhu va matiko va gandzela swikwembu swa mavunwa.’ Kambe Vaisrayele vo tala a va hlawula ku gandzela swifaniso swa hava ematshan’weni yo gandzela Yehovha Xikwembu xa ntiyiso. Loko Yeremiya a byela vanhu leswaku Xikwembu xi ta va xupula hikwalaho ka vubihi bya vona, va lo n’wi hleka.
Ku hundze malembe. Yosiya a fa, endzhaku ka tin’hweti tinharhu n’wana wakwe Yoyakimi a va hosi. Yeremiya a a hambeta a byela vanhu a ku: ‘Yerusalema ri ta lovisiwa loko mi nga hundzuki etindleleni ta n’wina to homboloka.’ Vaprista va bvunga Yeremiya kutani va huwelela va ku: ‘U fanele ku dlawa hikwalaho ko vula swilo leswi.’ Kutani va byela tihosana ta Israyele va ku: ‘Yeremiya u fanele a dlawa hikuva u rhukane muti wa hina.’
Xana Yeremiya a a ta endla yini hi nkarhi wolowo? A a nga chavi! U va byele hinkwavo a ku: ‘Yehovha u ndzi rhumile leswaku ndzi ta mi byela timhaka leti. Loko mi nga hundzuki etindleleni ta n’wina to homboloka, Yehovha u ta lovisa Yerusalema. Kambe tivani leswi: Loko mi ndzi dlaya, mi ta va mi dlaya munhu la nga riki na nandzu.’
Tihosana ti tshike Yeremiya a ya emahlweni a hanya, kambe Vaisrayele a va hundzukanga. Endzhakunyana, Nebukadnetsara hosi ya le Babilona u tile a ta hlasela Yerusalema. Eku heteleleni Nebukadnetsara u endle Vaisrayele va va malandza yakwe. U teke vo tala a va yisa eBabilona. Anakanya leswaku a swi ta va njhani loko vanhu lava u nga va tiviki va ku teka va ku yisa etikweni leri u nga ri tiviki!
Yeremiya 1:1-8; 10:1-5; 26:1-16; 2 Tihosi 24:1-17.