Dyondzo 49

Dyambu Ri Yima

VONA Yoxuwa. U vulavule a ku: ‘Dyambu, yima!’ Kutani dyambu ra yima. Ri yime exikarhi ka matilo siku hinkwaro. I Yehovha loyi a endleke leswaku ri yima! Kambe a hi voneni leswaku ha yini Yoxuwa a a lava leswaku dyambu ri yima.

Loko tihosi leto homboloka etikweni ra Kanana ti sungule ku lwa ni Vagibiyoni, Vagibiyoni va rhumele wanuna un’wana leswaku a ya kombela mpfuno eka Yoxuwa. U te: ‘Tana hi ku hatlisa! Hi ponise! Tihosi hinkwato leti tshamaka endhawini ya le tintshaveni ti tile ku ta lwa ni malandza ya wena.’

Hiloko Yoxuwa ni vava-nuna va yena hinkwavo va nyimpi va famba. Va fambe vusiku hinkwabyo. Loko va fika eGibiyoni, masocha ya tihosi ta ntlhanu ma chuhile kutani ma sungula ku baleka. Hiloko Yehovha a nisa xihangu lexikulu, naswona ma tele masocha lama dlayiweke hi xihangu ku tlula lama dlayiweke hi vavanuna va Yoxuwa va nyimpi.

Yoxuwa se a a swi vona leswaku dyambu ri le kusuhi ni ku pela. A ku ta va munyama naswona masocha yo tala ya tihosi leto biha ta ntlhanu a ma ta baleka. Hi yona mhaka leyi Yoxuwa a khongeleke eka Yehovha a ku: ‘Dyambu, yima!’ Kutani loko dyambu ri yimile, Vaisrayele va kote ku hlula enyimpini.

A ku ri ni tihosi to tala eKanana leti a ti venga vanhu va Xikwembu. Yoxuwa ni vuthu rakwe va hete malembe ya tsevu ku hlula tihosi ta 31 etikweni rero. Loko se va ti hlurile, Yoxuwa u endle leswaku tinyimba leti a ti nga si kuma ndzhaka ti averiwa ndhawu ya tona etikweni ra Kanana.

Ku hundze malembe yo tala, kutani Yoxuwa a fa a ri ni malembe ya 110. Loko yena ni vanghana vakwe va ha hanya, vanhu a va yingisa Yehovha. Kambe loko vanhu volavo lavanene va fa, vanhu va sungule ku endla swilo swo biha, va wela ekhombyeni. Hakunene enkarhini wolowo a va lava mpfuno wa Xikwembu.

Yoxuwa 10:6-15; 12:7-24; 14:1-5; Vaavanyisi 2:8-13.