Dyondzo 71

Xikwembu Xi Tshembisa Paradeyisi

LEXI i xifaniso xa paradeyisi leyi Xikwembu xi nga ha vaka xi yi kombise muprofeta wa xona Esaya. Esaya u hanye endzhakunyana ka Yonasi.

Rito paradeyisi ri vula “ntanga” kumbe “phaka.” Xana yi ku tsundzuxa swin’wana leswi se hi swi voneke ebukwini leyi? Yi fana ni ntanga wo saseka lowu Yehovha Xikwembu a a wu endlele Adamu na Evha, a hi swona ke? Xana misava hinkwayo yi ta kala yi va paradeyisi?

Yehovha u byele muprofeta wa yena Esaya leswaku a tsala hi ta paradeyisi leyintshwa leyi taka ya vanhu va Xikwembu. U te: ‘Mhisi ni xinyimpfana swi ta tshama swin’we hi ku rhula. Rhole ni xinghalana swi ta dya swin’we, swi byisiwa hi mufana lontsongo. Hambi ku ri nyoka leyi nga ni vuxungu a yi nge n’wi lumi n’wana loko a tlanga ekusuhi na yona.’

Vanhu vo tala va nga ha ku: ‘Leswi a swi nge pfuki swi endlekile. Minkarhi hinkwayo a ku ri ni makhombo emisaveni, naswona ma ta tshama ma ri kona.’ Kambe anakanya hi leswi: Xana Xikwembu a xi va nyike kaya ra njhani Adamu na Evha?

Xikwembu xi veke Adamu na Evha eparadeyisini. Va lahlekeriwe hi kaya ra vona ro saseka hikwalaho ka leswi va nga xi yingisangiki Xikwembu, va dyuharile kutani va fa. Xikwembu xi vule leswaku xi ta nyika vanhu lava va xi rhandzaka swilo leswi lahlekeleke Adamu na Evha.

Eparadeyisini leyintshwa leyi taka, ku hava lexi nga ta vavisa kumbe ku onha. Ku ta va ni ku rhula lokukulu. Vanhu hinkwavo va ta va ni rihanyo lerinene va tlhela va tsaka. Ku ta va hi ndlela leyi Xikwembu a xi swi lavise xiswona eku sunguleni. Kambe endzhaku hi ta dyondza ndlela leyi Xikwembu xi nga ta swi endlisa swona leswi.

Esaya 11:6-9; Nhlavutelo 21:3, 4.