Dyondzo 29

Leswi Endleke Leswaku Muxe A Baleka

WA N’WI vona Muxe a ri karhi a baleka aEgipta. Xana wa va vona vavanuna lava n’wi hlongorisaka? Xana wa swi tiva leswaku ha yini va lava ku dlaya Muxe? A hi laveni xivangelo xa kona.

Muxe u kulele endlwini ya Faro, loyi a a fuma aEgipta. U ve wanuna wo tlhariha ni la nga ni matimba. Muxe a a swi tiva leswaku yena a hi Muegipta nileswaku vatswari vakwe va xiviri a ku ri Vaisrayele lava nga mahlonga.

Siku rin’wana loko a ri ni malembe ya 40, Muxe u ehlekete ku ya pfuxela vanhu va ka vona. A yi chavisa ndlela leyi a va khomiwa ha yona. U vone Muegipta a ri karhi a bukutela Muisrayele la nga hlonga. Muxe u rhala-rharile kutani loko a vona leswaku a ku na munhu la n’wi vonaka, u be Muegipta, ivi Muegipta a fa. Kutani Muxe u tumbete ntsumbu wa yena esaveni.

Hi siku leri tlhandlamaka Muxe u humile ku ya pfuxela vanhu va ka vona nakambe. A a ehleketa leswaku a nga va pfuna leswaku va nga ha vi mahlonga. Kambe u vone Vaisrayele vambirhi va ri eku lweni, hiloko Muxe a byela loyi a endleke xihoxo a ku: ‘Xana u n’wi bela yini makwenu?’

Hiloko wanuna loyi a ku: ‘I mani la ku vekeke hosana ni muavanyisi wa hina? Xana u lava ku ndzi dlaya ku fana nileswi u dlayeke Muegipta?’

Hiloko Muxe a sungula ku chava. U swi xiyile leswaku vanhu va swi kumile leswi a swi endleke eka Muegipta. Hambi ku ri Faro u yi twile mhaka leyi kutani u rhumele vavanuna leswaku va ya dlaya Muxe. Hi yona mhaka leyi endleke leswaku Muxe a baleka aEgipta.

Loko Muxe a huma aEgipta, u ye etikweni ra le kule ra Midiyani. Kwalaho u hlangane ni ndyangu wa Yetro kutani a teka un’wana wa vana va yena va vanhwanyana la vuriwaka Zipora. Muxe u ve murisi kutani a khathalela tinyimpfu ta Yetro. U tshame etikweni ra Midiyani ku ringana malembe ya 40. Hi nkarhi wolowo a a ri ni malembe ya 80. Kutani siku rin’wana loko Muxe a ri eku riseni ka tinyimpfu ta Yetro, ku humelele nchumu wo hlamarisa lowu cinceke vutomi bya Muxe hinkwabyo. Pfula tluka leri landzelaka leswaku u vona nchumu wa kona lowo hlamarisa.

Eksoda 2:11-25; Mintirho 7:22-29.