Khamba eIsrayele
Dyondzo 47
Khamba eIsrayele
LANGUTA leswi wanuna loyi a swi celelaka etendeni rakwe! I nguvu yo saseka ni xiphepherhele xa nsuku ni silivhere. U swi teke emutini wa Yeriko. Kambe a ku fanele ku endliwe yini hi swilo swa le Yeriko? Xana wa tsundzuka?
A swi fanele swi lovisiwile, naswona nsuku ni silivhere a swi fanele swi hoxiwe evuhlayiselweni bya xuma lebyi nga etabernakeleni ya Yehovha. Kutani vanhu lava va tlule nawu wa Xikwembu. Va yive swilo swa Xikwembu. Vito ra wanuna loyi i Akani, naswona lava a nga na vona i swirho swa ndyangu wakwe. A hi voneni leswi humeleleke.
Endzhaku ka loko Akani a yive swilo leswi, Yoxuwa u rhumele vavanuna van’wana leswaku va ya hlasela muti wa Ayi. Kambe va fike va hluriwa enyimpini. Van’wana va dlayiwile kutani lavan’wana va baleka. Mbilu ya Yoxuwa yi vave ngopfu. U nkhinsame ehansi kutani a khongela eka Yehovha a ku: ‘Ha yini u pfumelele swilo leswi swi hi humelela?’
Yehovha u hlamule a ku: ‘Suka u yima! Israyele u dyohile. Va teke swilo swin’wana leswi a swi fanele ku lovisiwa kumbe ku nyikeriwa etabernakeleni ya Yehovha. Va yive nguvu yo saseka va yi tumbeta. A ndzi nge ku katekisi loko u nga si yi lovisa ni ku dlaya la tekeke swilo leswi.’ Yehovha u vule leswaku u ta komba Yoxuwa wanuna wa kona wo biha.
Kutani Yoxuwa u hlengelete vanhu hinkwavo, naswona Yehovha u kombe leswaku wanuna wo biha, i Akani. Akani u te: ‘Ndzi dyohile. Ndzi vone nguvu yo saseka ni nsuku ni silivhere. Ndzi swi navele hi mbilu ya mina hinkwayo lerova ndzi swi teka. Mi ta swi kuma laha ndzi swi celeleke kona endzeni ka tende ra mina.’
Loko swilo leswi swi kumekile kutani swi tisiwe eka Yoxuwa, u byele Akani a ku: ‘Ha yini u hi tisele khombo? Sweswi Yehovha u ta ku tisela khombo!’ Enkarhini wolowo vanhu va sungule ku khandla Akani hi maribye swin’we ni ndyangu wakwe kukondza va fa. Xana sweswo a swi kombisi leswaku a hi fanelanga hi teka swilo leswi nga riki swa hina?
Endzhaku ka sweswo Israyele ri tlhele ri ya lwa na Ayi. Enkarhini wolowo Yehovha u pfune vanhu vakwe, naswona va hlurile enyimpini.
