Dyondzo 28

Ndlela Leyi Muxe A Ponisiweke Ha Yona

XANA wa n’wi vona n’wana loyi a rilaka, a khome rintiho ra wansati loyi? N’wana loyi i Muxe. Xana wa n’wi tiva nhwanyana loyi wo saseka? I n’wana wa Faro, hosi ya le Egipta.

Mana wa Muxe u tumbete n’wana wakwe kukondza a va ni tin’hweti tinharhu hikuva a a nga lavi leswaku a dlayiwa hi Vaegipta. Kambe a a swi tiva leswaku Muxe a nga ha kumiwa, kutani u endle leswi landzelaka leswaku a n’wi ponisa.

U teke xirhundzu kutani a xi lema kahle leswaku mati ma nga ngheni endzeni ka xona. Hiloko a hoxa Muxe endzeni ka xona kutani a xi veka etinhlangeni to leha ta le Nambyeni wa Nayili. Meriyamu, sesi wa Muxe a a byeriwe leswaku a nga fambeli ekule leswaku a ta kota ku vona leswi nga ta humelela.

Ku nga ri kungani n’wana wa Faro wa nhwanyana u rhelele eNambyeni wa Nayili leswaku a ya hlamba. Hiloko a vona xirhundzu exikarhi ka tinhlanga leto leha. U vitane nhwanyana un’wana wa malandza yakwe, a ku: ‘Famba u ya ndzi tekela xirhundzu lexiya.’ Loko n’wana wa hosi a pfula xirhundzu xa kona, u vone n’wana wo saseka swinene! Muxe a a ri karhi a rila kutani n’wana wa hosi a n’wi twela vusiwana. A a nga swi lavi leswaku a dlayiwa.

Kutani Meriyamu u tshinerile. Hi yena loyi u n’wi vonaka exifanisweni lexi. Meriyamu u vutise n’wana wa Faro a ku: ‘Xana ndzi nga famba ndzi ya ku vitanela wansati wa Muisrayele leswaku a ta ku mamisela n’wana loyi?’

N’wana wa hosi u te: ‘Famba.’

Hiloko Meriyamu a tsutsuma a ya byela mana wa yena. Loko mana wa Muxe a fika, n’wana wa hosi u te: ‘Teka n’wana loyi u ndzi mamisela yena, mina ndzi ta ku hakela.’

Kutani mana wa Muxe u teke n’wana wa yena a ya n’wi khathalela. Hi ku famba ka nkarhi loko Muxe a kurilenyana, u n’wi yise eka n’wana wa Faro loyi a n’wi tekeke tanihi n’wana wakwe. Muxe u kulele endlwini ya Faro hi ndlela yoleyo.

Eksoda 2:1-10.