Dyondzo 33

Ku Pela Lwandle Ro Tshwuka

VONA leswi humelelaka! Luya i Muxe la tshambuluteke nhonga yakwe ehenhla ka Lwandle ro Tshwuka. Vanhu lava nga na yena lava poneke etlhelo lerin’wana i Vaisrayele. Kambe Faro swin’we ni vuthu rakwe hinkwaro va nwele elwandle. A hi voneni leswaku swi tise ku yini.

Hilaha hi dyondzeke hakona, Faro u byele Vaisrayele leswaku va huma aEgipta endzhaku ka loko Xikwembu xi tisele Vaegipta khombo ra vukhume. Vaisrayele va kwalomu ka 600 000 va humile swin’we ni vavasati ni vana. Nakambe, ntshungu lowukulu wa vanhu van’wana lava hundzukeke vagandzeri va Yehovha wu fambe ni Vaisrayele. Hinkwavo va fambe ni tinyimpfu, timbuti ni tihomu ta vona.

Loko va nga si suka, Vaisrayele va kombele swiambalo ni swilo leswi endliweke hi nsuku ni silivhere eka Vaegipta. Vaegipta a va chuhe ngopfu hikwalaho ka khombo ro hetelela leri va weleke. Hikwalaho va nyike Vaisrayele swilo hinkwaswo leswi va swi kombeleke.

Endzhaku ka masiku yo hlayanyana, Vaisrayele va fike eLwandle ro Tshwuka. Va fike va wisa kwalaho. Enkarhini wolowo, Faro ni vavanuna vakwe va sungule ku tisola hileswi va tshikeke Vaisrayele va famba. Va te: ‘Hi tshike mahlonga ya hina ma famba!’

Kutani Faro u tlhele a cinca mianakanyo yakwe. Hi ku hatlisa u lunghiselele tigolonyi takwe ta nyimpi swin’we ni vuthu rakwe. Hiloko a sungula ku hlongorisa Vaisrayele hi tigolonyi to hlawuleka ta 600 swin’we ni hi tigolonyi hinkwato ta le Egipta.

Loko Vaisrayele va vona Faro ni vuthu rakwe va ta hi le ndzhaku, a va chuhe ngopfu. A ku nga ri na ko balekela kona. Etlhelo ka vona a ku ri ni Lwandle ro Tshwuka kasi Vaegipta a va ta hi tlhelo lerin’wanyana. Kambe Yehovha a veka papa exikarhi ka vanhu vakwe ni Vaegipta. Kutani Vaegipta a va nga swi koti ku vona Vaisrayele leswaku va va hlasela.

Hiloko Yehovha a byela Muxe leswaku a tshambuluta nhonga yakwe ehenhla ka Lwandle ro Tshwuka. Loko a endle tano, Yehovha u vange leswaku ku hunga xidzedze lexikulu xa le vuxeni. Mati ya lwandle ma pandzeka hi le xikarhi, ma yima ematlhelweni mambirhi.

Kutani Vaisrayele va sungula ku famba va tsemakanya lwandle hi le ndhawini leyi omeke. Ku hele tiawara leswaku vanhu va timiliyoni swin’we ni swifuwo swa vona va tsemakanya lwandle va hlayisekile. Eku heteleleni Vaegipta a va kota ku vona Vaisrayele nakambe. Mahlonga ya vona se a ma baleka! A va ha yima-yimanga, va lo nghena elwandle va va sala ndzhaku.

Loko va nghenile, Xikwembu xi endle leswaku mavhilwa ya tigolonyi ta vona ma tshoveka. Vaegipta va sungule ku chava ngopfu kutani va huwelela va ku: ‘Yehovha u yima ni Vaisrayele, u lwa na hina. A hi humeni laha!’ Kambe nkarhi a wu nga ha ri kona.

Hi wona nkarhi lowu Yehovha a byeleke Muxe leswaku a tshambuluta nhonga yakwe ehenhla ka Lwandle ro Tshwuka, hilaha u swi vonaka hakona exifanisweni lexi. Loko Muxe a yi tshambuluta, makhumbi ya mati ma sungule ku wa kutani mati ma funengeta Vaegipta swin’we ni tigolonyi ta vona ta nyimpi. Vuthu hinkwaro a ri landzele Vaisrayele elwandle. Naswona a nga kona Muegipta la poneke kwalaho!

Vanhu va Xikwembu a va tsake ngopfu hi ku va va ponile! Vavanuna va yimbelele risimu ro nkhensa Yehovha va ku: ‘Yehovha u hlule nyimpi leyikulu. U hoxe tihanci ni vagadi va tona elwandle.’ Meriyamu, sesi wa Muxe u teke xingomana kutani vavasati hinkwavo va n’wi landzela hi swingomana swa vona. Loko va ri karhi va cina va tsakile, a va yimbelela risimu swin’we ni vavanuna, va ku: ‘Yehovha u hlule nyimpi leyikulu. U hoxe tihanci ni vagadi va tona elwandle.’

Eksoda tindzima 12 ku ya eka 15.