Dyondzo 40

Muxe A Ba Ribye

KU HUNDZE malembe yo tala—ya 10, ya 20, ya 30, ku ya fika eka malembe ya 39! Naswona Vaisrayele a va ha ri emananga. Kambe malembe wolawo hinkwawo Yehovha a a khathalela vanhu va yena. A a va wundla hi manna. Ninhlikanhi a a va rhangela hi papa kasi nivusiku a a va rhangela hi ndzilo. Naswona emalembeni wolawo hinkwawo swiambalo swa vona a swi nga hlakali hambi ku ri milenge ya vona a yi nga pfimbi.

Se a ku ri n’hweti yo sungula ya lembe ra vu-40 ku sukela loko va hume aEgipta. Vaisrayele va tlhele va dzima mixaxa eKadexi. Laha hi kona laha a va dzime kona mixaxa loko ku rhumiwa tinhlorhi ta 12 ku ya kambela tiko ra Kanana emalembeni lama lavaka ku va 40 lama hundzeke. Meriyamu, makwavo wa Muxe u fele eKadexi. Naswona ku tlhela ku va ni hasahasa endhawini leyi ku fana ni le ku sunguleni.

Vanhu a va nga ri na mati. Kutani va gungulela Muxe va ku: ‘A swi ta antswa loko a hi lo fa. Ha yini mi hi humese aEgipta mi hi tisa endhawini leyi yo biha laha ku nga miliki nchumu? Ku hava mavele, makuwa, mirhi ya vhinya ni magrenada. Ku hava ni mati yo nwa.’

Loko Muxe na Aroni va ya tabernakeleni va ya khongela, Yehovha u byele Muxe a ku: ‘Hlengeleta vanhu. Kutani vulavula ni ribye leriya emahlweni ka vona hinkwavo. Ri ta humesa mati lama nga ta enela vanhu ni swifuwo swa vona hinkwaswo.’

Hiloko Muxe a hlengeleta vanhu kutani a ku: ‘Twanani n’wina mi nga xi tshembiki Xikwembu! Xana mina na Aroni hi fanele hi mi humesela mati eribyeni leri?’ Hiloko Muxe a ba ribye kambirhi hi nhonga, kutani ku huma mati yo tala eribyeni. Kutani ku va ni mati yo tala lama eneleke vanhu ni swifuwo swa vona.

Kambe Yehovha u hlundzukele Muxe na Aroni. Ha yini? Hileswi Muxe na Aroni va vuleke leswaku hi vona va nga ta humesa mati eribyeni. Entiyisweni ma humesiwe hi Yehovha. Naswona leswi Muxe na Aroni va hembeke, Yehovha u vule leswaku u ta va xupula. U te: ‘A mi nge va nghenisi vanhu va mina eKanana.’

Ku nga ri kungani Vaisrayele va sukile eKadexi. Hi ku famba ka nkarhi va fike eNtshaveni ya Hore. Aroni u fele ehenhla ka ntshava yoleyo. A a ri ni malembe ya 123 loko a fa. Vaisrayele a va ri ni gome kutani va rile Aroni masiku ya 30. N’wana wakwe Eliyazara u ve muprista lonkulu wa tiko ra Israyele.

Tinhlayo 20:1-13, 22-29; Deteronoma 29:5.