Dyondzo 13

Abrahama—Munghana Wa Xikwembu

YIN’WANA ya tindhawu leti vanhu va yeke va ya tshama eka yona endzhaku ka Ndhambi a yi vuriwa Ura. Yi ve muti wa nkoka lowu a wu ri ni makaya yo saseka. Kambe vanhu va kwalaho a va gandzela swikwembu swa hava. A va gandzela hi ndlela yoleyo ni le Babele. Vanhu va le Ura ni le Babele a va nga fani na Nowa ni n’wana wakwe Xeme lava yeke mahlweni va tirhela Yehovha.

Eku heteleleni, Nowa lowo tshembeka u file emalembeni ya 350 endzhaku ka ndhambi. Endzhaku ka malembe mambirhi, ku velekiwe wanuna loyi u n’wi vonaka exifanisweni lexi. A a ri munhu wo hlawuleka swinene eka Xikwembu. Vito ra yena a a ri Abrahama. A a tshama ni ndyangu wakwe emutini wolowo wa Ura.

Siku rin’wana Yehovha u byele Abrahama a ku: ‘Suka eUra swin’we ni le ka maxaka ya wena, kutani u ya etikweni leri ndzi nga ta ku komba rona.’ Xana Abrahama u xi yingisile Xikwembu a siya vulovolovo hinkwabyo bya le Ura? Ina, u xi yingisile. Leswi Abrahama a a yingisa Xikwembu minkarhi hinkwayo, u kale a tiviwa tanihi munghana wa Xikwembu.

Van’wana va ndyangu wa Abrahama va fambe na yena loko a suka eUra. Un’wana wa vona a ku ri tata wakwe Tera. Lota, ntukulu wakwe na yena u fambe na vona. Phela, na Sara nsati wa Abrahama u fambe na vona. Hi ku famba ka nkarhi, hinkwavo va fike endhawini leyi vuriwaka Harani, laha Tera a feleke kona. A va ri ekule swinene ni le Ura.

Endzhakunyana Abrahama ni ndyangu wakwe va sukile eHarani kutani va fika etikweni leri vuriwaka Kanana. Kwalaho Yehovha u te: ‘Leri i tiko leri ndzi nga ta ri nyika vana va wena.’ Abrahama a a tshama ematendeni le Kanana.

Xikwembu xi sungule ku pfuna Abrahama lerova u ve ni ntlhambi lowukulu wa tinyimpfu ni swifuwo swin’wana ni malandza yo tala ngopfu. Kambe yena na Sara a va nga ri na vana.

Loko Abrahama a ri ni malembe ya 99, Yehovha u te: ‘Ndzi tshembisa leswaku u ta va tata wa vanhu vo tala.’ Kambe, xana sweswo a swi ta endlekisa ku yini tanihi leswi Abrahama na Sara se a va kurile lerova a va nga ha ta kuma n’wana?

Genesa 11:27-32; 12:1-7; 17:1-8, 15-17; 18:9-19.